Read Biblia SEPT 2 Samuel 9 Bible Online

2 Samuel 9 - Biblia SEPT bible

2 Samuel 9

¹David preguntou: —"Queda alguén da familia de Xaúl a quen eu poida favorecer por mor de Ionatán?"

²Da casa de Xaúl había un criado que se chamaba Sibá. Mandárono vir onda David e o rei preguntoulle: —"Es ti Sibá?" E el respondeulle: —"Servidor".

³O rei seguiu: —"Queda alguén da familia de Xaúl a quen eu lle poida mostrar a bondade de Deus?" Sibá respondeulle ó rei: —"Queda un fillo de Ionatán, tolleito dos dous pés".

⁴O rei preguntoulle: —"Onda está?" E Sibá díxolle: —"Está en Lodabar, na casa de Maquir, fillo de Amiel".

⁵O rei David mandouno traer de Lodabar, de onda Maquir.

⁶Chegado xunto a David, Mefibóxet, fillo de Ionatán, fillo de Xaúl, saudouno prostrado polo chan. David preguntoulle: —"Es ti Mefibóxet?" E el respondeulle: —"Servidor".

⁷David díxolle: —"Non teñas medo. Quero favorecerte, por mor do teu pai Ionatán. Devolvereiche todas as terras do teu avó Xaúl e ti comerás sempre á miña mesa".

⁸Mefibóxet inclinouse e dixo: —"Quen é este teu servo, para que lle deas atención a un can morto coma min?"

⁹O rei chamou a Sibá, criado de Xaúl, e díxolle: —"Todo o que pertencía a Xaúl e a súa familia quero que se lle dea ó fillo do teu amo.

¹⁰Ti, os teus fillos e os teus criados traballarédeslle as terras ó fillo do teu amo, para que a súa casa teña pan. Pero Mefibóxet, o fillo do teu amo, comerá sempre á miña mesa". Sibá tiña quince fillos e vinte escravos.

¹¹E díxolle ó rei: —"O teu servo fará o que o rei, meu señor, dispoña".

¹²Mefibóxet tiña un fillo pequeno que se chamaba Micá. A familia de Sibá estaba toda ó servizo de Mefibóxet.

¹³Este habitaba en Xerusalén porque comía á mesa do rei. Estaba coxo dos dous pés.