Read Biblia Mixe de Quetzaltepec Apocalipsis 21 Bible Online

Apocalipsis 21 - Biblia Mixe de Quetzaltepec bible

Apocalipsis 21

¹Ko jëtu'un y'ëknajxy, ënätës n'ijxy tu'uk ja jempyë tsajp ets ja jempyë naax, jä'ä ko ja jëyëjpë ja tsajp ets ja jëyëjpë ja naax, ka'ap ënäty maanë, nän ka'ap maanë ja mejy.

²Täätsës n'ijxy kyëtä'äky ja oypyë wa'atspë ja kajpn, ja jempyë Jerusalén. Jam tsajpjotm tsyo'ony ma ja Tios y'ityën ets janty tsuj y'oytyunyëty ijxtëm tu'uk ja to'oxytyëjk të nyäj'oytyunyën ko pyëka'any mëët ja ye'etyëjk.

³Ets nmëtooyës tu'uk ja ayuk mëk tsajpjotm y'ënä'äny: Jam ja Tios tyam y'ity ma ja ja'ayën ets jyuuky'ata'any mëët yë'ë. Yë'ëts ja'ay'atëtëp ets ja Tios yajpaata'any mëët yë'ëty.

⁴Yajtëkooytya'ajäämpy ja Tios tu'kë'ëyë ja jë'ëyën yaxën ets ka'ap ma nyäky'ita'any ja o'kën tëko'oyën, ni ja amay jotmay ets ni ja pëjkën ato'onën, jä'ä ko mëti'ipë të y'ityën, tëë ja nyäxy.

⁵Ënät y'ënäny mëti'ipë u'unyääpyën jam ma kutujktaknën: Ëjts nyajkojpy aak jemy oy tyimtiijëty. Ets näjyëtu'un y'ënäny: Kuja'a, ko tëy jaanty ya'atë aaw ayuk ets ëmuumtu'ukjot yajmëpëkëty.

⁶Ënät xynyëmaayës: Tëë tyuunta'ay jyajta'ayë winë. Ëjts ntuktso'ontäkpy ets ëjts ntukjëjpkëxyp. Ëjts tso'ontakp, ets ëjts jëjpkëjxp. Pën tëtsëp, namëyajtënës ntuk'uuka'any ja wa'ats nëë mëti'ipë yajjuuky'ajtpën xëmëkyëjxm.

⁷Ya'atë kyuma'ayën'atëp pën ënäty mëtakpën, etsës yë'ë xyTios'atëty ets yë'ëjës n'u'unk'atëty.

⁸E mëti'ipë ja mëpëjkën y'ëxmajtsypyën, mëti'ipë ka'ap kyäjpxyjä'äykyukën, ja ka'oyjyä'äyëty, yaja'ay'o'kpëtëjkëty, ka'apë nyiye'etyëjk nyito'oxytyëjk twinkutsë'ëkën, xëëwmääpyëtëjkëty, mëti'ipë awinax y'ëwtajtëpën, ets tëkokyë win'ë'ëmpëtëjkëty, jap nëjkx nyëjkxtë ma ja mejy tyoyën mëët ja azufre, ja mëmäjtskpë ja o'kën.

⁹Ënät nitu'uk ja niwëxtujkpë ja tsajpjotmëtë kukäjpxy myiiny, mëti'ipë myëët'ajtypyën ja wëxtujkpë ja a'ukën ujtspë yajpaatën mëët ja wëxtujkpë ja ëyo'on ets xynyëmaayës: Min ets ntuk'ixëty ja mëpëjkpëtëjk mëti'ipë pyëkantëpën ja Kupixyny U'unk.

¹⁰Ënätës ja tsajpjotmëtë kukäjpxy ojts xytyuk'ixy ja Kënu'kxymyëkajtën ma ja kopkën këjxmëpë ets xytyuk'ijxyës ko kyëtä'äky ja kënu'kxy mëj kajpn, ja Jerusalén kajpn, mëti'ipë tsajpjotm tso'onpën Tios wyintum.

¹¹Janty ajajp janty atë'kxp mëët ja Tios ja myëj'ajtën jyääntyajtën, jëtu'un y'ajajy y'atsëmämy ijxtëm ja tsaa janty oypyën, ijxtëm tu'uk ja poop tsaajën mëti'ipë yajtuk'ijxnajxpën, ijxtëm ja ijxn yajtuk'ijxnaxyën.

¹²Këjxm ja kajpn nyapojts'ëwëtityëty ets majkmäjtsk ja tëjk'aaw tmëëtëty. Jamts ja tsajpjotmëtë kukäjpxy tyänëtë maajëty ja tëjk'aawën. Jam tëjk'aawkëjxm kyëxja'ayëty ja xyëëw ja majkmäjtsk pëkpyë ja Israel ja'ayëty ja y'u'unk y'ok.

