Read Biblia Mixe de Quetzaltepec 1 Samuel 30 Bible Online

1 Samuel 30 - Biblia Mixe de Quetzaltepec bible

1 Samuel 30

¹Kom tëkëëk xëëw yë David jam jyajtë Siclag, ënät tuk'ijxpäjtë ko ja Amalec ja'ayëty tëëtëm ja Négueb kajpn tniwa'kta'atë ets ja Siclag tëë tnitëkëtë ets të tno'oktë.

²Ojts tsuumta'atë ja to'oxytyëjkëty, pi'k ëna'këty ets ja mëjja'aytyëjkëty, je'eyëp ko je'eyë ojts tmënëjkxtë, ka'ap tjayaj'o'ktë.

³Ko ja David jam jyä'äjty kajpnjotm mëët ja jyä'äy ets t'ijxtë ko tëë ja naax kajpn yajno'oky ets ja tyo'oxytyëjkëty mëët ja y'u'unk y'ëna'këty tëë yajmënëjkxtë.

⁴Tääts tyëjkëtyë jëëpyë yaxpë.

⁵Ets näjyëtu'un ja David ja tyo'oxytyëjk mëti'ipë xyëëwajtypyën Ahinóam, jampë kyukajpnëtyën Jezreel ets ja Abigail, ja Nabal ja kyu'ookytyo'oxy, jampë kyukajpnëtyën Carmel, nän tëë ënäty yajmënëjkxtë tsumy matsy.

⁶David ojts wäänjaty tsyë'ëkë, jä'ä ko yë'ë ojts ja ja'ay tyukjoot'anpëkyë ko ënäty jëtu'un të jyatë kyëpätë ja y'u'unk tyo'oxytyëjkëty. E ja David ojts ja jyot wyinma'any tmëktuny ets tu'ukyë ja Wintsën tuk'ijxpejty.

⁷Tä t'ënëmaay ja teety Abiatar, ja myaank ja Ahimélec: Tun yë mëyajtën yajminy ja efod. Ko ja Abiatar jam tmëmiiny ja efod ma ja Davidjën,

⁸tääts ja David tyajtëëy: ¿Oypyëtsëmëp Koojës nëjkx n'ijxjëtity npajëtity tääpë mä'tspëtyë? ¿Mëta'akëpës jëtääjë ets naspaatëpësë? Ets ja Wintsën y'ëtsooy: Panëjkx ets xynyajtspaatëty ets yajtso'ok ja tsumjyä'äytyëjkëty.

⁹Ënät ja David tsyo'ony mëët nitëtujk mëko'px ja jyä'äy, tä jyajtë jam Besor.

¹⁰Jamts ojts wyë'ëmtë nimäjtsk mëko'px ja ja'ayëty mëti'ipë ënäty yajxon të y'ënu'kxëtën ets ka'ap y'ëkmëtaknëtë tuknaxtëty ja wokjot, je'eyë ojts nimajktaxk mëko'px ja David tjaak panëjkxtë.

¹¹Kom ok jam tpatë joyjyotm tu'uk yë Egiptë ja'ay, tëë ënäty tyu'utëkoy ets ojts tukninëjkxtë ja David; je'eyëp ko jëyëjp ojts tyajkaytyë ets tyajnëë'uuktë.

¹²Yë'ë myooytyë tu'uk yë tsajpmokääky, jap kääkyjoty yë'ë jap yë tsatsym tyë'ëts y'apëjkëtyë. Tääts ja Egiptë ja'ay myëjaawpëjky jatëkok, tëkëëk xëëw tëkëëk tsu'um ënäty ka'ap të kyäy ets ka'ap të nyëë'uuky.

¹³Tä ja David yajtëëwë: ¿Pën mwintsën'ajtyp? ¿Maa mtsoony? Tä ja Egiptë ja'ay y'ëtsooy: Egiptë ja'ayës ëjts, jamës nmëtuny ma tu'uk yë Amalec ja'ayën, e pa'amës të xytyukja'ty tyëkëëkxëëwëp täätsës ja nwintsën të xy'ëxmajtsnë.

¹⁴Jamës ënäty ojts të nmäätstë apa'tkë'ëmtsow ma Queret ja'ay tnitänëtën ets Judá ja'ayëty ets Caleb ja'ayëty, tëëjës näjyëtu'un nino'oktë yë Siclag kajpn.

¹⁵¿Oyës jam xywoownëjkxëty ma tääpë mä'tspë yajpaatanë? Jëtu'un ja David tyajtëëy. E ja Egiptë ja'ay tyaa ja y'ëtsooy: Tyam nwoownëjkxëty je'eyëp ko ënät pën ka'apës xykyë'ëyäky maas yë nwintsënën ets näjyëtu'un pën ka'ap mijts xyaj'ookyës.

