Read Biblia Mixe de Quetzaltepec 1 Samuel 19 Bible Online

1 Samuel 19 - Biblia Mixe de Quetzaltepec bible

1 Samuel 19

¹Ënät ja Saúl ojts mëktä'äky tuk'ëne'emy ja myaank Jonatán ets ja tsyiptuunpë wintsëntëjk ets tyaj'ooktëty ja David. E yë Jonatán mëj këjää ënäty tsoky tjawë yë David.

²Paaty ojts pojën tuk'ëwaanë ets t'ënëmaay: Yë Saúl, yë nteetyës, jëtu'un y'ënä'äny ko myaj'ooka'anyë; paaty yam n'ënëëmë ko jopy tsojk, mëk mnäkyëwen'atëtëty ets jam muum mnäyu'utsëtëty ma mëpaat ka'ap myajpaatyën.

³Jopy mëëtës yë nteety ntsoona'any ets nëjkxa'antës jam ma ënäty myajpaatyën. Tyamës mëët nmëtya'aka'any etsës ënät nijawëty tii ëk tuun ëkjajtëp, ntuknijawëp näjyëtu'un ënätyë.

⁴Ets Jonatán oy ojts nimëtyä'äky ja David ma tyeetyën, jëtu'un, t'ënëmaay: Yajkutujkpë, jëtu'unës nja'ënaanpë ko ka'ap yowë y'oyëty ko mijts tëkatsy mmay mtajy ma Davidjën, jä'ä ko yë'ë ka'ap maa tmëtuuntëkoy yë yajkutujkpë, ni'ikyë oypyë mtukmëtunyë.

⁵Ix wa'ats xynyijawë ko ka'ap yë jyuukyajtën tpa'ëyooy ma tyaj'o'kyën ja filistejë ja'ay, e mëët yë'ëkëjxm yë Israel ja'ayëty ojts tpaatë ja nitsokën. Mijts yajkutujkpë wa'ats xy'ijxy ets wa'ats xynyijawë. ¿E wi'ix ko ënät nëkoo xyaj'ooka'any tu'uk yë ja'ay mëti'ipë ka'ap tii poky tmëëtëtyën, ma xytyuknipëjktaakën xyaj'ooka'any ja David?

⁶Ko ja Saúl jëtu'un tmëtooy wi'ix ja Jonatán myäy tyäjyën, ënät yujk'ënany: Tyamës yë Wintsën yë xyëëw ntukajpxpäjtë ko yë David ka'ap mëpaat y'ooky.

⁷Ënät ojts ja Jonatán tmëkäjpxy ja David ets tukmëmëtyäky wi'ix ënäty të myëtya'aktën. Tä ojts twoownëjkxy ma ja Saúl jam yajpaatyën ets ja David ojts jam jatëkok wyi'imy tuunpë ma ja Saúl jam yajkutukyën.

⁸Ënät jatëkok ja tsip tsyontäky ets ja David ojts nyijkxy tsiptuunpë. Yë'ë ojts myëtä'äky, may ja filistejë ja'ay tyaj'o'ky ets may tyajkeky.

⁹Ënät ja Saúl ojts jatëkok tyukja'tyë ja ëxëëk poj mëti'ipë ja Wintsën kë'ëm kyäjxën, e tamts ënäty y'u'unyë ma ja kyutujktaknën mëët ja kyu'umën, e ja David koop ënäty jam,

¹⁰ko ojts jatëkok tjamëjkuumpätankojnëpë ja David jam potsywinm. E ja David jä'ä tsu'um kyeky.

¹¹Poj'am yë Saúl ojts t'ëne'emy yë tyuunpëtëjk ets nëjkx tyajnatuktë ja David ja tyëjk, tääts komjopy tyaj'ooktëty. E ja Mical mëti'ipë yë David tyo'oxytyëjk'ajtypyën ënätyë ojts y'ëwa'anxëty ets y'ënëmaayë: Pën ka'ap tyam mnäkyëwent'atyë ets pën ka'ap mke'eky, jopy kopkpëky ko ja'ay myaj'ookëtëty.

¹²Ënät ja Mical tkutëëynyäjxy ja David tejpxymyëët japtsow tëjkjëxkë'p ets jëtu'un ja David kyeky.

¹³Mical je'eyë ojts tu'uk yë kepy tsetsy twinpity jëtu'unpë kyëxë'ëkyën tä ja'ayën, ets tkëxko'ky jam wëëtykyijxy ets jam ma ja koyën tsajppax'ak ojts twintijmuky ets tnipe'eny mëët tu'uk yë poop wit.

