Read Biblia Mixe de Quetzaltepec 1 Samuel 9 Bible Online

1 Samuel 9 - Biblia Mixe de Quetzaltepec bible

1 Samuel 9

¹Ma ja Benjamín ja jyä'äyën, jam ijty tu'uk yë ja'ay txëëwaty Quis, yë'ë myaank yë Abiel ets y'ok'u'unk yë Seror. Yë tyeety yë tyatwelë jä'ä ijty xyëëwajtyp Becorat; yë'ë myaank yë Afíah. Yë Quis mëj'äämpy ijty yë ja'ay yaj'ityë ets aak wiinkutsë'këyëp oypyënëty.

²Tam ijty tu'uk yë myaank pi'k ëna'kpë ets janty'oy yaj'ixy, jä'ä txëëwaty Saúl. Ni pën ënäty jam Israel jëtu'un janty'oy kyakëxë'ëky tä yë'ëjën, janty yeny ijty tyänë ni pën t'ëwtajnëty.

³Tu'kxëëw tu'kjëmëjt ojts tyëkooytyëpë ja Quis ja kyërukts. Ënät t'ënëmaay ja myaank Saúl: Nänyipëjktaakët ets nëjkx yë krukts xy'ixta'ay, mpawowëp tu'uk yë mtuunpë.

⁴Ënät ja Saúl tsyo'ony ets tuknajxtaay ja tunjot kopkjoty mëti'ipë ja Efraín nyitënääpyën, nyajxë'ky jam ma ja it naaxwiinyëtë txëëwatyën Salisá, e ja kyërukts ka'ap tpaty. Ojts näjyëtu'un jam jyajëtity ma ja it naaxwiinyëtën mëti'ipë yë Benjamín nyitënääpyën, ja kyërukts kä'äpyëm tpaty.

⁵Ko jam jyä'äjty ma ja itjot txëëwatyën Zuf, ënät ja Saúl t'ënëmaay ja tyuunpë mëti'ipë ënäty jämyëët'ajtëpën: Tsojk nwinpijtëmë, jä'ä ko nteetyës maaynyëp tajnëp ënät jamnë mëët ëëtsajtëmë ko ka'ap n'ëkja'ajtënë, këtiinëm ja krukts pën yajpatp kayajpatp.

⁶E ja tyuunpë tyaa y'ëtsoowë: Ma ya'atë kajpnën tam tu'uk tsyëënë yë ja'ay mëti'ipë y'akäjpxypën tii yë Wintsën tyunäämpyën. Ja'am n'ëk'ijxëmë, kooxyëp xynyatuk'ëwa'anëmëty mëti'ipë tu'u mëpaat nmajtsëmë.

⁷Jam, jëtu'un y'ëtsooy yë Saúl. Je'eyëp ko, ¿Tii tëy nmo'omyëp? Ix ni tsajpkääky nkamëët'ajtëmë mëti'ipë jeexyë nmo'oyëmën.

⁸Tä ja tyuunpë y'ëtsooy: Tyapës tu'uk yë poop pujxn meeny nmëëtëty. Yë'ë ënät nmo'omyëp jyëwyiin ets xytyuk'ëwa'anëmëty mëti'ipë tu'u mëpaat npanëjkxëmën.

⁹Tëëyëp ko ijty ja Israel ja'ayëty tii tnija'awëja'antë ma Tiosën, tyaa ijty y'ëna'antë: Ja'amtë n'ijxëmë mëti'ipë winë nyajtsja'apën. Jä'ä ko ja mëti'ipë tyam yajtijpën käjpxynyajxpë, jä'ä ijty yajtijy najtsja'apë.

¹⁰Oy nja'amëty. Jëtu'un y'ënäny yë Saúl. Ënät ojts nimäjtsk nyëjkxtë ma jam tsyëënën ja Tios mëtuunpë mëti'ipë y'akäjpxypën winë mëti'ipë Tios tyunäämpyën,

¹¹e jam ma tu'u jam wyimpetyën mëti'ipë ja'ajtpën jam kajpntum, jam tpatë ja to'oxy'ëna'këty mëti'ipë nëëkoompë nëjkxtëpën ets tyajtëëwtë: ¿Yaa ja kajpn ma yajpaatyën mëti'ipë nyajtsja'apën winë?

¹²Tääts ja to'oxy'ëna'këty y'ëtsoowtë: Jëtu'un, yaa yajpaaty, je'eyëp ko wäänë mjaaknajtsye'eyëtëty. Nëjkxtë jotëkoy ets xypyaatëty, tyam tam ja ënät myina'any, jä'ä ko yë'ë ja wintsë'kën yakäämpy ma tsajptëjkën.

¹³Paaty ko jam mja'tëty, yë'ë tim ixtaaykyojtë ënätyë, naamka'anëm jam nyijkxynyëm tsajptëkotm ma ja ëkujkyxyëëw y'apaatëja'anyën. Yë ja'ayëty yë'ë jëyëjp y'ëwxitantëp koonëm jya'tëty täänëm kyäya'antë, jä'ä ko kopkpëky ko jëyëjp tkënu'kxëty ja wintsë'kën, täänëm kyäya'antë mëti'ipë të yajwowtën. Paaty jotëkoytyë, nëjkxtë jëtu'un timtyämyë tääts xypyaatëty.

