Read Biblia Mixe de Quetzaltepec 1 Samuel 4 Bible Online

1 Samuel 4 - Biblia Mixe de Quetzaltepec bible

1 Samuel 4

¹Ok ja Samuel tuknija'awëy ja naax kajpn tä ënäty ja Wintsën të y'ënë'ëmxëtën. Jä'ä xëëw jä'ä jëmëjt ojts yë filistejë ja'ayëty tuknipëjktaakëtë ets tsyiptuna'antë mëët yë Israel ja'ayëty. Yë Israel ja'ayëty ojts näjyëtu'un tniwinmayëtë ja tsip, paaty ojts jam nyëjkxtë ma tu'uk yë it naaxwiinyëtë txëëwatyën Eben-ézer, tyam ja filistejë ja'ayëty jam ënäty të jyajta'aktë ma txëëwatyën Afec.

²Jam ja filistejë ja'ayëty tnitsoontë ja Israel ja'ayëty ets mëët tyëjkëtyë tsiptuunpë. Yë filistejë ja'ayëty yë'ë ojts myëta'aktë, jä'ä y'o'ktë yë Israel ja'ayëty nimajktaxk mil jam tsipjotm.

³Ko yë Israel ja'ayëty jam wyimpijtë ma jyajta'aktën, ënät ja mëjja'aytyëjk y'ënantë: ¿Tii ko yë Wintsën të t'ëwa'atsy ets tyam o'ktëy njajtmëty ma filistejë ja'ayëtyën? Ja'amtë nyajtso'onëmë yë kaaxë jam Siló mëti'ipë ja käjpxytyu'unën myë'ijtypyën mëti'ipë ja Wintsën jyä'ä'ajtypyën. Yë'ë itkujky nyajnëjkxmëp ets xykyuwa'anmëty ma ja nmëtsip'ajtëmën.

⁴Ënät ja Israel ja'ayëty tkäjxtë ja tsiptuunpë nikanaak jam Siló ets tyajmintëty ja kaaxë mëti'ipë ja käjpxytyu'unën myë'ijtypyën mëti'ipë ja Wintsën, mëti'ipë maaytyääyëpën jyä'ä'ajtypyën. Jam ënäty yajpaaty itkujky ma ja Wintsën ja kyukäjpxy y'itën mëti'ipë xyëëwajtëpën querupines. Ojts myintë ja Ofní ets ja Finees, ja nimäjtskpë ja myaank ja Eli, jä'ä pyamiintë ja Tios ja kyaaxë mëti'ipë ja käjpxytyu'unën myë'ijtypyën.

⁵Ënät ko jam jyä'äjty ja Wintsën ja kyaaxë mëti'ipë ja käjpxtyu'unën myë'ijtypyën, ja Israel ja'ayëty ënät tyëjkëtyë yaxpë jojkpë ets janty mëk ja naax tsyëyuuypyijky.

⁶Ko ja filistejë ja'ayëty tmëtoowtë jëtu'un ja Israel ja'ayëty tyäty ya'ax tyäty jyoktë, ënät y'ënantë: ¿Wi'ix ko nëkoo ja'ay yaxnëtë jyojknëtë ma hebreo ja'ayëtyën? E ko tnija'awëtyë ko ja Tios ja kyaaxë ënäty të jyä'ty jam ma ja hebreo ja'ayëtyën.

⁷Ënät ja tsë'ëkë tyuktëjkëtyë ets y'ënantë: Yë Tios yë'ë jam të jyä'ty, ëëtsajtëm tëë nitujkëmë, ka'ap nijëna'a jëtu'un jyäty kyëpetynyën ma ëëtsajtëmën.

⁸¿Tii ënät ntuuntakmëp? ¿Pën ënät xyajtsokmëp ko jam nka'amëty Tios kyë'ë'am mëti'ipë maaytyääyëpën winë? Wa'ats nija'awëmë ko yë'ë ojts tyaj'o'kta'ay tëkokyë yë Egiptë ja'ayëty jam të'ëts'itjotm mëët ja kanaaknaxpë ja pa'am ëyo'on.

⁹Paaty tyam tsojk amëk jotmëk näpyëjktakëmë, pëjkë'ëktë yë ntuunpäjnëty mëti'ipë mëtsiptuuntëpën, tsojk ntsipjëtu'unëmë amëjaaw ma nxëëw'ajtëmën filistejë ja'ay. Këtiipë jëna'a yë xytyuunpë'ajtmëty yë hebreo ja'ayëty jëtu'un tä yë'ëjëtyën jeky të yajpaatën ma ëëtsajtëmën.

