Read Biblia Mixe de Quetzaltepec 1 Samuel 3 Bible Online

1 Samuel 3 - Biblia Mixe de Quetzaltepec bible

1 Samuel 3

¹Ja Samuel janty'oy ijty ja Wintsën tmëtuny jam ma kyë'ë'am'atyën ja Eli. Jä'ä jëmëjt ka'ap ënäty nëkooyë pën ja Wintsën tuknijawë ja y'aaw y'ayuk ets ka'ap nëkooyë pën wyinkuma'ay ëkë t'ixy tnijawë kuma'ayjoty mëti'ipë ja Wintsën tyunäämpyën.

²E tu'kxëëw tu'kjëmëjtëty ma ënäty yë Eli tëë y'ijxën myoonën, jap ënäty myä'äy ma ja tyëjkën.

³Yë Samuel jap ënäty myä'äy ma ja Tios ja jyëën tyëjkën winkon ma y'ityën ja kaaxë mëti'ipë yë Tios jyä'ä'ajtypyën ets ma ja jëën tyi'kxyën.

⁴Ënät ojts myëkäjpxyë ja Wintsën: Samuel. Tyaajës, jëtu'un y'ëtsooy.

⁵Ënät ojts pëyi'ikyë nyijkxy ma jap ja Eli myä'äyën ets t'ënëmaay: Tyaajës Wintsën. ¿Tiis ko xymyëkäjpxy? Ka'ap pën mëkäjpxyë, jëtu'un y'ëtsooy ja Eli. Nëjkx jatëkok ma maataknën. Tä ojts jatëkok nyäkyo'okyë.

⁶E ja Wintsën ojts jatëkok tmëkäjpxy ja Samuel: Samuel. Yë Samuel pëyi'ikyë jatëkok pyëti'ky ets ojts nyijkxy ma ja Eli myä'äyën, tä t'ënëmaay: Tyaajës wintsën ¿Tiijës ko xymyëkäjpxy. U'unk, ka'ap pën mëkäjpxyë, jëtu'un y'ëtsooy ja Eli, nëjkx ma mmaataknën.

⁷Yë Samuel ka'anëm ënäty nijëna'a yë Wintsën t'ixynyën, jä'ä ko ka'ap ënäty jëtu'un nyänyikëxë'ëkyënëm.

⁸Ënät ja Wintsën ojts jatëkok tmëkajpxkojnëpë ja Samuel, jä'ä ja mëtëkëëk'okpë. Ënät pyëti'ky ënätyë ets ojts jap nyijkxy ma ja Eli myä'äyën, tää t'ënëmaay: Tyaajës nminy Wintsën, ¿Tiijës ko xymyëkäjpxy? Tää ja Eli twinja'awëy ko ja Wintsën Tios ënäty mëkajpxëp ja Samuel.

⁹Ënät t'ënëmaay: Nëjkx mnäkyo'okyë; pën mëkajpxëp jatëkok yë Wintsën, tyaa xy'ëtsowëty: Nikajpx Wintsën tyamës nmëtoow'ity. Tä ja Samuel ojts nyijkxy ma ja myaataknën ets nyäkyo'kë jatëkok.

¹⁰Ënät jatëkok ja Wintsën myiiny ets ojts tmëkäjpxy ja Samuel. Samuel, Samuel. Kajpx, Wintsën, tyamës nmëtoow'ity. Jëtu'un y'ëtsooy yë Samuel.

¹¹Ets ja Wintsën y'ënäny: Ëjts yë'ëjës yam nikajpxäämpy mëti'ipës ntunäämpyën ma Israel kajpnën, mëk ja aaw ayuk yajmëtoy mëti'ipës nikajpxäämpyën.

¹²Ko ënäty jëtu'un ja xëëw jëmëjt jyä'ty, jëtu'unës nëjkx winë ntuny tääjës të nikäjpxyën mëëtpë yë Eli y'u'unk tyo'oxytyëjk.

¹³Tëës ntuk'ëwaanë ko ntëytyunäämpyës yë y'u'unk tyo'oxytyëjk, mëët ja nëë poky mëti'ipë tyuuntëpën; jä'ä ko ja y'u'unk y'ëna'k ëxëëkjatyës të xytyijtë ets yë'ë ka'ap tuk'ojy.

¹⁴Paatyës yajxon ntimkyajpxwë'ëmy mëëtpë yë Eli y'u'unk tyo'oxytyëjk, ko yë nyëë pyokyëty ka'ap nijëna'a nimä'kxëtyës, oyxyëp tjayajktëpë kanaak yë wintsë'kën.

¹⁵Ko kyajpxtaay ja Wintsën, ënät ojts ja Samuel jatëkok nyäkyo'okyë, jëtu'un ojts xyinyënë, jopyëp ojts tyaj'ëwatskojy yë Samuel ja tëjk'akë'ë ma ja tsajptëjkën. Samuel tsë'këp jä'ä, ka'ap tukmëmëtya'aka'any ja Eli mëti'ipë të t'ijxyën kuma'ayjoty.

¹⁶E ja Eli ojts wyoowtsoyë ets y'ënëmaayë: Samuel, u'unk maay. Tyaa jä'ä Wintsën, jëtu'un ja Samuel y'ëtsooy.

¹⁷Ets ja Eli yajtëëwë: ¿Wi'ix yë Wintsën të m'ënë'ëmxëty? Tun yë mëyajtën tuk'ëwa'anëkës, këtii xykyuyu'utsy. Yë Tios mtëytyunëtëp yë'ë pën mijts mkuyu'tsyp mëti'ipë yë'ë të mtuk'ëwa'axëtyën.

¹⁸Ënät ja Samuel tyëjkëy mëtyakpë, wa'ats tuk'ëwa'anëtyääy ja Eli. Ets ja Eli y'ënäny: Tios yë'ë Wintsënajtp. Wa'ats ttuny mëti'ipë yë'ë y'oyjya'apën.

¹⁹Samuel ojts oy tsuj yeeky pyety ets xëmë ojts oy winë tuny tä ënäty ja Tios tsokyën, ets jëtu'un tä ënäty të twaantä'äkyën winë.

²⁰Tu'kë'ëyë ja naax kajpy jampë yajpaatën ma Dan y'itjotmën ets ma txëëwatyën Beerseba ojts tnijawëtë ko yë Samuel yë'ë ënäty tu'uk mëj Tios mëtuunpë mëti'ipë nyikajpxëpën ja Wintsën ja y'aaw y'ayuk jëwyiin jëyëjp.

²¹Ënät jatëkok ojts ja Wintsën nyänyikëxë'ëkyë ma ja Samuelën jam Siló, jä'ä ko jam ënäty ja it naaxwiinyëtë të twin'ixy ets ja Samuel tuknijawë ja y'aaw y'ayuk.