Read Biblia Mixe de Quetzaltepec 1 Samuel 21 Bible Online

1 Samuel 21 - Biblia Mixe de Quetzaltepec bible

1 Samuel 21

¹Yë David jam ojts nyijkxy Nob, yë'ë jam nyinëjkx ja teety mëti'ipë xyëëwajtypyën Ahimélec. E yë'ë mëj këjää tkukajpxëy ko nyipëtsëëmë ets y'ënëmaayë: ¿Wi'ix ko ënät tyam miny janty atu'kpajk ets ka'ap pën mjämyëët'atyë?

²Tä ja David y'ëtsooy: Yë'ëjës yë yajkutujkpë xykyäjxp etsës nyajwintu'upëkëty tu'uk yë jotmay etsës të xy'ënëëmë ko ni pën mëpaat tkanijawë tiikyëjxmës ko xykyexy ets tiijës nmëmiinpy nyajmiinpy. E jä'ä ënät ja tsiptuunpëtëjkëty mëti'ipës ntu'uwinwoopyën, tëëjës ja n'ënëëmëtë maas mëët näpyäätëtyën.

³Yë'ës nyajtëwäämpy: ¿Jap xymyëëtëty jë'kxy pëkyë? Mooykyës mëkoxk yë tsajpkääky ëkë mijts ix jënu'un jap xypyääty.

⁴Ënät ja teety y'ëtsooy: Yë tsajpkääky ja tap ijty, je'eyëp tëy ko yë'ë mëti'ipë kënu'kxyën ka'ap yë'ëjëty mëti'ipë oypyënëty kyääpyën. Tyam nmo'ojëty pën ja mtsiptuunpëtëjk ka'ap ja to'oxytyëjk të tmëëtko'knëtë maxtejky myëtuukë.

⁵Ënät ja David amëk jotmëk y'ëtsooy: Xëmë koos ëëts nëjkxtë muum tsiptuunpë ka'apës yë to'oxytyëjk ma n'ixtë npaatë. E oy ntijmëty je'eyës nëkoo njëtitë, yë ntsiptuunpëtëjkës wa'ats ënäty yajpaatë koos ntso'ontë, e paaty tyam komë tëë kanaak xëëw nyajxnë ka'apës yowë n'a'ixë ënät pën muum yë to'oxytyëjk të t'ëkmëët'ijtpë.

⁶Jëtu'un'äämpy ojts ja teety myo'oyë ja tsajpkääky mëti'ipë kënu'kxyën, jä'ä ko ka'ap ënäty jap tii mëti'ipë jëtu'unyë ijtpën, jä'ä xëëw ënäty jam të yajëpëky ma ja wintsë'këntyaknën ets ja anpë të yajpëjktä'äky.

⁷E jä'ä xëëw tam'ajtp ënäty tu'uk ja Saúl ja tsyiptuunpë wintsën mëti'ipë ënäty jam të wyi'imyën ma ja tsajptëjkën, Edom ja'ay jä'ä, jä'ä xyëëwajtyp Doeg, yë'ë nyiwintsën'ajtyp ja ja'ayëty mëti'ipë kyëwent'ajtëpën ja Saúl ja jyëyujk tsyajpkaa.

⁸Tä ja David t'ënëmaay ja Abimélec: ¿Ka'ap xymyëëtëty tu'uk yë ku'umënë ëkë tëypyujxnë? Jä'ä ko janty tsojk'am ja yajkutujkpë të xy'ëne'emyës paatykyëjxm ka'ap të t'ëkjëkyäjpnë nmëtsoonëtyës ja nku'umënës ets ja ntëypyujxnës.

⁹Tä ja teety y'ëtsoowë: Tap yë yenypyujxn, jä'ä ja Goliat ja jyä'ä mëti'ipë jam myaj'o'kën ma ja joyjotmën ma yajtijyën Elá. Tap kukëyë y'ity witjëxkë'p ma efotën, winpity mëët tu'uk yë nijän. Oy yë'ë xykyë'ëjëty, pën mkë'ëjäämpy yë'ë, jä'ä ko wiinkpë ka'apës tii nmëëtëty. Tä ja David y'ëtsooy: Nimëti'ipë jëtu'un yë yenypyujxn kya'oyëty tä tääpën, mooykyës.

¹⁰David je'eyë poj'am jam nyäjxy, jä'ä ko yë'ë ënäty kyukekpy ja Saúl, jam ojts nyijkxy Gad, ma tu'uk ja yajkutujkpën jam Aquis.

¹¹Tääts ja Aquis ja tsyiptuunpë wintsëntëjk y'ënëmaayëtë: Yë'ë tyaapë David mëti'ipë mëët tyunyën yë Saúl, yë yajkutujkpë, mëti'ipë yaa ënä'ämpën ma ya'atë naax kajpnën. Yë'ë ijty ja to'oxytyëjk kuuy'ëëwëtëp ma y'ätstën: Tu'kmil yë Saúl tyaj'o'ky yë myëtsip, e yë David jä'ä të tyaj'ooky majk mil.

¹²David ojts yajxon tmëmay tmëtajy ya'atë jëtu'unpë ja ayuk, paaty ojts ja tsë'ëkë tyuktëkëty ma ja yajkutujkpën jampë Gad yajpaatyën mëti'ipë xyëëwajtypyën Aquis,

¹³Paatykyëjxm ja David ojts nyäpyëjktä'äkyë kutsuu kupoj yowë, xii yaa muum kyëxtsujy ets ja y'anëë tsyuny xye'kxy.

¹⁴Tä ja Aquis t'ënëmaay ja tsyiptuunpë wintsën: Pën m'ijxtëp ko tyaapë kutsuu kutpojëp ¿wi'ix ko yaa nëkoo xyajmintë?

¹⁵¿Yë'ëjëm jëtää yaa ja'ay jëtu'unpë ëmaaytyakpë mëti'ipë kutsuu kupojënë ets yaa tii tunëty maas yë njëën ntëjkënë?