Read Biblia Mixe de Quetzaltepec 1 Samuel 29 Bible Online

1 Samuel 29 - Biblia Mixe de Quetzaltepec bible

1 Samuel 29

¹Ja filistejë ja'ayëty wa'ats nyäy'ijxmujktaayëtë jam Afec. E yë Israel ja'ayëty jam ojts jyajta'aktë ma tu'uk ja nëëwookyën, ma txëëwatyën Jezreel.

²Ko ja filistejë kopktëjkëty ënäty nyëjkxtë wääpy, ja David mëët ja jyä'äy myintë jëxkë'ptsow mëët ja Aquis.

³Ko ja kopktëjk jëtu'un t'ijxtë ënät tyajtëëwtë ja Aquis: ¿Ya'atë hebreo ja'ayëty tii yaa tyuuntëp? Tä ja Aquis y'ëtsooy: Ya'atë, David xyëëwajtyp mëti'ipë ijty mëët jyëtityën yë Saúl, yë mëj'ënä'ämpë jampë ma Israel kajpnën, yë'ëjëty tëë yaa kanaak jëmëjt y'ijnëtë mëët ëjts, e yë'ë maju'unëm xynyiminyësën oy yë jyot wyinma'any të tyajkëxë'ëky.

⁴Ënät ja filistejë ja'ayëty mëti'ipë kopktëjkëtyën ojts ja Aquis tukjoot'anpëktë ets t'ënëmaaytyë: Käx ma ja y'ijtakn të xymyo'oyën, ëëtsëty ka'apës ntsoktë ets nyëjkxtëty tsiptuunpë mëët ëëtsajtëm, këtiipë ja mmëtsip y'ëk'awinpijtnëtëty ma ënäty jam ntsipjëtu'unëmën. Jëtu'un nëjkx oy nyäyajwë'ëmyë ma ja wyintsënën ko ënäty mäjtsk tëkëëk ja ntsiptuunpë'ajtëm tyaj'ooky.

⁵Yë'ë ya'atë David ijty yajkuuy'ëëp ko y'ätstë: Tu'kmil yë Saúl të tyaj'ooky yë myëtsip ets David majk mil.

⁶Paatykyëjxm yë Aquis ojts tmëkäjpxy yë David ets t'ënëmaay: Timjëtu'un ijxtëm tyiyajtënëtyën ko yë Wintsën jyuukyëty, mijts oy yë jot winma'any të xyajkëxë'ëky mëët ëëtsëty. Ets ëjts janty oyës n'ixy njawë wi'ix mijts winë xytyunyën ma yaa ijtakn y'ityën. Ka'ap ma tii ma'at n'ixyës ma ju'unën yaa mijts xynyiminyës. E tyam mijts yajxon n'ënëëmëty ko yë kopktëjkëty ka'ap m'oyjawëty.

⁷Paaty, ni'ik oy ko mwinpitëty, nëjkx akujk jotkujk, këtiipë tii twiinkjawëtëty tääpë ja'ayëty.

⁸Tä ja David ojts y'ëtsoy: ¿Tiixë ënät tyam të ntuuntëkoyës? ¿Ëkë tiijën ja mëj'ënä'ämpë të t'ijxma'aty ma ëjtsën maju'unëmës yaa n'ityën, paaty ka'ap tkupëky etsës ntsiptunëty mëët ja myëtsiptëjk?

⁹Tä ja Aquis y'ëtsoowinpijty: Ëjts wa'atsës nijawë ko mijts ka'ap tii të xytyuuntëkoy tä tu'uk yë Wintsën yë kyukäjpxyën, je'eyëp ko yë filistejë kopktëjkëty ka'ap tsoktë ets mijts mnëjkxëty tsiptuunpë mëët ëëtsëty.

¹⁰Paaty yam nmëpëjktsoy ets mijts mëët yë mja'ay mwinpitëty, jëpom jopy ko ënäty xyiinytyä'äky, tääts mtu'upëktëty.

¹¹Jëtu'un'äämpy yë David mëët yë jyä'äy ojts komjëpom tsyoontë ko xyiinytyäky, nyëjkxnëtë jatëkok ma ja filistejë ja'ayëty ja nyaax kyajpnëtyën, e ja filistejë ja'ayëty ojts ja nyëjkxtë jamtsow Jezreel.