Read Biblia Mixe de Quetzaltepec 1 Samuel 22 Bible Online

1 Samuel 22 - Biblia Mixe de Quetzaltepec bible

1 Samuel 22

¹David ënätyë kyeky, jam ojts nyijkxy ma ja aankën mëti'ipë xyëëw'ajtyp Adulam. Ko jam ja y'äjty tnija'awëtyë ets ja jyiiky myëtu'uk, ënätyë ojts nyiminëtë.

²Tëkokyë ja ja'ayëty mëti'ipë ënäty o'ktëy jajtëp këpäjtëpën ojts ja David tpuwa'këtya'atë ets mëti'ipë ënäty jam ja nyu'kxëtyën ets näjyëtu'un ja mëti'ipë ënäty ka'ap jyotkujk'atën, yë David yë'ë nikopk'ajtëtë. Ya'atë ja'ayëty mëti'ipë ja David pyuwa'këtyën, jä'ä nyiwinë'ajtë nimajktaxk mëko'px.

³Jam ja David tsyo'ony ets ojts nyijkxy Mizpá ma ja Moab ja y'itjotmën, ënät t'ënëmaay ja yajkutujkpë ja jampë y'ëne'emyën: Wintsën, mijts yam nmënu'kxtäkpy ets xy'a'ixëty wä'än yë nteety ntaakës yaa t'itë ma mnaax mkajpnën koonëmës yajxon nijawëty tii yë Wintsën tyunäämpyën mëët ëjts.

⁴Jëtu'un'äämpy ojts ja David jam ja tyeety tyaak tyajnëjkxy ma ja yajkutujkpën mëti'ipë ënä'ämpën jam Moab. Jam y'ijtë mapaat ja David jam yajpatyën ma tääpë mëj kajpnën.

⁵Ënät ja Gad, ja käjpxynyajxpë, ojts tkajpxtë'ëy ja David ets t'ënëmaay: Ka'ap y'oypyëtsëmëty ko yaa jeky m'itëty ma ya'atë mëj kajpnën. Paaty yam n'ënëëmë ets mtsoonëty ënätyë, nëjkx jam ma Judá y'itjotmën. Paatykyëjxm ojts yë David jam tsyoony ets ojts nyijkxy jam ma yuk'itën mëti'ipë xyëëwajtypyën Haret.

⁶Jam ënäty yë Saúl yajpaaty Guibeá, jam y'u'unyë ma ja tamarisco kepypya'tkën, winkon ma ja tsajptëjkën mëët ja tyiypyujxn kyë'ëkëjxm, aaktam yajpaatë ja tsyiptuunpë wintsëntëjkëty. E ko tnija'awëy ko ja David mëët ja jyä'äy tëë ënäty yaj'ixtë.

⁷Ënät t'ënëmaay ja tsiptuunpë wintsëntëjk: Miitsëty Benjamín yë jyä'äy, mëtowtë yajxon mëti'ipë yam ntuk'ënëëmëjantëpën: ¿Wä'än tääjën yë David mmo'ojëty yë mnaax mkamëtyë ets ënät näjyëtu'un mpëjkta'akëtëty tsiptuunpë wintsën ma kyutujktaknënë, tä tyam miits nmo'otënë?

⁸Tëkokyë miitsëty aak jëtu'unës n'ijxnë aak xymyëtsip'ajtëpës yowënë. Ni pënës të xykya'ëwaanë ko yë nmaankës tëë yë käjpxytyu'unën tuny mëët tapë Jesé myaank. Ni pën yowë ëjts xykyä'ëkjot'ajnë paatyës ka'ap të nyajtuk'ëwaanë ko yë nmaankës tëëjës xymyëtsiptsoony etsës yë njuukyajtën o'kënjëjp'am xypyëjktakë.

⁹Ënät ja Doeg yujk'ëtsooy, ja Edom ja'ay, mëti'ipë ënäty jam näjyëtu'un yajpatpë ma ja tsiptuunpëwintsëntëjkëtyën: Wintsën, ëjts tëëjës n'ixy ja Jesé ja myaank jam Nob, ko të tni'otsy yë teety Ahimélec, yë myaank yë Ahitub, ets mëët të kyäjpxy të myëtyä'äky.

¹⁰Yë Ahimélec tëë yë Wintsën tmëkäjpxy mëët ja David kyëjxm, tëë näjyëtu'un tmo'oy yë jë'kx pëky ets ja Goliat ja yenypyujxn.

