Read Biblia SEPT 1 Reis 6 Bible Online

1 Reis 6 - Biblia SEPT bible

1 Reis 6

¹O ano catrocentos oitenta da saída dos israelitas de Exipto, no mes de Ziv, que é o segundo do ano, no mes cuarto do reinado de Salomón en Israel, empezou a construírse o templo do Señor.

²O templo que o rei Salomón construía en honor do Señor, medía trinta metros de lonxitude, dez de anchura e quince de altura.

³O pórtico que había diante da nave do santuario tiña dez metros de lonxitude, no sentido da anchura do santuario, e cinco de fondo, ata a parede do templo.

⁴No templo fixo fiestras, con marcos e con reixas.

⁵Pegado ó muro do templo, arredor do santuario e do santísimo, construíu un anexo, con andares arredor.

⁶O piso baixo medía dous metros e medio de anchura, o do medio medía tres, e o terceiro tres metros e medio de anchura. Arredor do templo, por afora, fixera canzorros, para que as trabes non entrasen nos mesmos muros do templo.

⁷Na construción do templo empregáronse pedras labradas na canteira, de xeito que, na hora do traballo, non se oían martelos, machetas nin outras ferramentas.

⁸A entrada do piso baixo estaba á dereita do templo. Por unha esqueira de caracol subíase ó andar do medio, e desde este ó terceiro.

⁹Cando o templo quedou construído, Salomón recubriuno cun artesoado de madeira de cedro.

¹⁰O anexo que construíra arredor do templo tiña dous metros e medio de altura, e estaba ligado por trabes de cedro ó templo mesmo.

¹¹Daquela, Deus faloulle a Salomón:

¹²—"Por este templo que me estás construíndo, se camiñas conforme os meus mandatos e cumpres as miñas decisións, se gardas os meus preceptos e te guías por eles, eu mantereiche a promesa que fixen a teu pai David.

¹³Habitarei no medio dos israelitas e non abandonarei este meu pobo de Israel".

¹⁴Cando Salomón acabou de construír o templo,

¹⁵revestiu os muros por dentro de táboas de cedro, desde o pavimento ata o teito; revestiu de madeira todo o seu interior e pisouno de táboas de ciprés.

¹⁶Revestiu de táboas de cedro os dez metros de fondo, desde o pavimento ó teito, e dedicou esta parte a camarín ou santísimo.

¹⁷Os outros vinte metros diante del constituían o santuario.

¹⁸O cedro do interior do santuario estaba enfeitado de grilandas de flores abertas. Era todo de cedro, e a pedra non se vía.

¹⁹O camarín, no fondo interior do templo, estaba preparado para colocar alí a Arca da Alianza do Señor.

²⁰O camarín tiña dez metros de longo, dez de ancho e dez de alto. Salomón revestiuno de ouro puro. O altar revestiuno de cedro.

²¹Revestiu tamén de ouro puro o interior do templo; puxo cadeas de ouro diante do camarín e recubriu este de ouro.

²²De ouro revestiu o templo todo, desde o cimo ata o fondo; e tamén o altar, diante do camarín.

²³Para o camarín fixo Salomón dous querubíns, de madeira de oliveira, de cinco metros de altura.

²⁴A á dun querubín medía dous metros e medio, e dous metros e medio a outra, de xeito que do cabo dunha ó cabo doutra había cinco metros.

²⁵O outro querubín medía igualmente cinco metros. Os dous tiñan o mesmo grandor e a mesma feitura.

²⁶Tanto un coma outro medían cinco metros de altura.

²⁷Salomón puxo os querubíns dentro do camarín, coas ás estendidas, de xeito que unha daba nun muro e a outra no muro oposto. As outras dúas ás tocábanse entre elas, no medio do recinto.

²⁸Os querubíns estaban revestidos de ouro.

²⁹Sobre as paredes do templo, por toda a volta, fixo gravar por dentro e por fóra, baixorrelevos de querubíns, de palmeiras e de grilandas de flores.

³⁰O lousado do templo, tanto na parte interior coma na exterior, recubriuno tamén de ouro.

³¹Para a entrada do camarín fixo portas de madeira de oliveira, con xambas de cinco arestas.

³²Nas dúas follas das portas de oliveira fixo gravar baixorrelevos de querubíns, de palmeiras e de grilandas de flores, e recubriunas de ouro, ben axustado ás entalladuras.

³³Para a entrada do santuario fixo xambas de oliveira, con catro arestas

³⁴e con dúas portas de madeira de ciprés, cada unha con dúas follas xiratorias.

³⁵Esculpiu nelas querubíns, palmeiras e grilandas de flores, e recubriunas de ouro, axustado ás entalladuras.

³⁶Construíu a adro interior, con tres ringleiras de pedras talladas e unha de trabes de cedro.

³⁷No mes de Ziv do ano cuarto do seu reinado, puxo Salomón os cimentos do templo do Señor,

³⁸e no mes de Bul, que é o oitavo, do ano once do reinado, quedou rematado en todas as súas partes, conforme o seu proxecto. Construíu todo en sete anos.