¹⁶Ets ojts tjantywyoownëjkxy jam ma ënäty tääpë ja mä'tspë yajpaatën. Xity ko'ow ënäty të nyätyuunta'ajëtë jam kamjotm. Je'eyë jam kyääynyëtë pyëjknëtë ets y'uknëtë pyëjknëtë, tukxëëwtuntë ko ënäty ojts të myäätstë jam ma ja filistejë ja'ay ja kyajpnëtyën ets ma ja Judá kajpn näjyëtu'un tnitänën.

¹⁷Tä ja David tukja'ajty jam jopyëp. Tu'kxëëw mëët yajxon tsyiptuuntë koonëm tyajnaax'o'ktaaytyë, yi'iyë ojts ka'ap tyaj'ooktë mëti'ipë käktën jëyujkjëku'uxkëjxm, jä'ä y'ijtë nimajktaxk mëko'pxën.

¹⁸David ojts jatëkok tpata'ay mëti'ipë ënäty ja Amalec ja'ay të tmäätstën, ojts näjyëtu'un tyajtso'oky ja nimäjtskpë ja tyo'oxytyëjk.

¹⁹Ka'ap ojts tii tyëkoy'ity, ja to'oxytyëjkëty, pi'k ëna'këty ets ja mëjja'aytyëjkëty, kä'pxy ja David jatëkok tpataay.

²⁰Ojts ja David näjyëtu'un may tpaaty ja tsajppax, kupixyny, jëyujk tsajpkaa ets mëti'ipë wyojppëtsëëmtën ja jëyujk tsajpkaa tyaa ojts y'ëna'antë ko yë'ë ja David myëju'uny'äjtyp.

²¹Ko ja David jyä'äjty jam ma ja nimäjtskmëko'pxpë ja jyä'äy të wyë'ëmtën mëti'ipë ënäty të y'ënu'kxëtën ets ka'ap ojts jyämyëët'atëtë, ënät nyipëtsëëmëtë ets ojts jyëjpye'eyë'ëkëtë. Ko ja David jëtu'un t'ijxy tääts ojts tkajpxpo'kxta'ay.

²²E mëti'ipë ënäty ka'ap y'oyëtyën ja jyot wyinma'any, tä y'ënantë: mëti'ipë ka'ap të y'otstën tsiptuunpë ka'ap tii nyitëkëty yajmo'otëty mëti'ipë të nitsiptu'unëmën. Yi'iyë mëpaat yajmo'otë yë y'u'unk y'ëna'këty ets tyo'oxytyëjkëty, ko wäänë myëjaawpëktëty tääts nyëjkxtëty.

²³E ja David tyaa ja y'ëtsooy: Këtii jëtu'unpë ja jot winma'any xypyaatë jëëkyëty mëku'ukëty. Ëëtsajtëm ma winë të npat të n'ijxëmën ets ko ja tsip të ntuknajxëmë, Tios jëtu'un mëj këjää të xypya'ëyo'owëmë. Paaty ja njuukyajtën'ajtëm ka'ap wi'ix të jyäty të kyëpety ets tääpë ja mä'tspëtëjk ëxëëk të ntu'unëmë mëti'ipë ënäty ëxëëk näjyëtu'un të xytyu'unëmën.

²⁴Mëti'ipë mnikajpxtëpën ka'ap pën t'oymyëtoy, jä'ä ko jëtu'un tä winë pyäätyën mëti'ipë ojts të tsyiptunyën, näjyëtu'un winë pyäätyë mëti'ipë të wyë'ëmtën xuumykwent'ajtpë.

²⁵Jä'ä xëëw ojts jëtu'unpë tsyo'ontä'äky jam ma ja Israel ja'ayëtyën, ko tu'knax winë nyätyukpaatëtë ets tyampaat je'eyëm jëtu'un tyu'uye'ey.

²⁶Ko ja David jyä'äjty jam Siclag, ënät ja myëku'uktëjk tuknikejxy ja näynyamo'ojë, ja mëjja'aytyëjkëty jampë yajpaatën ma Judá kajpnën, mëët ya'atë ja aaw ayuk: Jëëkyëty mëku'ukëty, tyaa ya'atë wäänë nmo'otë nkäxtë mëti'ipës të npëjkëtën ja Wintsën ja myëtsip.

²⁷Ojts näjyëtu'un tuknikexy ja näynyamo'ojë ja myëku'uktëjk mëti'ipë jam yajpatëpën Betel, Ramot ma Négueb y'itjotmën, jam Jatir,

²⁸jam Aroer, Sifmot, Estemoa,

²⁹jam Racal, näjyëtu'un ma ja myëku'uktëjkëtyën mëti'ipë jam ijtëpën ma ja naax kajpn yajtijtën Jerahmeel, ma ja quenitëja'ay tsyëënëtën,

³⁰jam Hormá näjyëtu'un, jam Corasán, jam Atac,

³¹jam Hebrón ets maajaty jyëtijtën mëët ja jyä'äy.