¹⁴E ko ja Saúl ojts t'ëne'emy ja tyuunpëtëjk ets tmatstëty ja David, ja Mical tyaa y'ëtsoowëtë ko ja David pëjkëp jap.

¹⁵E ja Saúl ojts jatëkok tkexy ja tyuunpëtëjk ets t'ëxta'atëty ja David, ets t'ënëmaay: Oy tyimjamëty wëëtykyijxy nëëjëtutë jam ets yaa xyajmintëty. Wä'änës kë'ëm nyaj'ooky.

¹⁶Tä ja Saúl ja jyä'äy tyëjktëjkëtyë ma ja David ja tyëjkën. Jam wëëtykyijxy yi'iyë jam pyatë ja kepywinpity jëtu'unpë kyëxë'ëkyën ja'ayën mëët ja tsajppax'ak atijmuky jam ma kyukoyën.

¹⁷Ënät ja Saúl t'ënëmaay ja Mical: ¿Wi'ix ko jëtu'un'äämpy xywin'ëëny ets të xyajke'eky ja nmëtsipës? Tä ja Mical y'ëtsooy: Jä'ä ko jëtu'unës të xy'ënëëmë, pën ka'apëk nyajke'ekyës xyaj'ookëpës yë'ë.

¹⁸Jëtu'un'äämpy ojts ja David kye'eky. Jam ojts nyijkxy Ramá ma jam ja Samuel ënäty yajpaatyën ets tukmëmëtyaktaay wi'ix ënäty ja Saúl të jyayaj'ooka'anyën. Jamts tsyo'ontë yë David mëët yë Samuel ets ojts nyëjkxtë jam Naiot tsënääpyë.

¹⁹Ko ja Saúl tnija'awëy ko ja David jam ënäty yajpaaty Naiot ma ja Ramá y'itjotmën,

²⁰Ënät tkejxy jam ja jyä'äy ets ja David tmatstëty. Ko jam jyajtë, ënät ja Saúl ja jyä'äy t'ijxtë ja mayjyä'äy mëti'ipë winë y'akajpxtëpën jëwyiin jëyëjp mëti'ipë Tios tyunäämpyën. Jyänty y'ëtë'ëts jyänty y'ëna'antë tä ja'ay myu'ukyën mëti'ipë yë Samuel tyu'uwinwoopyën. Ajotkumonë ojts yë Wintsën yë myëk'ajtën y'oyajtën tyukëta'akëtë ja Saúl ja jyä'äyëty ets näjyëtu'un y'ëtëtstak y'ënaantaktë tä ënäty ja käjpxynyajxpëtëjkëtyën.

²¹Ko ja Saúl tnija'awëy, ënät ja wiinkpë tkejxy ja ja'ay, e yë'ëjëty ojts näjyëtu'un tyëkëtë ëtëtspë ënaanpë tä ja käjpxynyajxpëtëjk y'ëtëtstë y'ëna'antën. Mëtëkëëk'ok ojts ja Saúl tkäjxkojnëpë ja ja'ayëty, e yë'ëjëty näjyëtu'un jyajtë kyëpäjtë.

²²Ënät ojts ja Saúl jam kë'ëm tyimnëjkxy Ramá, e ko jam jyä'äjty ma jam tu'uk yë nëë'apojtsë'ëkyën ma txëëwatyën Secu, tä jam tyajtëëy pën jam ënäty yajpaatë ja Samuel ets David. Ka'ap ojts tyëkoy'äty, pën ojts nikajpxkojyën ko jam ënäty yajpaatë Naiot ma ja Ramá y'itjotmën.

²³Ets ojts ja Saúl jam nyijkxy, e ënäts tu'uk ja Tios ja myëk'ajtën y'oyajtën tyukëtakë ets näjyëtu'un tyëjkëy ëtëtspë ënaanpë tä ja käjpxynyajxpëtëjkëtyën. Jëtu'un ojts tyu'uye'ey koonëm jyä'äjty jam Naiot ma ja Ramá y'itjotmën.

²⁴Ëpëky ojts nyänyijään nyäy'ixjäänënë ets y'ëti'itsy y'ënä'äny jëtu'un niwa'ats ëxwa'ats ets jëtu'un xyëëwnajxy tsyuunajxy jam ma Samuel wintuuyën. Jam jëtu'un yë ayuk tsyo'ony, mëti'ipë ënaanpën: ¿Näyjyëtu'un yë Saúl käjpxynyajxpë yë'ë?