Read Biblia Mixe de Quetzaltepec 1 Samuel 26 Bible Online

1 Samuel 26 - Biblia Mixe de Quetzaltepec bible

1 Samuel 26

¹Ja ja'ayëty mëti'ipë jam kukajpnajtëpën Zif, ojts jam nyëjkxtë Guibeá ets ja Saúl t'ënëmaaytyë: Yë David tam ja yu'utsy yajpaaty ma ja nikopk txëëwatyën Haquila, ma mëët nyäwyinku'ixëtyën ja të'ëts'itjotm.

²Ënät ja Saúl poj'am tsyo'ony, mëët ja tsyiptuumpëtëjk nitëkëëk mil aakyë'ë mëti'ipë tsip'ixëtyën ets jotmëkëtyën jam ma Israel kajpnën, jam tnitso'ony ma ja it txëëwatyën Zif ets ja David t'ixta'aja'any.

³Jam jya'atäky tunkëjxm ma txëëwatyën Haquila, yë'ë mëët nyäwyinku'ixëty yë të'ëts'itjotmëtë. E jam të'ëts'itjotm, ma ja David ënäty jam yajpaatyën, ojts ënätyë tnijawë ko ënäty ja Saúl jampaat të pyanëjkxyë.

⁴Paaty ojts tkexy tu'uk mäjtsk ja ja'ay ets nëjkx t'ixtë tuntë mapaat ja Saúl ënäty të jyä'ty.

⁵Tä ja David näjyëtu'un kë'ëm tyimtsyo'ony ets ojts t'ixy ma ja Saúl të myaataknpëkyën ets ja Abner, yë myaank yë Ner, mëti'ipë ja Saúl ja tsyiptuunpëtëjk nyiwintsën'ajtypyën. Ënät t'ijxy ko ja Saúl itkujky jam myä'äy ma ja tsiptuunpëtëjkën.

⁶Tä ja David myëtyäky mëët ja Ahimélec ja Hit ja'ay ets mëët ja Abisai näjyëtu'un, yë myaank yë Sarvia, yë myëkä'äx yë Joab, ets tyajtëëy: ¿Pën xyjyämyëët'ataanpës ets nëjkxmëty jam ma Saúl yajpaatyën? Tääts ja Abisai y'ëtsooy: Tyam njämyëët'atëty Wintsën.

⁷Jä'ä tsu'um yë David ets Abisai jyënajktë ets ojts nyëjkxtë jam ma ënäty ja Saúl mëët ja tsyiptuunpëtëjk yajpaatën. Yë Saúl mëkmaap ënäty ets kyu'umën ja'ayë ojts nyätyukukapëty, naaxkëjxy tkujptäky. E yë Abner mëët ja tsyiptuunpëtëjk tyätymyaatëp näjyëtu'un, Abner yajnako'knääpy.

⁸Tä ja Absai t'ënëmaay ja David: David, yë Wintsën jëtu'un të tkë'ëyäky yë mmëtsip ma mijtsën. Mijts m'ëna'anëp etsës nyaj'ookëty, minës mëët yë kyë'ëmku'umën n'ëk tuknaaxmëtijë. Tu'ukyë je'eyë nyikë'ë ni'aaw.

⁹E ja David tyaa y'ëtsooy: Ka'ap, këtii xyaj'ookëty, jä'ä ko pën kyë'ënixäjpy ja mëj'ënä'ämpë mëti'ipë yë Wintsën kë'ëm të twin'ixyën, ka'ap yë'ë jëtu'unyë nyäyajna'ixëty.

¹⁰Yë Wintsën yë'ë kë'ëm nyija'ap jëna'a yë jyuukyajtën tpëjkëja'any, jäänëm yë yajnijawëty ko ënäty ja o'kën tyukja'tyë, ëkë ko ënäty jam y'ooky tyëkoy tsipjotm.

¹¹Yë Wintsën yë'ëjës xykyuwa'anëp ets ka'ap wi'ix ntunëtyës ja mëj'ënä'ämpë mëti'ipë yë'ë kë'ëm të twin'ixyën. Paaty yam n'ënëëmë ni'ik yi'iyë pëjkë'kë yë nyëë'a'ukëm ets kyu'umën tampë kyëpäjky tyaj'ityën.

¹²Tä ja David yi'iyë ojts tkäpy ja ku'umën ets ja nyëë'a'ukën ja Saúl jampë ënäty tyaj'ityën kyëpäjky ets ojts nyëjkxtë. Ni pën ojts kya'ixëtë ets kyamëtowëtë, ni pën ojts kyawijy ma ënäty jam të yajpaatën, jä'ä ko aak maatëp ënäty ja ja'ayëty; yë Wintsën yë'ë ojts kë'ëm t'ëwa'atsy ets ja ja'ayëty myaatëkooytya'atëty.

¹³Tä ja David ojts nyijkxy, ojts ja joy'it tuknajxta'ay ets jamtsow ojts nyäxy, tääts jam kyuwa'këy tunkëjxm jëkäm. Ja David mëët ja Saúl këjää ënäty nyämyëjëkäm'atëtë.

