Read Biblia SEPT 1 Reis 11 Bible Online

1 Reis 11 - Biblia SEPT bible

1 Reis 11

¹O rei Salomón, á parte da filla do faraón, amou a moitas mulleres estranxeiras, moabitas, amonitas, edomitas, sidonias e hititas,

²de nacións das que dixera o Señor ós israelitas: —"Non vos xuntedes con elas, nin elas convosco, pois virarían o voso corazón cara ós seus deuses". Salomón namorouse delas.

³Tivo setecentas princesas como esposas e trescentas como concubinas. As mulleres torcéronlle o sentido.

⁴Cando Salomón ía xa vello, as súas mulleres levaron o seu corazón tras deuses alleos; non o tiña por enteiro co Señor, seu Deus, coma seu pai David.

⁵Salomón deu culto a Axtarté, deusa dos sidonios, a Malcom, ídolo dos amonitas.

⁶Fixo o mal ós ollos do Señor e non lle gardou fidelidade, coma seu pai David.

⁷Daquela construíu Salomón, no monte que está enfronte de Xerusalén, un altar a Kemox, ídolo dos moabitas, e a Moloc, ídolo dos amonitas.

⁸O mesmo fixo para as outras mulleres estranxeiras, que queimaban incenso e ofrecían sacrificios ós seus deuses.

⁹Anoxouse o Señor con Salomón, porque afastara o seu corazón do Señor, Deus de Israel, que se lle aparecera dúas veces,

¹⁰e que sobre o particular lle prescribira non seguir deuses alleos. Salomón non cumpriu o que lle mandara o Señor.

¹¹Entón díxolle o Señor: —"Xa que te comportaches deste xeito e non gardaches a miña alianza e os preceptos que eu che dei, arrincareiche o reino da man e dareillo a un servo teu.

¹²Non o farei mentres ti vivas, por amor a David, teu pai; arrincareillo ó teu fillo da súa man.

¹³Non lle arrincarei o reino todo. Deixareille ó teu fillo unha tribo, por amor de David, teu pai, e por amor de Xerusalén que eu escollín".

¹⁴O Señor suscitoulle un inimigo a Salomón: o edomita Hadad, da liñaxe real de Edom.

¹⁵Sucedeu que, cando David venceu a Edom, e foi alí o xeneral Ioab enterrar os mortos, este matou os homes todos de Edom.

¹⁶Ioab quedárase alí por seis meses co exército israelita ata que rematou o exterminio dos varóns de Edom.

¹⁷Pero Hadad puido fuxir cuns poucos homes de entre os servidores de seu pai e pasou a Exipto. Daquela Hadad era un rapaz.

¹⁸Saíron de Madián e chegaron a Parán. Alí colleron consigo algúns homes, pasaron a Exipto e presentáronse ó faraón, rei de Exipto, que os forneceu de casa, de alimentos e de terras.

¹⁹Hadad caeulle en graza ó faraón, que lle deu por muller a súa cuñada, irmá da raíña Tafnes.

²⁰A irmá de Tafnes pariulle a Hadad un fillo, Guenubat, que a mesma Tafnes criou no pazo do faraón. Por iso Guenubat medrou no pazo cos fillos do faraón.

²¹Cando, en Exipto, Hadad oíu dicir que David se reunira con seus pais e que morrera tamén Ioab, o xefe do exército, díxolle ó faraón: —"Déixame ir á miña terra".

²²O faraón respondeulle: —"Que botas de menos onda min, para que queiras ir á túa terra?" El dixo: —"Nada. Pero déixame que vaia".

²³Deus suscitou aínda outro inimigo a Salomón: Rezón, fillo de Eliadá, que fuxira do seu señor Hadadézer, rei de Sobah.

²⁴Rodeouse duns poucos homes e fíxose xefe de banda. David loitaba daquela con Edom. Eles entraron en Damasco e aclaramon rei a Rezón.

²⁵Foi un inimigo de Israel, toda a vida de Salomón. En canto a Hadad, fíxolle todo o mal que puido a Israel e atormentouno, desde o seu reino de Edom.

²⁶Tamén se revoltou contra Salomón Ieroboam, fillo de Nabat, un servo do rei, un efrateo de Seredah. Súa nai chamábase Seruah e era viúva.

²⁷A ocasión da súa revolta contra o rei foi cando Salomón construía o terraplén e pechaba as fendas da cidade de David, seu pai.

²⁸Ieroboam amosouse home valente. E vendo Salomón que o mozo facía ben o seu traballo, nomeouno capataz dos traballadores da casa de Ioel.

²⁹Un día que saía Ieroboam de Xerusalén, encontrouse no camiño co profeta Ahías de Xiloh. Este levaba unha capa nova, e estaban sós os dous no descampado.

³⁰Ahías botou man da capa nova que levaba e partiuna en doce cachos.

³¹E mandoulle a Ieroboam: —"Colle dez cachos para ti, pois isto di o Señor, Deus de Israel: Vou arrincar o reino da man de Salomón, e vouche dar dez tribos a ti.

³²Unha tribo será para el, por amor ó meu servo David e por amor a Xerusalén, a cidade que eu escollín entre todas as tribos de Israel.

³³Iso é porque me abandonaron a min e adoraron a Axtarté, deusa dos sidonios, a Kemox, deus de Moab, e a Malcom, deus dos amonitas, e non seguiron os meus camiños, facendo o que é xusto ós meus ollos, gardando coma seu pai David os meus mandatos e as miñas decisións.

³⁴Non lle quitarei o reino todo, senón que lle manterei o principado por todos os días da súa vida, por amor ó meu servo David, a quen escollín, e que gardou a miña lei e os meus preceptos.

³⁵Mais arrincarei o reino das mans de seu fillo e dareiche dez tribos a ti.

³⁶A seu fillo dareille unha tribo, para que o meu servo David teña sempre unha lámpada acesa diante de min en Xerusalén, a cidade que eu escollín, para que habite nela o meu nome.

³⁷A ti escóllote para que reines, conforme os teus desexos. Serás rei de Israel.

³⁸Se me obedeces en todo o que che mande, se vas polos meus camiños e fas o que é xusto ós meus ollos, se gardas as miñas leis e os meus mandatos, como fixo o meu servo David, eu estarei contigo, edificareiche unha casa segura, como lla edifiquei a David, e entregareiche Israel.

³⁹Con isto humillarei ós descendentes de David; mais non será para sempre".

⁴⁰Salomón tentou de matar a Ieroboam; mais este fuxiu para Exipto, ó lado do rei Xexac, e ficou por alá ata a morte de Salomón.

⁴¹O resto da historia de Salomón, os seus feitos e a súa sabedoría, están todos escritos no Libro dos Feitos de Salomón.

⁴²Salomón reinou en Xerusalén, sobre todo Israel, corenta anos.

⁴³Despois durmiu con seus pais, e enterrárono na cidade de David, seu pai. Sucedeulle no trono o seu fillo Roboam.