Read Biblia SEPT Xénese 20 Bible Online

Xénese 20 - Biblia SEPT bible

Xénese 20

¹Abraham colleu o camiño cara ó Négueb e asentou entre Cadex e Xur. Residiu tamén por un tempo en Guerar.

²Abraham dicía que Sara a súa muller, era súa irmá, e Abimélec, rei de Guerar, mandou que lla trouxesen.

³Pero Deus aparecéuselle de noite nun soño a Abimélec e ameazouno: —"Vas morrer por causa da muller que tomaches, pois ten home".

⁴Abimélec non a tocara aínda, e respondeu: —"Señor, matarías tamén un inocente?

⁵Non me dixo el que ela era súa irmá, e ela que el era seu irmán? Con intención sincera e mans limpas fixen isto".

⁶Deus díxolle en soños: —"Sei que o fixeches con recta intención. Por iso eu gardeite de que pecases, non deixei que a tocases.

⁷Agora vólvelle a muller a seu home que é profeta, e el pregará por ti para que vivas. Pero se non lla volves, ten por certo que morrerás, ti e todos os teus".

⁸Abimélec ergueuse cedo, chamou a toda a súa xente e contoulles o que pasaba. Todos colleron moito medo.

⁹Despois Abimélec chamou a Abraham para dicirlle: —"Que fixeches connosco? En que che faltei eu, para botares enriba de min e do meu reino este pecado tan grande? Fixéchesme o que non se fai.

¹⁰Que buscabas ó faceres isto?"

¹¹Abraham respondeulle: —"Pensei para min: Quizais neste país non teñen temor de Deus, e mataranme por causa da miña muller.

¹²Polo demais tamén é certo que ela é miña irmá, filla do mesmo pai, aínda que non da mesma nai, e eu tomeina por muller.

¹³Cando Deus me levou lonxe da casa de meus pais, díxenlle así: Vasme facer este favor: en calquera lugar a onde cheguemos, di que eu son teu irmán".

¹⁴Abimélec colleu ovellas, vacas, servos e servas, e deullos a Abraham. E volveulle a Sara, súa muller.

¹⁵E díxolle: —"Aí tes diante de ti a miña terra. Asenta onde che pareza".

¹⁶E a Sara díxolle: —"Ves que lle dei mil moedas de prata a teu irmán. Será o veo dos teus ollos diante de todos os teus. Quedas xustificada".

¹⁷Abraham intercedeu, e Deus sandou a Abimélec, á súa muller e ás súas concubinas, e puideron ter fillos outra vez,

¹⁸pois Deus pechara todo útero na familia de Abimélec, por causa de Sara, muller de Abraham.