Read Biblia SEPT Xénese 25 Bible Online

Xénese 25 - Biblia SEPT bible

Xénese 25

¹Abraham tomou outra muller que se chamaba Queturah.

²Esta deulle por fillos a Zimrán, Iocxán, Medán, Madián, Ixbac e Xúah.

³Iocxán xerou a Xebá e Dedán. Os fillos de Dedán foron os asirios, os latuxios e os leumios.

⁴Os fillos de Madián foron Efah, Éfer, Hanoc, Abidá e Eldaáh. Todos eles son descendentes de Queturah.

⁵Abraham fixo a Isaac herdeiro de todo o que tiña.

⁶Os fillos das concubinas fíxolles mandas e afastounos en vida de seu fillo Isaac cara ós países do oriente.

⁷Os anos que Abraham viviu foron cento setenta e cinco.

⁸Ocabo deles expirou e morreu en boa vellez, satisfeito da vida, e foi xuntarse co seu pobo.

⁹Seus fillos Isaac e Ismael enterrárono na cova de Macpelah, no eido de Efrón, fillo de Soar o hitita, de fronte a Mambré.

¹⁰É o campo que lles mercara Abraham ós fillos de Het. Nel foron enterrados Abraham e Sara, súa muller.

¹¹Despois da morte de Abraham, Deus seguiu bendicindo a seu fillo Isaac. Este asentou onde estaba o pozo de Lahai-Roí.

¹²Esta é a historia de Ismael, o fillo que lle deu a Abraham a serva exipcia Hagar.

¹³Os fillos de Ismael, por orde de nacemento, son os seguintes: Nebaiot o primoxénito, Quedar, Abdeel, Mibsam,

¹⁴Mixmá, Dumah, Masá,

¹⁵Hadad, Temá, Ietur, Nafix e Quédmah.

¹⁶Eses son os fillos de Ismael polos seus nomes, segundo os seus poboados e os seus campamentos. Doce xefes de doce tribus.

¹⁷Os anos que Ismael viviu foron cento trinta e sete. O cabo deles expirou, morreu e foi xuntarse co seu pobo.

¹⁸Os seus descendentes asentaron desde Havilah ata Xur, que mira cara a Exipto, vindo de Asur. Cadraron irmáns en fronte de irmáns.

¹⁹Esta é a historia de Isaac, fillo de Abraham. Abraham xerou a Isaac.

²⁰Cando Isaac tiña corenta anos, tomou por muller a Rebeca, filla de Betuel, arameo de Padán Aram, e irmá de Labán o Arameo.

²¹Isaac pregou ó Señor pola súa muller que era estéril. O Señor escoitouno e Rebeca, súa muller, quedou embarazada.

²²Pero os nenos loitaban no seu ventre e ela queixouse: —"Se é así, para que vivo?" E foi consultar ó Señor.

²³A resposta foi esta: —"Hai dúas nacións no teu ventre, dous pobos que se dividen xa nas túas entrañas. Un pobo poderá co outro, o máis vello servirá ó máis novo".

²⁴Chegada a hora do parto, viuse que tiña dous xemelgos no seu ventre.

²⁵Saíu primeiro un, todo louro, peludo coma unha pelica. Puxéronlle por nome Esaú.

²⁶Despois, agarrado do calcañar de Esaú, saíu seu irmán. E chamáronlle Xacob. Isaac tiña sesenta anos, cando lle naceron os dous fillos.

²⁷Os nenos fixéronse grandes. Esaú era bo cazador e home do campo. Xacob, en troques, era amigo de quedar na tenda.

²⁸Isaac amaba a Esaú, porque gustaba da súa caza. Pero Rebeca prefería a Xacob.

²⁹Nunha ocasión tiña Xacob disposto un guiso e nisto chegou Esaú canso do monte.

³⁰Esaú pediulle a Xacob: —"Dáme a comer esa cousa vermella, pois estou esgotado". (Por iso lle puxeron o nome de Edom).

³¹Respondeulle Xacob: —"Coa condición de que me vendas agora mesmo os dereitos de primoxénito".

³²Esaú pensou: —"Estou que morro. De que me serve a primoxenitura?"

³³Xacob dixo: —"Xúramo agora mesmo". El xuroullo, e vendeulle a Xacob a súa primoxenitura.

³⁴Entón Xacob deulle a Esaú un anaco de pan e mais o guiso de lentellas. El comeu e bebeu, e despois foise. En tan pouco tiña Esaú os dereitos da primoxenitura.