Read Biblia SEPT Xénese 13 Bible Online

Xénese 13 - Biblia SEPT bible

Xénese 13

¹Abram subiu de Exipto cara ó Négueb, coa muller e coas súas posesións, e levando consigo a Lot.

²Abram era moi rico en gandos, en prata e en ouro.

³Desde o Négueb seguiu por treitos camiño de Betel, onde fixera en tempos a súa tenda, entre Betel e Ai.

⁴Era o mesmo lugar onde construíra anteriormente un altar e invocara o nome do Señor.

⁵Lot ía con Abram e era tamén rico en rabaños, en gandos e en tendas.

⁶A terra onde estaban non chegaba para habitaren xuntos. A moita facenda xa non llelo consentía,

⁷de xeito que xurdían agarradas entre os pastores de Abram e os de Lot. Daquela habitaban no país os cananeos e os perizitas.

⁸Abram díxolle entón a Lot: —"Que non haxa liortas entre nós e entre os nosos pastores, pois nós somos irmáns.

⁹Tes diante de ti o país enteiro; sepárate de min. Se ti colles á esquerda, eu collerei á dereita; se ti á dereita, eu á esquerda".

¹⁰Lot levantou os ollos e reparou na veiga do Xordán, toda ela regada. (Isto era antes de que Deus destruíra Sodoma e Gomorra). Ata chegar a Soar era o mesmo ca un xardín do Señor, coma a terra de Exipto.

¹¹Lot escolleu para si a veiga do Xordán e dirixiuse cara ó oriente, separándose de Abram.

¹²Abram asentou en Canaán e Lot nas cidades da veiga do Xordán, chegando coa tenda a Sodoma.

¹³As xentes de Sodoma eran ruíns e moi pecadoras á vista do Señor.

¹⁴Despois de que Lot se separou del, o Señor díxolle a Abram: —"Desde o lugar onde estás ergue os ollos e mira cara ó norte e cara ó sur, cara ó nacente e cara ó poñente.

¹⁵A terra toda que ves, dareicha a ti e ós teus descendentes para sempre.

¹⁶Multiplicarei os teus descendentes coma o po. Se alguén contase o po, poderíaos contar a eles.

¹⁷Anda, percorre a terra ó longo e ó ancho, pois voucha dar para ti".

¹⁸Abram levantou a tenda e foise establecer na carballeira de Mambré, onda Hebrón. Alí construíu un altar ó Señor.