Read Biblia SEPT 1 Reis 15 Bible Online

1 Reis 15 - Biblia SEPT bible

1 Reis 15

¹Abías empezou a reinar en Xudá o ano dezaoito do reinado de Ieroboam, fillo de Nabat.

²Reinou tres anos en Xerusalén. Súa nai chamábase Macah, filla de Abxalom.

³Cometeu os mesmos pecados que cometera xa seu pai. O seu corazón non estivo enteiro co Señor, coma o de David, seu pai.

⁴Pero, por amor a David, concedeulle o Señor, seu Deus, unha lámpada en Xerusalén aínda en pé.

⁵En verdade, David fixera o que é xusto ós ollos do Señor e non se afastara dos seus mandamentos en toda a súa vida, fóra do caso de Urías o hitita.

⁶Abías e Ieroboam estiveron en guerra todo o tempo.

⁷O resto da historia de Abías, todo o que fixo, non está escrito no Libro das Crónicas dos reis de Xudá? Tamén sobre as guerras que houbo entre Abías e Ieroboam.

⁸Abías durmiu con seus pais, e enterrárono na cidade de David. Sucedeulle no trono seu fillo Asá.

⁹Asá empezou a reinar en Xudá no ano vinte do reinado de Ieroboam en Israel.

¹⁰Reinou corenta anos en Xerusalén. Súa avoa chamábase Macah, filla de Abxalom.

¹¹Asá fixo o que é xusto ós ollos do Señor, coma David, seu pai.

¹²Botou fóra do país a prostitución consagrada e desbotou todos os ídolos que fixeran seus pais.

¹³Tamén retirou o título de raíña—nai á súa avoa Macah porque fixera unha imaxe de Axtarté. Asá derrubou a imaxe e queimouna no torrente Cedrón.

¹⁴Mesmo se non fixo desaparecer os altares dos outeiros, o corazón de Asá estivo enteiro co Señor, toda a súa vida.

¹⁵Levou ó templo do Señor as ofrendas sagradas de seu pai e as súas propias, prata, ouro e xoias.

¹⁶Asá e Baxá, rei de Israel, estiveron en guerra todo o tempo.

¹⁷Baxá, rei de Israel, marchou contra Xudá e fortificou Ramah, para cortarlle o paso a Asá, rei de Xudá.

¹⁸Daquela, Asá botou man da prata e do ouro que quedaban nos tesouros do templo do Señor e do pazo real, entregóullelos ós seus servidores e mandou que llos levasen a Benhadad, fillo de Tabrimón, de Hezión, rei de Aram, que residía en Damasco, con esta mensaxe:

¹⁹—"Fagamos un pacto entre nós, coma o que houbo entre os nosos pais. Aí che mando ese regalo de prata e de ouro. Creba o pacto que tes con Baxá, rei de Israel, e que se afaste do meu territorio".

²⁰Benhadad mostrouse de acordo coa petición do rei Asá, e mandou os seus xenerais contra algunhas cidades de Israel. Apoderouse de Iión, Dan, Abel—Bet—Macah, a rexión de Kinéret e o territorio de Naftalí.

²¹Cando Baxá soubo isto, deixou de reconstruír Ramah e volveuse para Tirsah.

²²Entón o rei Asá convocou a todo Xudá, e levaron de Ramah as pedras e as madeiras, coas que Baxá a fortificaba. O rei Asá fortificou con elas Gueba de Benxamín e Mispah.

²³O resto da historia de Asá, as súas proezas, os seus feitos e as cidades que fortificou, non está todo escrito no Libro das Crónicas dos reis de Xudá? De vello adoeceu dos pés.

²⁴Asá durmiu con seus pais, e enterrárono na cidade de David. Sucedeulle no trono o seu fillo Ioxafat.

²⁵Nadab, fillo de Ieroboam, empezou a reinar en Israel no ano segundo do reinado de Asá en Xudá. Reinou dous anos en Israel.

²⁶Fixo o mal ós ollos do Señor. Foi polo mesmo camiño ca seu pai e cometeu o pecado que aquel fixera cometer a Israel.

²⁷Baxá, fillo de Ahías, da tribo de Isacar, conspirou contra el e matouno en Guibetón, territorio dos filisteos, cando Nadab e todo Israel estaban cercando a cidade.

²⁸Baxá matouno no ano terceiro do reinado de Asá en Xudá, e sucedeulle no trono.

²⁹O primeiro que fixo Baxá como rei foi matar a familia de Ieroboam, sen deixarlle con vida unha soa persoa. Exterminouna toda, conforme a palabra que dixera no nome do Señor o seu servo Ahías de Xiloh,

³⁰por culpa dos pecados que cometera Ieroboam e dos que fixera cometer a Israel, provocando o noxo do Señor, Deus de Israel.

³¹O resto da historia de Nadab e todo o que fixo non está escrito no Libro das Crónicas dos reis de Israel?

³²Asá e Baxá, rei de Israel, estiveron en guerra todo o tempo.

³³No ano terceiro de Asá, rei de Xudá, empezou a reinar Baxá, fillo de Ahías, sobre todo Israel. Reinou vinte e catro anos.

³⁴Fixo o mal ós ollos do Señor. Foi polo mesmo camiño ca Ieroboam e cometeu o pecado que el fixera cometer a Israel.