¹⁰Ënät ja filistejë ja'ayëty tyëjkëtyë tsiptuunpë mëët ja Israel ja'ayëty, ja filistejë ja'ayëty yë'ë ojts myëtakojnëtëpë; ja Israel ja'ayëty jëtu'unyë ja kyäktaaytyë ets nyëjkxtaaytyë ma ënäty y'ijta'aktën. Nimay yajxon ja ja'ay y'o'ktë jä'ä xëëw. Mëti'ipë naaxkëjxy tsiptuuntën ja Israel ja'ayëty, jä'ä y'o'ktë ni''i'px majk mil.

¹¹Ojts näjyëtu'un tjä'äpëktë ja Tios ja kyaaxë ets tyaj'o'ktë näjyëtu'un ja Ofní ets Finees mëti'ipë myaank'ajtypyën ja Eli.

¹²E ojts tu'uk oywyi'ix jyaakke'eky jam tsipjotm, yë jyä'äy yë Benjamín ets pëyi'ikyë jyä'äjty jam Siló, jä'ä xëëw, nikëëts ixkëëts jyä'äjty ets ninaax ëxnaax.

¹³Ko jam jyä'äjty, yë Eli jam ënäty y'u'unyë tsajptëjk ëkë'ëm ma tu'uk yë mëj sillën, yë kyëwen'ajtyp ja në'ë tu'u, jä'ä ko janty määpy janty tajp ënäty mëëtpë ja Tios ja kyaaxë. Ko tääpë ja tsiptuunpë tuk'ëwa'anëy ja naax kajpn mëti'ipë ënäty të tyuny të jyätyën, ënät ja ja'ayëty ojts tyëkëtë yaxpë jojkpë jampë tsyëënëtën.

¹⁴Ko ja Eli tmëtooy ja ja'ay tyäty ya'ax tyäty jyoktë, tä tyajtëëy: ¿Tiitën ko ja'ay yaxtëpë jyojktëpë? Ënät tääpë ja ja'ay ojts pëyi'ikyë nyijkxy ma ja Eli yajpaatyën ets tuk'ëwa'anëy.

¹⁵Eli jä'ä ënäty ja jyëmëjnë majkta'px majkmokx tëkëëk ets ka'ap ënäty y'ëk'ijxnë.

¹⁶Tääts ja ja'ay y'ënëmaayë: Ëjts jamës tyam ntsoony tsipjotm, oyës wi'ix të njaakke'eky. ¿E wi'ixts jam të xy'ixy winë u'unk maay? Jëtu'un tyajtëëy ja Eli.

¹⁷Tääts ja ja'ay y'ënëmaayë: Tëë ja Israel ja'ayëty kyäkta'atë ets janty may yë ja'ay të y'ëk'o'knëtë, tëë y'ooktë nimäjtsk ja mmaank Hofní ets Finees, ets näy tëë ja filistejë ja'ayëty tmënëjkxtë ja Tios ja kyaaxë.

¹⁸Tim je'eyë ojts tnikäjpxy ja ja'ay ja Tios ja kyaaxë, jëtu'unyë yë Eli tsyajpënë'ka'tsy jam tëjkwinm, e komë tëë ënäty myëjja'ayënë ets je'emty yajxon. Jëtu'unyë ojts ja jyëwiits tyimtëjtuky ets y'o'ky. Jä'ä ënät të tyuny teety jam ma Israel kajpnën wëxtyikxy jëmëjt.

¹⁹Ja xyä'kxy mëti'ipë yë Finees tyo'oxytyëjk'ajtypyën, u'unk mëët ënäty yajpaaty, ko tmëtoowpaty tëë ja Tios ja kyaaxë yajmënëjkxy ets ko tëë ja tyeety myë't y'ooky ets ja nyiye'etyëjk, ënät ja jyotmay ni'ikyë myëjtäky ets ja pëjkën ato'onën tmënajxy tyajnajxy koonëm ja y'u'unk naaxwiiny jyä'äjty.

²⁰E ko t'ijxtë ja to'oxytyëjkëty ko mëpaatëp y'o'knë, ënät t'ënëmaaytyë: Këtii mtsë'ëkë mjawë, ye'etyëjk m'u'unk'ajtypy. Yë'ë ka'ap y'ëtsooy ets ka'ap tuuny këwentë.

²¹Ets tyajxëëwpejty ja myaank Icabod, jä'ä ko tyaa y'ënäny: Yë Israel jëtu'unyë të wyi'imy mëj'ajtëntuk, jä'ä ko tëë yajpëjkëtë ja Tios ja kyaaxë. Mëët ko jëtu'un y'ënäny, jä'ä ënäty tyijpy ko ja Tios ja kyaaxë wiink ja'ay të myënëjkxyë, ko ja tyeety myë't të y'ooky ets ko ja nyiye'etyëjk ënäty näjyëtu'un të y'ooky.