Read Biblia SEPT 1 Reis 7 Bible Online

1 Reis 7 - Biblia SEPT bible

1 Reis 7

¹En canto ó pazo real, Salomón empregou para construílo trece anos.

²Edificou primeiro o "Bosque do Líbano", unha sala que medía cincuenta metros de lonxitude, vinte e cinco de anchura e quince de alto, sobre catro ringleiras de columnas de cedro, que sostiñan trabes de cedro.

³Por riba das trabes que se apoiaban nas columnas (en todo corenta e cinco, quince por cada fiada), había un teito de cedro.

⁴Levaba tres ringleiras de fiestras, que se correspondían de tres en tres unhas coas outras.

⁵Todas as portas e fiestras levaban marcos rectangulares. As fiestras correspondíanse nas tres ringleiras entre elas.

⁶Salomón construíu un pórtico de columnas, de vinte e cinco metros de lonxitude e quince de anchura, e diante del outro pórtico de columnas, cun cuberto diante.

⁷Fixo tamén o pórtico do trono, onde administraba xustiza, a aula xudicial, e recubriuna de madeira de cedro, do pavimento ata o teito.

⁸A súa residencia construíuna no mesmo patio do pórtico, e era da súa mesma feitura. Da mesma feitura era tamén a casa que construíu para a filla do faraón, coa que casara.

⁹Estaba todo construído con pedras escolleitas, labradas á medida, serradas por dentro e por fóra, desde os cimentos ata a cimeira, desde fóra ata o gran adro.

¹⁰Os cimentos era de grandes pezas de pedra escolleita, de cinco por catro metros,

¹¹e por riba tamén de pedras escolleitas, talladas á medida, e de madeira de cedro.

¹²O gran adro levaba arredor tres ringleiras de trabes de cedro, coma o adro interior do templo e o seu pórtico.

¹³O rei Salomón mandou vir de Tiro a Hiram.

¹⁴Este era fillo dunha muller viúva, da tribo de Naftalí, e dun home de Tiro. Traballaba o bronce e estaba dotado de gran coñecemento, pericia e habilidade para facer traballos en bronce. Veu onda o rei Salomón para realizar os seus encargos.

¹⁵Fundiu dúas columnas de bronce, de nove metros de alto e de seis metros de circunferencia, medida coa corda.

¹⁶Para rematar as columnas fixo dous capiteis de bronce fundido, de dous metros e medio de alto cada un deles.

¹⁷Para os capiteis que remataban as columnas fixo trenzados en forma de cadeas, sete para cada capitel.

¹⁸Despois fixo dúas ringleiras de granadas, arredor de cada trenzado, para cubrir os capiteis que remataban as dúas columnas.

¹⁹Os capiteis que remataban as columnas do pórtico tiñan forma de lirio, e medían dous metros.

²⁰Por riba da moldura, que sobresaía do trenzado, eses capiteis tiñan duascentas granadas en ringleira arredor de cada capitel.

²¹Hiram asentou as columnas no pórtico do templo. Primeiro asentou a dereita, e púxolle o nome de Firme; despois asentou a esquerda e deulle o nome de Forte.

²²Os remates das columnas tiñan forma de lirio. Con iso quedou rematada a obra das columnas.

²³Fixo despois Hiram o Mar de Bronce, un depósito redondo, de cinco metros de diámetro, de dous e medio de alto e de quince de circunferencia, medidos coa corda.

²⁴Por debaixo do bordo, por todo o arredor, o depósito tiña botóns gravados, cinco por cada metro. Estaban dispostos en dúas ringleiras, e foran fundidos co Mar, facendo con el unha peza.

²⁵O Mar de Bronce estaba asentado enriba de doce bois. Tres deles miraban para o norte, tres para o occidente, tres para o sur e tres para o nacente; enriba deles ía o depósito. Os cadrís dos bois quedaban todos cara a dentro.

²⁶O Mar de Bronce tiña unha cuarta de grosor; o seu bordo semellaba o dunha copa, coa forma de flor de lirio; a súa capacidade era de oitenta mil litros.

²⁷Hiram fixo tamén dez baseamentos de bronce, cada unha de dous metros de lonxitude, dous de anchura e un e medio de alto.

²⁸Tiñan a seguinte forma: levaban entrepanos encadrados en molduras;

²⁹nos entrepanos entre as molduras había leóns, bois e querubíns; nas molduras, por riba e por baixo dos leóns e dos bois, ían grilandas de flores.

³⁰Cada baseamento levaba catro rodas de bronce, con eixes tamén de bronce. Nos catro pés levaba resaltes fundidos, que sostiñan a pía sobresaíndo das grilandas.

³¹Os baseamentos por dentro, na parte superior, unha boca de medio metro; era redonda e tiña un remate de setenta e cinco centímetros. Arredor da boca levaba uns gravados, en entrepanos cadrados, non redondos.

³²As catro rodas estaban debaixo dos entrepanos e os eixes fixos nos baseamentos. Cada roda medía de diámetro setenta e cinco centímetros.

³³A súa forma era coma a da roda dun carro. Os seus eixes, as cinchas, os radios e os cubos eran todos de metal fundido.

³⁴Os catro resaltes sobre os pés do baseamento formaban un corpo con ela.

³⁵O baseamento remataba nunha peza circular de vinte e cinco centímetros de alto; os seus resaltes e entrepanos formaban un corpo con ela.

³⁶Nos entrepanos gravou Hiram querubíns, leóns e palmeiras, segundo o espazo, con grilandas arredor.

³⁷Deste xeito ficaron acabadas os dez baseamentos de metal fundido, todos de mesma feitura, das mesmas dimensións e co mesmo debuxo.

³⁸Fixo despois Hiram dez pías de metal fundido, unha para cada baseamento de cento sesenta litros de capacidade cada unha delas.

³⁹Colocou cinco baseamentos na banda dereita do templo e cinco na banda esquerda. O Mar de Bronce situouno na banda dereita do templo, ó sueste.

⁴⁰Hiram fixo tamén cinseiros, pás e hisopos. E con iso rematou o que Salomón lle encomendara facer para o templo de Señor.

⁴¹Foron dúas columnas, dous capiteis redondos, que remataban as columnas, dúas grilandas para recubrilos,

⁴²catrocentas granadas para as dúas grilandas, dúas ringleiras de granadas en cada unha das grilandas;

⁴³os dez baseamentos e mais as dez pías enriba delas;

⁴⁴o Mar de Bronce cos doce bois debaixo del;

⁴⁵os cinseiros, as pás e os hisopos. Todos os obxectos que o rei Salomón encargara a Hiram eran de bronce fundido.

⁴⁶O rei fíxoos fundir en moldes de arxila, no val do Xordán, entre Succot e Sartán.

⁴⁷Salomón fixo poñer cada obxecto no seu sitio. Eran tantos, que non se puido botar a conta do que pesaba o seu bronce.

⁴⁸Salomón mandou facer aínda outros obxectos para o templo do Señor: o altar de ouro, a mesa de ouro para poñer enriba dela os pans da proposición;

⁴⁹os candelabros de ouro puro, cinco á dereita e cinco á esquerda, diante do camarín; e, por parte, as flores, as lámpadas e as pinzas de ouro,

⁵⁰As culleres, os coitelos, as cuncas, as copas e os braseiros de ouro puro; os gonzos de ouro para as portas do camarín ou santísimo, e para as do santuario.

⁵¹Cando o que encargara o rei Salomón para o templo do Señor estivo todo acabado, o rei fixo traer as cousas que consagrara seu pai David, prata, ouro e obxectos, e depositou todo no templo do Señor.