Read Biblia SEPT 2 Samuel 5 Bible Online

2 Samuel 5 - Biblia SEPT bible

2 Samuel 5

¹Todas as tribos de Israel foron a Hebrón, xunto a David, para dicirlle: —"Aquí nos tes. Nós somos do teu mesmo sangue.

²Xa de antes, cando Xaúl reinaba sobre nós, eras ti quen conducía a Israel e o Señor tíñache dito: ti pastarás o meu pobo Israel, ti serás o seu xefe".

³Os anciáns de Israel presentáronse, pois, onda o rei en Hebrón. O rei David fixo un pacto alí con eles, diante do Señor, e eles unxiron a David por rei de Israel.

⁴David tiña trinta anos cando empezou a reinar e reinou corenta anos.

⁵En Hebrón reinou sobre Xudá sete anos e medio; en Xerusalén reinou trinta e tres anos, sobre Israel e Xudá.

⁶O rei marchou cos seus homes sobre Xerusalén contra os habitantes daquel país, os iebuseos. Eles tíñanlle dito a David: —"Non poderás entrar aquí; rexeitarante os cegos e os coxos". Con iso querían dicir: "David non poderá entrar aquí".

⁷Pero David conquistou a fortaleza de Sión, que se converteu na cidade de David.

⁸Aquel día David dixera: —"Quen queira combater os iebuseos, que se achegue polo túnel. A eses coxos e a eses cegos aborréceos David". De aí saíu aquel dito: nin cego nin coxo entre no templo.

⁹David instalouse na fortaleza e chamoulle cidade de David. David edificou ó redor dela desde o Miló para dentro.

¹⁰David medraba cada vez máis. O Señor, Deus dos exércitos, estaba con el.

¹¹Hiram, rei de Tiro, mandoulle unha embaixada a David, con madeiras de cedro e con carpinteiros e canteiros, para que construísen o pazo de David.

¹²David comprendeu que o Señor o confirmaba por rei de Israel e que por mor do seu pobo Israel engrandecía o reino.

¹³Despois de que veu de Hebrón, David tomou en Xerusalén outras concubinas e outras mulleres. Delas nacéronlle a David máis fillos e máis fillas.

¹⁴Os nomes dos fillos que tivo en Xerusalén son Xamá, Xobab, Natán e Salomón,

¹⁵Ibhar, Elixúa, Nafeg e Iafía,

¹⁶Elixamá, Eliadá e Elifélet.

¹⁷Souberon os filisteos que David fora unxido rei de Israel e, ó momento, subiron en busca del. David, ó ter a noticia, baixou á súa fortaleza.

¹⁸Os filisteos viñeron e espalláronse polo val de Refaím.

¹⁹David consultou o Señor: —"Subirei contra os filisteos? Poralos nas miñas mans?" O Señor respondeulle: —"Sube. Entregareinos, seguro, nas túas mans".

²⁰David foise a Baal Perasim e alí venceunos, e comentou: —"O Señor abriu unha fenda nos meus inimigos diante miña, coma a fenda que abren as augas". Por iso chamóuselle a aquel lugar Baal Perasim.

²¹Os filisteos abandonaron alí os seus ídolos e colléronos David e os seus homes.

²²Os filisteos volveron á contenda, despregándose polo val de Refaím.

²³David consultou o Señor, que lle respondeu: —"Non subas. Dá a volta por detrás deles e atácaos do lado das moreiras.

²⁴Cando sintas ruído de pasos nas copas das moreiras, ataca con decisión, pois é que sae o Señor diante de ti, para derrotar o exército filisteo".

²⁵David fixo como lle mandaba o Señor, e derrotou os filisteos desde Gueba ata a entrada de Guézer.