¹³Tëkëëk ja tëjk'aaw wyi'im a'oytsyow ets tëkëëk anajnytsyow ets tëkëëk wintuuy'äämpy ets nän tëkëëk jëxkë'p'äämpy.

¹⁴Ja potsy mëti'ipë nyapots'ajtypyën ja kajpn, majkmäjtsk ja tsaa tmëëtëty mëti'ipë y'ëjx'ajtypyën. Japts kyuja'ayëty ja Jesús ja y'ijxpëjkpëtëjk ja xyëëwëty.

¹⁵Ja tsajpjotmëtë kukäjpxy mëti'ipës xymyëmëtyakpën, myëët'ajtyp tu'uk ja kepy mëti'ipë yajtukkijpxpën winë, aak pu'ts pujxn mëët y'oytyunyën ets tukijpxa'any ja kajpn, ja tëjk'aaw ets ja potsy.

¹⁶Ayeny ja kajpn, tu'knax yenyëty mëët ja y'ok. Tääts ja tsajpjotmëtë kukäjpxy ojts tkijpxy ja kajpn mëët ja kyijpxn. Mäjtsk millon ja mäjtsk mëko'px mil metro ojts kyijpxpëtsëmy, jëtu'un ja y'ok ets näjyëtu'un ja kyëjxm'ajtën.

¹⁷Ënät näjyëtu'un ojts tkijpxy ja potsy. Tëkë'px mëkoxk metro kyëjxmëty. Jëtu'un ja tsajpjotmëtë kukäjpxy tkijpxy ijxtëm ja ja'ay kyijpxtën.

¹⁸Ja potsy, yë'ë mëët y'oytyunyëty yë nëëtë'kxy tsyaa ets ja kajpn aak pu'ts pujxn mëët y'oytyunyëty ijxtëm yë ijxnën tëëpë wyä'ätsyën.

¹⁹Ja tsaa mëti'ipë y'ëjx'ajtypyën ja potsy, aak oypyë tsaa mëët y'oytyunyëty: Ja mëtu'ukpë yë'ë mëët ja nëtë'kxy tsyaa, ja mëmäjtskpë yë'ë mëët ja tsuxk uky tsyaa, ja mëtëkëëkpë yë'ë mëët ja yëktsapts tsaa, ja mëmajktaxkpë yë'ë mëët ja tsuxktsaa,

²⁰ja mëmëkoxkpë yë'ë mëët ja yëk tsaa, ja mëtëtujkpë yë'ë mëët ja uky tsyapts tsaa, ja mëwëxtujkpë yë'ë mëët ja të'kxy tsyaa, ja mëtuktujkpë yë'ë mëët ja mony tsuxktsaa, ja mëtaxtujkpë yë'ë mëët ja pu'ts tsaa, ja mëmajkpë yë'ë mëët ja poop tsuxktsaa, ja mëmajktu'ukpë yë'ë mëët yë monytsyapts tsaa, ets ja mëmajk mäjtskpë yë'ë mëët ja nipyu'ts tsaa.

²¹Ja majkmäjtskpë ja tëjk'aaw, aak poop jaam tsaa mëët y'oytyunyëty, tu'ukjaty ja tëjk'aaw aak poop jaam tsa'a mëët y'oytyunyëty. Ets ja mëjtu'u kajpnjotypë aak pu'ts pujxn mëët y'oytyunyëty, tä të'kxy kyiikën.

²²Ni ma kajpn jëtu'un të nka'ixyës ja tsajptëjk ma Tios yajwintsë'ëkën, jä'ä ko ja Tios mëti'ipë maaytyääyëpën winë ets ja mëti'ipë yajtijpën Kupixyny U'unk, yajwintsë'këtëp jä'ä oymyaajëty.

²³Ka'ap jam myëyäty ets ja xëëw po'o y'anëty kajpnjotm, kë'ëm ja Tios ets ja Kupixyny U'unk y'ajajy y'atë'kxy.

²⁴Näy yë'ë kutë'kx kujajëtëp ja naaxwiinyëtë ja'ay ets ja naaxwiinyëtë yajkutujkpëtëjk tkë'ëyaktë jam ja wyit myeenyëty.

²⁵Nijëna'a ja tëjk'aaw jam ëtuky kya'itëty xëëny. Nijëna'a ja kootspë jam kya'ita'any.

²⁶Jam ja naax kajpn tmënëjkxa'antë ja oyajtën tsujajtën ets ja wyintsë'kën.

²⁷Nijëna'a jam kyatëkëty ja ëxëëkpë ku'oypyë ets ni ja ja'ay jam kyawin'ëëntëty ets tii ëxëëk tuntëty. Yi'iyë jam tëkëjaanp mëti'ipë ja xyëëw miintëpën kuja'ay ma ja nokyën juukyajtën mëëtpë mëti'ipë myëët'ajtypyën ja Kupixyny U'unk.