Read Biblia SEPT 2 Samuel 20 Bible Online

2 Samuel 20 - Biblia SEPT bible

2 Samuel 20

¹Por un casual estaba alí un home perverso, que se chamaba Xeba, fillo de Bicrí, un benxaminita. Este tocou a trompeta dicindo: —"Nós non temos parte con David, nin temos herdo co fillo de Ixaí. Cada un para a súa tenda, Israel!"

²Os homes de Israel abandonaron a David e seguiron a Xeba, fillo de Bicrí; pero os homes de Xudá seguiron co seu rei desde o Xordán cara a Xerusalén.

³En Xerusalén David entrou no seu pazo e as dez concubinas que deixara alí, ó seu coidado, meteunas no harén. O rei mantíñaas, mais non se achegou a elas. Estiveron alí encerradas ata a morte, vivindo coma viúvas.

⁴O rei ordenoulle a Amasá: —"Convócame en tres días os homes de Xudá e ti preséntate tamén".

⁵Amasá marchou e convocou os homes de Xudá, pero tardou máis tempo do marcado.

⁶David díxolle entón a Abixai: —"Agora Xeba, fillo de Bicrí, vainos facer máis dano ca Abxalom. Colle os homes do teu señor e vaite detrás del, non encontre unha cidade fortificada e escape".

⁷Con Abixai saíron os homes de Ioab, os quereteos, os peleteos e todos os valentes; abandonaron Xerusalén na persecución de Xeba, fillo de Bicrí.

⁸Cando chegaron xunto á pedra grande que hai en Gabaón, apareceu Amasá diante deles. Ioab ía vestido co uniforme e por riba levaba unha espada enfundada, cinguida ó costado. A espada saíuselle e caeu.

⁹Ioab preguntoulle a Amasá: —"Como estás, meu irmán?" O tempo coa súa dereita collíao da barba para bicalo.

¹⁰Amasá non reparou na espada que levaba Ioab na outra man. Ioab feriuno con ela no ventre e saíronselle as entrañas. Sen necesidade doutro golpe, Amasá morreu. Despois Ioab e Abixai, o seu irmán, seguiron perseguindo a Xeba, fillo de Bicrí.

¹¹Un home dos de Ioab púxose onda Amasá e dicía: —"Os que estean por Ioab e os que son de David, que sigan a Ioab".

¹²Amasá xacía nun baño de sangue no medio do camiño. Vendo o home que todos os que pasaban se detiñan, botou o cadáver de Amasá para fóra do camiño, en vista de que os que pasaban, se detiñan diante del.

¹³Xa retirado o cadáver do camiño, todos seguiron a Ioab na persecución de Xeba, fillo de Bicrí.

¹⁴Xeba pasou por todas as tribos de Israel ata Abel Bet Macah. Xuntáronselle os bicritas, que entraron alí detrás súa.

¹⁵Chegaron os de Ioab e puxeron cerco a Abel Bet Macah. Ergueron contra a cidade un terraplén que chegaba ó muro. Os soldados de Ioab escavaban para botaren abaixo as murallas.

¹⁶Unha muller asisada berrou desde a cidade: —"Escoitade! Escoitade! Dicídelle a Ioab que se achegue aquí, que lle quero falar".

¹⁷Acercouse Ioab e a muller preguntoulle: —"Es ti Ioab?" E el dixo: —"Son". E ela: —"Escoita as palabras da túa serva". E el dixo: —"Escoito".

¹⁸Entón díxolle ela: —"Os anciáns dicían: que pregunten en Abel e con iso acabáronse as contendas.

¹⁹Nós somos unha das cidades máis pacíficas e fieis de Israel e a unha cidade que é nai en Israel ti tentas traer a morte. Por que queres estragar a herdade do Señor?"

²⁰Ioab respondeulle: —"Deus me libre de estragala e de destruíla.

²¹Non se trata diso, senón dun home da montaña de Efraím chamado Xeba, fillo de Bicrí, que ergueu a súa man contra o rei, contra David. Entregádeo a el e arredareime da cidade". A muller díxolle a Ioab: —"Agora mesmo che botamos a súa cabeza por riba da muralla".

²²A muller convenceu ó pobo coa súa sabedoría. Cortáronlle a cabeza a Xeba, fillo de Bicrí, e botáronlla a Ioab. Ioab tocou a trompeta, e, afastándose da cidade, volveu cada un para a súa tenda. Ioab volveu a Xerusalén onda o rei.

²³Ioab era o xefe do exército de Israel; Benaías, fillo de Iehoiadá, mandaba nos quereteos e peleteos;

²⁴Adoniram levaba o recrutamento de traballadores; Ioxafat, fillo de Ahilud, era o secretario;

²⁵Xeiá era o cronista; Sadoc e Abiatar, os sacerdotes.

²⁶Tamén Irá, de Iair, era sacerdote de David.