¹⁴Tä ja David jam yaxkeky ets ojts tmëkäjpxy ja Abner ets ja tsiptuunpëtëjkëty: Abner, mijts yam nmëkäjpxyp, ëtsoowkës. Tä ja Abner y'ëtsoy: ¿Tim pënmës mtimnyäjya'awënë ets nëkoo xymyëjya'ax xymyëjokëty ja mëj'ënä'ämpë?

¹⁵Tä ja David y'ënëmaayë: ¿Këtiitën myijtsëtyë mëti'ipë ja'ay tyijtëpën ko ka'ap ni pën mëpaatëtëtyë? ¿Wi'ix'äämpyën ënät tyam ko ka'ap oy xykyëwent'aty ja mëj'ënä'ämpë? Ni'ik ka'ap të xyjyawë ets ka'ap të xy'ixy ko tu'uk ja ja'ay jam të tyëkë ma miitsëtyën ets ja mëj'ënä'ämpë të tjayaj'ooka'any.

¹⁶Ka'ap y'oyëty ko mijts jëtu'un m'ëtë'ëtsy, tyam yajxon n'ënëëmëty ko njanitëjkëtyëp jeexyë m'ooktë, ix ka'ap xykyëwent'atë oy ja mëj'ënä'ämpë mëti'ipë ja Wintsën kë'ëm të twin'ixyën. Ixta'a tyam ja kyu'umën ets ja nyëë'a'ukën mëti'ipë yaj'ijtypyën jam pyë'am ets xy'ixëty pën mpatyp.

¹⁷Ko ja Saúl tmëtoowkujkëy ko jä'ä ja David kajpxp, tääts yujk'ënany: ¿Këtiitën myijtsëtyë David, u'unk maay mëti'ipë kajpxpënë? Tä ja David y'ëtsooy: Jëtu'un Wintsën, ëjts jëtu'un.

¹⁸E yë'ëtsës tyam nyajtëëpy ¿wi'ix ko yë mëj'ënä'ämpë xy'ixëtity xypyajëtityës? ¿Tiijës të ntuuntëkoy? ¿Maajës ja npoky mëti'ipës nkujajtëpën?

¹⁹Mëyajtënës yam npëjktsoopy yë mëj'ënä'ämpë ets tmëtowëty mëti'ipës yam nkajpxäämpyën. Pën yë'ë jëtu'un yë Wintsën të tyajkutuky etsës yë mëj'ënä'ämpë xy'ixjëtit xypyajëtitëty, yë'ë y'ëxajëp ko ënäty ja wyintsë'kën myo'oyë. E pën kë'ëmts jëtu'un twinma'any'äty, yë Wintsën pokëtëp yë'ë. Jä'ä ko tëëjës nyaj'ëxwojp nyaj'ixkäjxnë ma ya'atë it naaxwiinyëtën mëti'ipë yë Wintsën jyä'ä'ajtypyën etsës jam të xynyaswopëtë ma ka'ap tsyipëtyën etsës ja wiink tios n'ëwtajnëty.

²⁰Ëjts ka'apës njatsoky etsës ja njot ne'pny jëkäm yajtäm yajjä'ätsëty ma ja Wintsën ka'ap tnijawëtyën. E yë mëj'ënä'ämpë ooky timy ixa'any ya'atë pixk, jëtu'unës xy'ixjëtity xypyajëtity tä jeexyë tii të tyajtëkoyën.

²¹Tä ja Saúl y'ënäny: U'unk maay David, tyamës ok näjya'awëy'ityë ko pokyës ntuunpy. Jëtu'unës ëjts n'ëtë'ëtsy tä ja'ay winma'anytyukpën, ka'apës tii oy ntuny. E tyamtsës npëjktsoy ets mwinpitëty. Ëjts ka'apës yam mijts n'ëk'ixjëtitan n'ëkpajëtitanë, jä'ä ko tëëjës yë njuukyajtën xynyimä'kxë.

²²Ënät ja David y'ënäny: Tyaa ja Wintsën ja kyu'umën, wä'än tniminy tu'uk ja mtuunpë ets tkapëty.

²³Ets Wintsën yë'ë kë'ëm y'ixëp pën oy në'ëye'eyp tu'uye'epy ets pën mëtëy winë tyuunpy. Yë Wintsën tëë tyam tjapëjktä'äky ëjts nkë'ëjotmës ja mëj'ënä'ämpë etsës jeexyë të nyaj'ooky të nyajtëkoy, ëjts ka'apës ja ëxëëk winma'any jëtu'un të npaaty, etsës nyaj'ook nyajtëkoyëty ja mëj'ënä'ämpë mëti'ipë ja Wintsën kë'ëm të twin'ixyën.

²⁴E jëtu'un tääjës tyam të nwinkutsë'ëkën ja jyuukyajtën ja mëj'ënä'ämpë, näjyëtu'unës njatsoky yë Wintsën xyajtso'okëtyës ja njuukyajtën ets xkyëwent'atëtyës ma ja kutsë'ëkëtuuypyën.

²⁵Tä ja Saúl mëk yujk'ënany: Tios mkënu'kxëtëp David, u'unk maay. Mijts mëj këjää nëjkx winë xytyuny ets oy winë mwinpëtsë'ëm njëjpëtsë'ëmxëtëty. Tä ojts ja Saúl wyimpijnë ma tyëjkën ets ja David ja tyu'u jatëkok tpëjky.