Read Biblia SEPT 1 Reis 12 Bible Online

1 Reis 12 - Biblia SEPT bible

1 Reis 12

¹Roboam foi a Xequem, pois reuníase alí todo Israel para proclamalo rei.

²Sóuboo Ieroboam, cando estaba aínda en Exipto, a onde fora fuxindo do rei Salomón,

³e en canto o mandaron chamar, viñera axiña.

⁴Ieroboam e a asemblea toda de Israel presentáronse a Roboam e faláronlle deste xeito: —"Teu pai botou riba de nós un xugo duro de máis. Alixeira agora ti esta rexa servidume que teu pai botou riba de nós, e este xugo tan duro que el nos impuxo, e entón nós servirémoste".

⁵El respondeulles: —"Agora ídevos, e volvede onda min ó cabo de tres días". E o pobo retirouse.

⁶O rei Roboam consultou entón cos anciáns, que estiveran ó servizo do seu pai Salomón, cando el vivía: —"Que me aconsellades que lle responda a esta xente?"

⁷Eles dixéronlle: —"Se hoxe te abaixas con esta xente e te pos ó seu servizo, se te avés con eles e lles dás boas palabras, servirante por toda a vida".

⁸Pero el desbotou o consello que lle daban os anciáns, e aconsellouse con xente nova, que medraran con el e que estaban agora ó seu servizo.

⁹El preguntoulles: —"Que me aconsellades que responda a esta xente, que veñen pedindo que lles afrouxe o xugo que botou riba deles meu pai?"

¹⁰Os mozos compañeiros respondéronlle: —"O pobo que che di que teu pai lles impuxo un xugo moi duro e que ti llelo alixeires, débeslle dicir isto: o meu dedo maimiño é máis groso có lombo de meu pai.

¹¹Se meu pai vos impuxo un xugo rexo, eu engadirei dureza a ese xugo. Se meu pai vos zorregou a lombeiradas, eu fareino coa tralla".

¹²O terceiro día, conforme o rei lles dixera, presentouse Ieroboam co pobo todo diante de Roboam.

¹³O rei faloulles duramente, desatendendo o consello que lle deran os anciáns.

¹⁴Seguindo o consello dos mozos, faloulles nestes termos: —"Se meu pai vos impuxo un xugo rexo, eu engadirei dureza a ese xugo. Se meu pai vos zorregou a lombeiradas, eu fareino coa tralla".

¹⁵O rei non fixo caso dos desexos do pobo, e esa foi a ocasión buscada polo Señor, para que se confirmase a palabra que o Señor tiña dito a Ieroboam, fillo de Nabat, por Ahías de Xiloh.

¹⁶Cando todo Israel se convenceu de que o rei non os atendía, faláronlle deste xeito: —"Que parte temos nós con David? Non temos herdo ningún co fillo de Ixaí. As túas tendas, Israel! E ti, David, goberna agora a túa casa". E os israelitas fóronse todos para as súas casas.

¹⁷Pero Roboam seguiu reinando sobre os israelitas que vivían nas cidades de Xudá.

¹⁸O rei Roboam mandou entón a Adoniram, xefe do recrutamento dos traballadores. Mais os israelitas botáronselle enriba, acantazárono e matárono. O velo, o rei Roboam montou no seu carro a toda présa e fuxiu cara a Xerusalén.

¹⁹Foi dese xeito como Israel se separou da casa de David, ata o día de hoxe.

²⁰Cando se soubo en Israel que volvera Ieroboam, chamárono á súa asemblea e proclamárono rei de todo Israel. A casa de David non lle quedou tribo ningunha, fóra da tribo de Xudá.

²¹Chegado a Xerusalén, Roboam reuniu a casa toda de Xudá e a tribo de Benxamín, cento oitenta mil homes, guerreiros escolleitos, para facer a guerra á casa de Israel e restituír o reino de Roboam, fillo de Salomón.

²²Pero nisto veu esta palabra do Señor a Semaías, home de Deus:

²³—"Dille isto a Roboam, fillo de Salomón, rei de Xudá, á casa toda de Xudá e de Benxamín e ó resto do pobo.

²⁴Isto di o Señor: non vaiades facer a guerra ós vosos irmáns os israelitas. Que cada un volva para a súa casa, pois isto que pasa é cousa miña". Eles obedeceron a palabra do Señor e, de acordo con ela, foi cada un para a súa casa.

²⁵Ieroboam fortificou Xequem, na montaña de Efraím, e quedou a vivir alí. Despois saíu de Xequem e fortificou Penuel.

²⁶Ieroboam pensou nos seus adentros: o reino pode aínda volver á casa de David.

²⁷Se esta xente segue subindo a Xerusalén, para ofrecer sacrificios na casa do Señor, o seu corazón tornarase para o seu señor Roboam, rei de Xudá. Someteranse ó rei de Xudá e a min mataranme.

²⁸Despois de aconsellarse, o rei mandou construír dous becerros de ouro, e díxolle ó pobo: —"Acabouse rubir a Xerusalén! Aquí está o teu Deus, Israel, o que te sacou de Exipto".

²⁹E puxo un becerro en Betel e o outro en Dan.

³⁰Isto foi causa de pecado, pois a xente ía, uns a Dan e outros a Betel.

³¹Ieroboam construíu tamén ermidas nos outeiros e puxo por sacerdotes xentes do pobo, que non pertencían á tribo de Leví.

³²Por parte, instituíu unha festa no día quince do mes oitavo, como a festa que se facía en Xudá, e el mesmo rubiu ó altar que fixera en Betel, para ofrecer sacrificios ós becerros, mandados facer por el. En Betel puxo tamén sacerdotes nas ermidas que el construíra nos outeiros.

³³Rubiu ó altar feito por el en Betel, o día quince do mes oitavo, o mes escollido ó seu gusto. Instituíu para os israelitas esa festa e rubiu ó altar para ofrecer incenso nel.