Read Biblia SEPT Xénese 40 Bible Online

Xénese 40 - Biblia SEPT bible

Xénese 40

¹Nunha ocasión o copeiro e mais o panadeiro do rei de Exipto ofenderon ó seu señor.

²O faraón anoxouse contra eles, contra o copeiro maior e o panadeiro maior,

³e meteunos en prisión, na casa do xefe da garda, onde estaba Xosé detido.

⁴O xefe da garda confioullos a Xosé, quen os servía.

⁵O copeiro e o panadeiro do rei de Exipto que estaban presos no cárcere, levaban xa tempo detidos, cando unha noite cada un deles tivo seu soño, cada soño co seu sentido.

⁶Pola mañá entrou Xosé onda eles e atopounos deprimidos.

⁷E preguntoulles ós dous ministros, compañeiros do cárcere: —"Por que tedes hoxe mala cara?"

⁸Respondéronlle eles: —"Tivemos un soño, e non hai quen nolo interprete". Díxolles Xosé: —"Non lle corresponde a Deus a interpretación? Contádeme o soño".

⁹O copeiro maior contoulle o seu soño a Xosé: —"Soñei que tiña diante unha vide.

¹⁰A vide tiña tres bacelos. Agromou, floreceu e as uvas madureceron nos acios.

¹¹Eu sostiña nunha man a copa do faraón, collía as uvas e espremíaas na copa, e puña a copa na man do faraón".

¹²Xosé díxolle: —"Este é o seu significado. Os tres bacelos da vide son tres días.

¹³No termo de tres días erguerá o faraón a túa cabeza, repoñéndote no teu posto, e ti porás a copa na súa man, coma cando eras o seu copeiro.

¹⁴Cando che vaia ben, acórdate de min. Faime o favor de falarlle de min ó faraón, para que me leve desta casa.

¹⁵Trouxéronme secuestrado do país dos hebreos, e aquí non fixen ningún mal, para que me botasen neste alxube".

¹⁶Cando o panadeiro maior oíu que o significado do soño do copeiro era bo, díxolle a Xosé: —"Tamén eu soñei que levaba na cabeza tres cestas de pan.

¹⁷Na cesta de riba levaba toda sorte de repostería para o faraón, pero os paxaros peteiraban na cesta que eu levaba na cabeza".

¹⁸Xosé díxolle: —"Este é o seu significado. As tres cestas son tres días.

¹⁹Cabo de tres días erguerá o faraón a túa cabeza, pendurarate dunha árbore e os paxaros comerante".

²⁰O cabo de tres días, día de anos do faraón, deu este un banquete a todos os seus ministros, e de entre todos tivo por ben erguer a cabeza do copeiro maior e do panadeiro maior.

²¹O copeiro maior repúxoo no seu posto de copeiro, para que puxese a copa na man do faraón.

²²Pero ó panadeiro maior pendurouno dunha forca, como Xosé interpretara.

²³O copeiro maior non se lembrou máis de Xosé, esqueceuse del.