¹¹Ënät ja yajkutujkpë tnikäjxëy ja teety Ahimélec ets tëkokyë ja teetytyëjkëty jampë ënäty yajpaatën Nob ets tëkokyë jënu'un mëët nyäjyiiky'at nyämyëku'uk'atëtën. Ko jam myiintaaytyë,

¹²tä ja Saúl t'ënëmaay: Mëtoow'it yajxon mijts Ahitub yë myaank mëti'ipë yam ntuk'ënëëmëjäämpyën. Nikajpx tii mnikäjpxäämpy Wintsën, tyamës nmëtoow'ity, jëtu'un yë Ahimélec y'ëtsooy:

¹³Tä ja Saúl tyajtëëy: ¿Wi'ix ko mijts mëët yë myaank yë Jesé xynyikäjpxytyunëtës? Tëë xymyo'oy yë tsajpkääky ets tu'uk yë yenypyujxn, ¿Këtiijë? ets tëë näjyëtu'un të Tios xymyëkäjpxy mëët yë'ëkyëjxm ¿këtii?, e tyam oytyës ënät maa xytyu'u'u'unyëty etsës xyaj'ooka'anëty tä tyam y'ëti'itsyën.

¹⁴Tä ja Ahimélec t'ëtsooy ja yajkutujkpë: ¿Wintsën, pën jëtää janty wintsë'ëkë m'ëk yaj'ijtëp ets janty'oy janty tsuj m'ëkmëtunyë ma nitëkokyë yë mtsiptuunpëwintsëntëjkën, ets aak'oy winë tuny ma kutujktaknën tä yë Davidjën?

¹⁵¿Tëkokëmës jëtää yam yë Tios nmëkajpxa'anyë mëët yë'ëkyëjxmë? Këtii jëtu'unpë winma'any xypyääty Wintsën. Paaty këtii nëkoo xynyiwaanpety ya'atë mtuunpë mëët yë jyiiky myëku'uk, jä'ä ko ëjts ka'apës nijawë jëtu'unpë winma'any.

¹⁶Ja yajkutujkpë ni'ikyë y'ënaan'ëtë'ëtsy: Tyam yajxon ntimy'ënëëmë mijts Ahimélec ko mijts ets tëkokyë yë m'u'unk m'ëna'k kopkpëky ko m'o'kta'atëty.

¹⁷Ënät ja yajkutujkpë t'ënëmaay ja tsiptuunpë mëti'ipë këwent'ajtëpën: Yaj'o'kta'atë tëkokyë yë teetytyëjkëty mëti'ipë yë Tios myëtuuntëpën. Jä'ä ko yë'ëjëty, David pyutëjkëtyëp, wa'ats nijawëtë ko yë'ë käk pujtp, e yë'ëjëty ka'ap xytyuk'ëwaanëtës. E ja tsiptuunpëty mëti'ipë ja yajkutujkpë kyëwent'ajtëpën ka'ap tnixajjë'ktë nëkoo ja teetytyëjkëty.

¹⁸Paaty ja yajkutujkpë t'ënëmaay ja Doeg, ja Edom ja'ay: Doeg, yaj'ook mijts. Ënät ja Doeg tjanty yaj'o'ktaay ja teetytyëjk, jä'ä xëëw jä'ä ja teetytyëjk y'o'ktë nitëkë'px mëkoxk, aaktam tnijän'atë ja efod.

¹⁹Ko jëtu'un yë Doeg t'ëkyaj'o'ktaay ja teetytyëjkëty, tä ojts jam nyijkxy Nob, ma teety kyukajpn'atën ets tyaj'o'ktaay ja to'oxytyëjkëty, ye'etyëjktëjk, pi'k ëna'këty ets ja mëti'ipë ënäty je'eyë myinyëmën naaxwiiny. Näy ots tyaj'o'kta'ay ja jëyujk, tsajpkaa ets tsajppax.

²⁰Ojts tu'uk myaank kye'eky ja Ahimélec, jä'ä xyëëwajtyp Abiatar, jam ojts pëyi'ikyë nyijkxy ma ja David ënäty jam yajpaatyën.

²¹Ets tuk'ëwa'anëy ko ja Saúl tëë ënäty tyaj'o'kta'ay ja teetytyëjkëty mëti'ipë myëtuuntëpën ja Wintsën.

²²Ets ja David y'ëtsooy: Jëtu'unës ënäty nmay ntajy jä'ä xëëw, komë tam'ajtp ënäty ja Doeg, kopkpëky ko t'ëwaanëja'any ja Saúl. Ëjts yë poky nmëët'ajtyp ko yë mjëëky mmëku'uk të y'o'kta'atë.

²³E këtiits mtsë'ëkë mjawë wë'ëm yaa mëët ëjts, jä'ä ko pën myaj'ookanëp, näjyëtu'unës xyaj'ooka'any. E ko yaa myajpaatëty mëët ëjts jotkujk m'itëty ets ka'ap tii mjatëtëty.