Read Biblia SEPT 2 Reis 10 Bible Online

2 Reis 10 - Biblia SEPT bible

2 Reis 10

¹En Samaría vivían setenta fillos de Acab. Iehú escribiu cartas e mandounas a Samaría, ós maxistrados da cidade, ós anciáns e ós mestres dos fillos de Acab. Nelas dicíalles:

²—"Cando vos chegue esta carta, xa que tedes convosco os fillos do voso señor, e tedes tamén os seus carros, os seus cabalos, unha cidade fortificada e armas,

³vede cal dos fillos do voso señor é o mellor e o máis xusto, sentádeo no trono do seu pai e dispoñédevos a loitar pola familia do voso señor".

⁴Eles, mortos de medo, dixeron: —"Se entre os dous reis non lle puideron facer fronte, como lla faremos nós?"

⁵Entón o mordomo do pazo, o gobernador da cidade, os anciáns e os mestres mandáronlle dicir a Iehú: —"Nós somos todos servos teus e faremos o que nos mandes. Non elixiremos ningún rei. Fai ti como che pareza".

⁶Iehú escribiulles outra carta, na que dicía: —"Se vós estades comigo e me obedecedes, vinde onda min a Iezrael, mañá destas horas, e traédeme as cabezas dos fillos do noso señor". Os setenta fillos do rei estaban cos grandes da cidade, que os criaban.

⁷En recibindo eles a carta, colleron ós fillos do rei, mataron ós setenta, puxeron en cestos as cabezas e mandáronllas a Iehú, a Iezrael.

⁸Entrou onda el o recadeiro e anuncioulle: —"Trouxeron as cabezas dos fillos do rei". E el ordenou: —"Poñédeas en dous montóns, ás portas da cidade, ata mañá pola mañá".

⁹Pola mañá saíu Iehú, e en pé diante de toda a xente, dixo: —"Vós sodes inocentes. Eu conspirei contra o meu señor e mateino. Pero a todos estes quen os matou?

¹⁰Vede como non cae polo chan ningunha das palabras que dixera o Señor contra a familia de Acab. O Señor cumpre o que dixo polo seu servo Elías".

¹¹Iehú acabou tamén cos que quedaban da casa de Acab en Iezrael, os grandes, os parentes, os sacerdotes, sen deixar restos de ninguén.

¹²Despois colleu e foise a Samaría. Cando, polo camiño, chegaba a Bet—Équed—Haroim,

¹³Atopouse Iehú cos irmáns de Ocozías, rei de Xudá, e preguntoulles: —"Vós, quen sodes?" Respondéronlle eles: —"Somos irmáns de Ocozías e imos visitar os fillos do rei e os fillos da raíña".

¹⁴Iehú ordenou: —"Collédeos vivos". Colléronos vivos, e logo esganáronos onda a balsa de Bet—Équed. Eran corenta e dous homes, e non quedou sequera un.

¹⁵Iehú seguiu máis adiante e encontrouse con Ionadab, fillo de Recab, que viña ó seu encontro. Iehú saudouno e preguntoulle: —"Es ti sincero comigo, coma o son eu contigo?" Ionadab respondeulle: —"Son". —"Entón dáme a man". El deulle a man, e Iehú gurrou del para o seu carro.

¹⁶E díxolle: —"Vén comigo e verás o meu celo polo Señor". E levouno con el no seu carro.

¹⁷Iehú entrou en Samaría e matou os que quedaban alí da casa de Acab, ata acabar con toda a familia, como dixera o Señor por medio de Elías.

¹⁸Despois reuniu Iehú ó pobo todo e faloulles: —"Acab serviu un pouco a Baal; Iehú servirao moito máis.

¹⁹Convocade onda min a todos os profetas de Baal, os seus adoradores e os seus sacerdotes. Que non falte ningún, porque quero ofrecer a Baal un gran sacrificio. Aquel que falte non vivirá". Iehú procedía arteiramente, para ver de acabar dunha vez con todos os adoradores de Baal.

²⁰Logo ordenou: —"Convocade asemblea santa en honor de Baal". E convocárona.

²¹Iehú mandou recado por todo Israel, e viñeron todos os devotos de Baal, sen fallar nin sequera un. Reuníronse todos no santuario de Baal, que se encheu de parede a parede.

²²Iehú ordenoulle ó garda do vestiario: —"Tira vestiduras para os devotos de Baal". E el tirou vestiduras para todos.

²³Niso entrou Iehú con Ionadab, fillo de Recab, no templo de Baal e díxolles ós seus adoradores: —"Asegurádevos de que non hai entre vós ningún servidor do Señor, senón só os devotos de Baal".

²⁴Entón comezaron a ofrecer sacrificios e holocaustos. Iehú apostara fóra oitenta homes, con esta encomenda: —"O que deixe zafarse un destes homes que poño nas vosas mans, pagará por el coa súa vida".

²⁵Cando acabaron de ofrecer o holocausto, Iehú mandou ós gardas e ós oficiais: —"Entrade e matádeos. Que non fuxa ningún". Os gardas e os oficiais matáronos a fío de espada, e despois botáronos fóra. Entraron logo no camarín de Baal,

²⁶retiraron del a estela e queimárona,

²⁷destruíron o altar de Baal, derrubaron o templo e convertérono en esterqueira, ata hoxe.

²⁸Deste xeito foi como acabou Iehú con Baal en Israel.

²⁹Pero Iehú non se afastou dos pecados que Ieroboam, fillo de Nabat, fixera cometer a Israel, cos becerros de ouro de Betel e de Dan.

³⁰O Señor comunicoulle: —"Xa que tiveches un bo comportamento, facendo o que é xusto ós meus ollos, e trataches como eu decidira á familia de Acab, os teus fillos sentarán no trono de Israel, ata a cuarta xeración".

³¹Pero Iehú non procurou seguir a lei do Señor, Deus de Israel, con todo o seu corazón. Non se afastou dos pecados que Ieroboam fixera cometer a Israel.

³²Entón empezou o Señor a minguar o territorio de Israel. Hazael bateuno en todas as fronteiras,

³³des—de o Xordán cara ó nacente, cos territorios de Galaad, de Gad, de Rubén e de Menaxés, e desde Aroer, que está onda o Arnón, ademais de Galaad e de Baxán.

³⁴O resto da historia de Iehú, os seus feitos e as súas fazañas, non está todo escrito no Libro das Crónicas dos reis de Israel?

³⁵Iehú adormeceu con seus pais, e enterrárono en Samaría. Sucedeulle no trono o seu fillo Ioacaz.

³⁶Iehú reinara vinte e oito anos sobre Israel, en Samaría.