Read Biblia SEPT 1 Reis 5 Bible Online

1 Reis 5 - Biblia SEPT bible

1 Reis 5

¹Salomón tiña poder sobre todos os reinos que van desde o río Éufrates ata o país dos filisteos e as fronteiras de Exipto. Pagábanlle tributos e estivéronlle todos sometidos ó longo da súa vida.

²As provisións de Salomón eran para cada día trinta cargas de flor de fariña e setenta de fariña corrente,

³dez bois cebados, vinte becerros e cen ovellas; e, por parte, veados, corzos, parrulos e capóns.

⁴Salomón tiña poder sobre as terras de máis alá do río Éufrates, desde Tifsah ata Gaza, e sobre todos os reinos desta banda do mesmo río. Estivo en paz con todos os veciños do arredor.

⁵Nos días de Salomón, Xudá e Israel vivían tranquilos, cada un debaixo da súa parra e da súa figueira, desde Dan ata Beerxeba.

⁶Salomón tiña cortes para corenta mil cabalos de tiro e doce mil de montura.

⁷Os gobernadores, un por mes, provían ás necesidades de Salomón e dos que comían á súa mesa, sen que lles faltase cousa ningunha.

⁸Cada un pola súa vez subministraba tamén orxo e palla para os cabalos de tiro e de montura.

⁹Deus concedeu a Salomón sabedoría e moito entendemento e unha mente tan aberta coma as praias da beiramar.

¹⁰Avantaxaba en sabedoría ós sabios de Oriente e ós de Exipto.

¹¹Era o máis sabio dos homes, máis ca Etán o indíxena e máis ca Hemán, Calcol e Dardá, fillos de Mahol. A súa sona estendíase polas nacións do arredor.

¹²Formulou tres mil sentenzas e compuxo mil cinco cancións.

¹³Disertou sobre as árbores, desde o cedro do Líbano ata a herba sagrada que medra nas paredes, acerca dos animais e das aves, dos reptís e dos peixes.

¹⁴De todos os pobos viñan xentes, para escoitar o sabio Salomón, de todos os reinos da terra onde chegara a sona de súa sabedoría.

¹⁵Cando Hiram, rei de Tiro, tivo a nova de que Salomón fora unxido rei, no posto do pai, mandoulle os seus embaixadores, pois Hiram fora sempre amigo de David.

¹⁶Salomón, pola súa parte, mandoulle a Hiram esta embaixada:

¹⁷—"Ti sabes que meu pai David non puido edificar un templo ó Señor, seu Deus, por causa das guerras que o envolveron, mentres Deus non puxo os seus inimigos debaixo dos seus pés.

¹⁸Agora o Señor meu Deus deume paz polos arredores, e non teño inimigos nin outras calamidades.

¹⁹Por iso estou proxectando edificar un templo ó nome do Señor meu Deus, conforme o Señor dixera a meu pai David: o fillo que che darei para que te suceda no teu trono, el será quen edifique un templo ó meu nome.

²⁰Agora, pois, manda que corten para min cedros do Líbano. Os meus servos irán cos teus, e eu pagareilles o xornal que ti me digas. Ti sabes que entre nós non hai quen saiba, coma os fenicios, talar árbores".

²¹En oíndo Hiram a mensaxe de Salomón, folgouse moito e exclamou: —"Bendito sexa hoxe o Señor, que deu a David un fillo sabio, para gobernar este gran pobo".

²²E Hiram mandou dicir a Salomón: —"Acepto a túa petición. Compracereite como desexas, no tocante á madeira de cedro e de ciprés.

²³Os meus servos baixarán a madeira desde o Líbano ó mar. De alí levarana logo en balsas ata o lugar que ti sinales. Alí desfaremos as balsas, e ti faraste cargo. Pola túa parte, ti cumprirás a miña arela, se abasteces a miña casa".

²⁴Hiram deulle a Salomón toda a madeira que quixo de cedro e de ciprés.

²⁵E Salomón deulle a Hiram, para sustento da súa casa, vinte mil cargas de trigo e vinte mil medidas de aceite puro de oliveira. Iso era o que Salomón lle daba cada ano a Hiram.

²⁶O Señor concedeu a Salomón sabedoría segundo a promesa. Entre Hiram e Salomón había paz, e fixeron un pacto entre os dous.

²⁷O rei Salomón recrutou traballadores por todo Israel, unha leva de trinta mil homes.

²⁸Mandounos ó Líbano en quendas de dez mil cada mes. Un mes estaban no Líbano e dous nas súas casas. Adoniram era o xefe da leva dos traballadores.

²⁹Por parte, Salomón tiña setenta mil homes dedicados ó carrexo, e oitenta mil canteiros na montaña,

³⁰Ademais dos capataces das obras, que eran tres mil trescentos; estes mandaban na xente que facía os traballos.

³¹O rei mandou que extraesen pedras grandes, escolleitas, pedras de cantería, para os fundamentos do templo.

³²Os obreiros de Salomón, os de Hiram e os guiblitas labraban a madeira e preparaban a pedra para a obra do templo.