¹⁴Jëtu'un'äämpy tyu'uye'ey'ëtëtstë, tam ënäty tyimja'ajnëtën ko yë Samuel jam myiny, jam ënäty nyijkxy ma ja tsajptëjkën.

¹⁵Ëxë'ëypyë ma jyata'anyën ja Saúl, Tios tëë ënäty tuknijawë kuma'ayjoty yë Samuel ya'atë aaw ayuk.

¹⁶Jëpom ntuknikäxa'any tu'uk yë ja'ay, jam tsyoony ma Benjamín yë y'itjotmën, mëti'ipë mkënu'kxëpën ets yë'ë y'ënä'ämëty maas yë nnaax nkajpnën, yë Israel kajpn. Yë'ë nëjkx tyaj'ëwaatsëpëtsëmy yë Israel kajpn ma ëxëëk jyatën kyëpätën, mëët yë filistejë ja'ayëty, jä'ä ko npa'ëyoowtëpës ko ka'ap jyotkujk'atë.

¹⁷Ko ja Samuel t'ijxy ja Saúl, tä ja Wintsën y'ënëmaayë: Xii ja ja'ay mëti'ipë të ntukmëmëtyä'äkyën. Yë'ë jëtu'un y'ënä'ämëp ja naax kajpn.

¹⁸Tëë ënäty jam jya'të ma ja kajpn yajnitëkën, ënät ja Saúl tmëwinkoony ja Samuel ets tyajtëëy: ¿Tun yë mëyajtën tuk'ëwa'anëtyëkës maa jëtu'un ja tyëjk ja mëti'ipë najtsja'apën?

¹⁹Ëjts jëtu'un mëti'ipë najtsja'apën, jëtu'un y'ëtsooy ja Samuel. Ja'amtë ma tsajptëjkën tääts jam n'akujkyxyëëw'ajtmëty, jopynyëm n'ëtsoowinpitëty mëti'ipë mnijawëjäämpyën, tääts mnëjkxëty.

²⁰E ja krukts mëti'ipë tyëkëëkxëëwëp myajtëkooyën, tëë ja yajpaaty, paaty këtiimës yë'ë xymyëmay xymyëtajy. Näyjyëtu'un, mijts mjä'ä'atäämpy mëti'ipë mëk tsyojkën'ajtëpën yë mjëëky mëku'uk, Israel ja'ayëty.

²¹Tä ja Saúl y'ëtsooy: Wi'ix koo, ëjts Benjamínkës n'ap'ajtyp, ka'apë nëkooyë yë jyä'äy nyimayëtyën. Ëjts yë nteety ntaakës ëyoowtëp yë'ë, ets aakjëtu'un yë Benjamín yë jyä'äy. ¿Wi'ix koos jëtu'un xy'ënëëmë?

²²Tä ja Samuel ojts twoownëjkxy ja Saúl mëët ja tyuunpë tëkoty, ma ënäty jap yajpaatën ja ja'ayëty mëti'ipë mëj'äämpy ijtëpën ma ja naax kajpnën, jää jëtää ënäty japëty ni''i'px majkën.

²³Tä ja Samuel t'ënëmaay ja yajtojkx'o'oyëpë: Yajmin ja tsu'utsy mëti'ipë të nmo'oyën ets xypyëjkë'ëkëty.

²⁴Ënät ja yajtojkx'o'oyëpë ënätyë t'apëjkëty texyjoty tu'uk ja puuy ets tmooy ja Saúl. Tä ja Samuel y'ënëmaayë: Ya'atë të myajtuknipëjkë'ëkë mijts. Kay uuk, ëjtsës kë'ëm të mpëjkë'ëky ets mijts ntuknipëjkë'ëkë maas ja naax kajpn të nwoowmukyën. Jëtu'un'äämpy ojts ja Saúl kyäy mëët ja Samuel jä'ä xëëw.

²⁵E kom jam tsyo'onëtë ma ja tsajptëjkën ets nyëjkxnëtë ma ja kajpnën, jap ojts tyaj'oyëtë ja Saúl ja myaatakn tëjk'ëjxy.

²⁶Ko ojts kyootsënë tä ja Saúl nyäkyo'kënë. Komjëpom tä ja Samuel pyejty jap tëjkkëjxy ets tyujxy ja Saúl ets t'ënëmaay: Pëtë'ëk ets mnëjkxëty. Tääts nimäjtsk pyëtsëëmtë jap tëja'p, yë'ë Samuel mëët yë Saúl.

²⁷E ko jam kajpnpë'am jyajtë, tä ja Samuel t'ënëmaay ja Saúl: Ënëëmë yë mtuunpë wä'än tjaamë'ëky ets mijts ëwxitmës wäänë, jä'ä ko ayuk yam tu'uk nmo'ojäämpy mëti'ipës yë Wintsën të xytyuk'ëwaanën.