Read Biblia SEPT 1 Reis 16 Bible Online

1 Reis 16 - Biblia SEPT bible

1 Reis 16

¹Iehú, fillo de Hananí, recibiu esta palabra do Señor contra Baxá:

²—"Eu tireite do po e fíxente xefe do meu pobo Israel. Mais ti fuches polo mesmo camiño ca Ieroboam e fixeches pecar a Israel, anoxándome cos vosos pecados.

³Por iso vou varrer a Baxá e a súa familia, facendo con ela o que fixen coa familia de Ieroboam, fillo de Nabat.

⁴Os que lle morran a Baxá na cidade, comeranos os cans, e os que lle morran no campo, comeranos os paxaros do ceo".

⁵O resto da historia de Baxá, os seus feitos e as súas proezas non están escritos no Libro das Crónicas dos reis de Israel?

⁶Baxá durmiu con seus pais, e enterrárono en Tirsah. Sucedeulle no trono o seu fillo Elah.

⁷Polo profeta Iehú, fillo de Hananí, veu a palabra do Señor contra Baxá e contra a súa familia, por culpa do mal que fixera ós ollos do Señor, por anoxalo cos seus feitos, coma a familia de Ieroboam, e porque exterminou esta familia.

⁸No ano vinte e seis do reinado de Asá en Xudá empezou a reinar Elah, fillo de Baxá, en Tirsah. Reinou dous anos.

⁹O seu oficial Zimrí, xefe da metade dos carros de guerra, conspirou contra el. Cando Elah estaba emborrachándose en Tirsah, na casa de Arsá, maiordomo do pazo de Tirsah,

¹⁰entrou Zimrí, feriuno e matouno. E no ano vinte e sete do reinado de Asá en Xudá, sucedeulle no trono.

¹¹O primeiro que fixo Zimrí, ó verse sentado no trono, foi matar a toda a familia de Baxá, sen deixar un só varón, un vingador do sangue ou un amigo.

¹²Zimrí exterminou a toda a familia de Baxá, conforme a palabra que dixera o Señor contra Baxá polo profeta Iehú.

¹³Foi por culpa de todos os pecados de Baxá e de Elah, os deles e mais os que fixeran cometer a Israel, anoxando cos seus ídolos ó Señor, seu Deus.

¹⁴O resto da historia de Elah e todo o que fixo non está escrito no Libro das Crónicas dos reis de Israel?

¹⁵Zimrí empezou a reinar no ano vintesete do reinado de Asá en Xudá. Reinou sete días en Tirsah. Cando o pobo que estaba acampado cerca de Guibetón, que pertencía ós filisteos,

¹⁶tivo a nova de que Zimrí se revoltara contra o rei e que o matara, aquel mesmo día, no campamento, Israel enteiro proclamou rei a Omrí, xefe do exército.

¹⁷Omrí e todo Israel rubiron de Guibetón e puxeron cerco a Tirsah.

¹⁸Cando Zimrí viu que a cidade estaba a punto de caer, entrou no pazo real, prendeulle lume e morreu nel.

¹⁹Foi polos pecados que cometera, facendo o mal ós ollos do Señor e seguindo o camiño de Ieroboam e o seu pecado de facer pecar a Israel.

²⁰O resto da historia de Zimrí e a súa revolta, non están escritos no Libro das Crónicas dos reis de Israel?

²¹Daquela, o pobo de Israel dividiuse en dous bandos. A metade seguía a Tibní, fillo de Guinat, e quería facelo rei. A outra metade seguía a Omrí.

²²Os partidarios de Omrí prevaleceron sobre os de Tibní, fillo de Guinat. Tibní caeu morto, e Omrí foi rei.

²³Omrí empezou a reinar sobre Israel no ano trinta e un do reinado de Asá en Xudá. Reinou doce anos, seis deles en Tirsah.

²⁴Mercoulle a Sémer a montaña de Samaría por dous talentos de prata, e construíu nela unha cidade, á que chamou Samaría, polo nome de Sémer, que fora o dono da montaña.

²⁵Omrí fixo o mal ós ollos do Señor. Foi peor aínda cós seus antecesores.

²⁶Seguiu o mesmo camiño ca Ieroboam, fillo de Nabat, e caeu nos pecados que el fixera cometer a Israel, anoxando cos seus ídolos ó Señor, Deus de Israel.

²⁷O resto da historia de Omrí, os seus feitos e as súas proezas, non están escritos no Libro das Crónicas dos reis de Israel?

²⁸Omrí durmiu con seus pais, e enterrárono en Samaría. Sucedeulle no trono o seu fillo Acab.

²⁹Acab, fillo de Omrí, empezou a reinar en Israel no ano trinta e oito do reinado de Asá en Xudá. Reinou sobre Israel en Samaría vinte e dous anos.

³⁰Acab, fillo de Omrí, fixo o mal ós ollos do Señor, peor ca todos os seus antecesores.

³¹Como se fose pouco caer nos pecados de Ieroboam, fillo de Nabat, colleu por muller a Iezabel, filla de Etbaal, rei dos sidonios, e chegou a dar culto a Baal e prostrarse diante del.

³²Ergueu un altar a Baal, na ermida que lle construíra en Samaría, e levantou unha Axerah.

³³Provocou o noxo do Señor, Deus de Israel, cada vez máis, peor ca todos os reis que houbera antes del en Israel.

³⁴No seu tempo, Hiel de Betel reconstruíu Xericó. Botoulle os cimentos co pago da vida de Abiram, seu primoxénito, e púxolle as portas co pago da vida do máis novo, Seguib, conforme a palabra do Señor por Xosué, fillo de Nun.