Read Biblia SEPT Xénese 11 Bible Online

Xénese 11 - Biblia SEPT bible

Xénese 11

¹Toda a terra falaba unha soa lingua e usaba as mesmas palabras.

²O emigraren os homes desde o oriente, encontráronse nunha chaira, no país de Xinar, e establecéronse alí.

³Dixéronse uns ós outros: —"Imos facer ladrillos e cocelos no lume". O ladrillo facíalles de pedra e o betume de cemento.

⁴E nisto propuxeron: —"Imos construír unha cidade e unha torre, que chegue co cimo ata o ceo, e fagámonos un nome de sona, para non nos perder pola ancha face da terra".

⁵Baixou o Señor para ver a cidade e a torre que os homes construían, e pensou:

⁶—"Aquí hai un pobo unido que fala a mesma lingua. Se empeza facendo isto, ninguén podería privalos desde agora de faceren o que se lles veña á cabeza.

⁷Baixemos e embarullemos alí mesmo a súa lingua, de xeito que non se entendan uns cos outros".

⁸O Señor espallounos de alí por toda a terra, e deixaron de construír a cidade.

⁹A esta chamóuselle Babel, porque alí embarullou o Señor a lingua de todo o mundo. Desde alí espallounos por toda a face da terra.

¹⁰Táboa dos descendentes de Sem. Sem tiña cen anos cando xerou a Arfaxad, dous anos despois do diluvio.

¹¹Despois diso viviu cincocentos anos, e tivo outros fillos e fillas.

¹²Arfaxad tiña trinta e cinco anos cando xerou a Xélah.

¹³Despois viviu catrocentos anos máis, e tivo outros fillos e fillas.

¹⁴Xélah tiña trinta anos cando xerou a Héber.

¹⁵Despois viviu catrocentos anos máis, e tivo outros fillos e fillas.

¹⁶Héber tiña trinta e catro anos cando xerou a Péleg.

¹⁷Despois viviu aínda catrocentos trinta anos, e tivo outros fillos e fillas.

¹⁸Péleg tiña trinta anos cando xerou a Reú.

¹⁹Despois viviu douscentos nove anos, e tivo outros fillos e fillas.

²⁰Reú tiña trinta e dous anos cando xerou a Serug.

²¹Despois viviu douscentos sete anos, e tivo outros fillos e fillas.

²²Serug tiña trinta anos cando xerou a Nahor.

²³Despois viviu douscentos anos máis, e tivo outros fillos e fillas.

²⁴Nahor tiña vinte e nove anos cando xerou a Térah.

²⁵Despois viviu cento dezanove anos máis, e tivo outros fillos e fillas.

²⁶Térah tiña setenta anos cando xerou a Abram, a Nahor e a Harán.

²⁷Descendentes de Térah: Térah xerou a Abram, a Nahor e a Harán. Harán xerou a Lot.

²⁸Harán morreu en vida de seu pai, na súa terra de nacemento, en Ur dos caldeos.

²⁹Abram e Nahor casaron. A muller de Abram chamábase Sarai e a de Nahor, Milcah, filla de Harán, o pai de Milcah e de Iscah.

³⁰Sarai era estéril e non tiña fillos.

³¹Térah colleu a seu fillo Abram, ó seu neto Lot, fillo de Harán, e a súa nora Sarai, muller de seu fillo Abram, e saíu con eles de Ur dos Caldeos, para dirixirse ó país de Canaán. Chegados a Harán, establecéronse alí.

³²Térah viviu douscentos cinco anos e morreu en Harán.