Read Biblia Mixe de Quetzaltepec Apocalipsis 6 Bible Online

Apocalipsis 6 - Biblia Mixe de Quetzaltepec bible

Apocalipsis 6

¹N'ijxës ko ja Kupixyn U'unk tyaj'ëwatsy mëtu'uk ja wëxtujkpë ja tsa'ayën ets nmëtoowës ko tu'uk ja nimajktaxkpë juuky'ajtpë mëk y'ënäny ijxtëm ja ënääw nyokyën: Min.

²Ënätës n'ijxy tu'uk ja poop kwaay ets mëti'ipë ja poop kwaay tyuk'u'unyääpyën, ti'pxn tu'uk pyakäjpy ets yajmooy tu'uk ja kyujup ets tsyo'ony tsiptuunpë ets myëta'akëty.

³Mëti'ipë yajtijpën Kupixyny U'unk, ko tyaj'ëwatsy ja mëmäjtskpë tsa'ayën ets nmëtooyës ko ja mëmäjtskpë juuky'ajtpë y'ënäny: Min.

⁴Täätsës wiinkpë ja kwaay n'ijxyës, tsapts y'ixëty, ets ja mëti'ipë tuk'ënyääyëpën ojts t'ëxajë ja mëk'ajtën ets tjëpëkëty ja jotkujk'ajtën naaxwiiny ets ja naaxwiinyëtë ja'ay tyajtsiptunëty ets nixim niyam nyäyaj'ookëtëty, ënät yajmooy tu'uk ja tëypyujxn.

⁵Ko ja mëti'ipë yajtijpën Kupixyny U'unk tyaj'ëwatsy ja mëtëkëëkpë ja tsa'ayën etsës nmëtooy ko ja mëtëkëëkpë juuky'ajtpë y'ënäny: Min. Ënätës n'ijxy tu'uk ja yëk kwaay. Mëti'ipë tuk'u'unyääyëpën, tsim akijpxnajxpë wyijts'ijtyp.

⁶Jam itkujky ma ja nimajktaxkpë ja juukyajtpën nmëtooyës tu'uk ja ayuk y'ënä'äny: Je'eyë tu'ktsim ja tsajpmok tu'kxëëw nitunypë; ets tëkëëk tsim ja cebadë tu'kxëëw nitunypë; je'eyëp ko këtii ja on ets ja tsatsym nyëë xyajma'atëty.

⁷Ko ja Kupixyny U'unk ja mëmajktaxkpë ja tsa'ayën tyaj'ëwatsy, ënätës nmëtooy ko ja mëmajktaxkpë ja juuky'ajtpë y'ënäny: Min.

⁸Ënätës n'ijxy tu'uk ja kwaay yëktsaptspë ets mëti'ipë tuk'u'unyääyëpën ja kwaay, o'kën ja xyëëwajtyp. Ix'ok pyaminyë mëti'ipë kyutëkats'ajtypyën ja o'kën ets yajmooy ja mëk'ajtën ets tyaj'ookëty ja naaxwiinyëtë ja'ay mëët ja tsip, mëët ja yuu, mëët ja pa'am ets mëët ja jëyujk ëwa'anpë mëti'ipë naaxwiinyën.

⁹Ko ja Kupixyny U'unk tyaj'ëwatsy ja mëmëkoxkpë ja tsa'ayën, ënätës n'ijxy jap wintsë'këntyakn pa'tkë'p nimay ja anëmëtëjkëty mëti'ipë të tku'ookëtën ko ja Tios ja y'aaw y'ayuk të tkajpxwa'kxëtë.

¹⁰Ets mëk y'ëna'antë: Janty oy, janty wa'ats mijts, Tios Mëti'ipë Maaytyääyëpën Winë, ¿jëna'a xytyiytyuna'any ets xypyaye'eyä'äny ja naaxwiinyëtë ja'ay mëti'ipë të y'ooktën?

¹¹Ënät yajmooytyë ja poop wit ets yaj'ënëmaaytyë ets jyaak po'kxtëty jawäänë, koonëm ja myëku'uk y'ooktëty mëti'ipë näjyëtu'un kyu'ookëjantëpën ja Kristë ja jyä'ä.

¹²Ko ja Kupixyny U'unk tyaj'ëwatsy ja mëtëtujkpë ja tsa'ayën, ënätës n'ijxy ko mëk ja ujx nyäjxy. Ojts ja xëëw yëk jyajta'ay, ijxtëm yëk witën mëti'ipë ja'ay pyëjktaktëpën ko pën y'ooky; ja po'o tsapts y'awinpijty ijxtëm ja ne'pynyën,

¹³ets ja mëtsa'a kya'ataaytyë naaxkëjxy ijxtëm ja mëkpoj ja higo tëëm tyajkatska'ayën.

¹⁴Jëtu'unyë ja tsajp tyëkooytyääy ijxtëm ja noky yaj'axaatsyën. Ets tëkokyë ja tun kopk ets ja it naaxwiinyëtë të'ëts'itumpë ets mejyjotypë wya'ktëkajtstaaytyë.

¹⁵Ja yajkutujkpëtëjk, ja wintsëntëjk, ja tsiptuunpëtëjk, ja kumeenyjyä'äytyëjk, ja kopktëjk, ja mëtuunpëtëjk ets ja yajmëtuunpëtëjk; je'eyë ja nyäyu'tstaayëtë aankjoty ets tsaajutjoty,

¹⁶ets nëëmëtë ja tun kopk ets ja tsaakopk: Nija'apäjtëk ets yu'tstëk ëëtsëty, këtiipës xy'ixtëty mëti'ipë u'unyääpyën jam ma kutujktaknën, këtiipës xypyaatëty ja tyiytyu'unën mëti'ipë yajtijpën Kupixyny U'unk.

¹⁷Jä'ä ko tëë ja xëëw tpaaty ma y'äkë tyiytyuna'any tsyäätstyuna'anyën. ¿Pën yë'ë y'ëkmëtänëp?