Read Biblia SEPT 2 Reis 17 Bible Online

2 Reis 17 - Biblia SEPT bible

2 Reis 17

¹No ano doce do reinado de Acaz en Xudá empezou a reinar sobre Israel, en Samaría, Oseas, fillo de Elah. Reinou nove anos.

²Fixo o mal ós ollos do Señor, mais non coma os reis de Israel que o precederan.

³Xalmanasar, rei de Asiria, rubiu para atacalo; pero Oseas sometéuselle e pagoulle tributo.

⁴Máis tarde o rei de Asiria descubriu que Oseas se revolvera contra el, pois mandara mensaxeiros a So, rei de Exipto, e non pagaba ó rei de Asiria o tributo, coma todos os anos. Entón o rei de Asiria prendeuno e púxoo na cadea.

⁵Despois o rei de Asiria invadiu o país enteiro e cercou Samaría por tres anos.

⁶No ano noveno de Oseas, o rei de Asiria conquistou Samaría e desterrou os israelitas a Asiria. Instalounos en Halah, onda o Habor, río de Gozán, e nas cidades de Media.

⁷Iso aconteceu porque os israelitas pecaron contra o Señor, seu Deus, que os tirara de Exipto, do xugo do faraón, rei de Exipto; pero eles adoraron outros deuses.

⁸Seguiron os costumes das nacións que o Señor expulsara de diante deles, costumes que os reis de Israel introduciron.

⁹Os israelitas fixeron o mal na presenza do Señor, seu Deus: construíron altares idolátricos en todos os seus poboados, desde torres de vixilancia ás cidades fortificadas,

¹⁰e ergueron estelas e imaxes de Axtarté en todos os outeiros e debaixo de toda árbore vizosa.

¹¹Alí queimaron incenso, coma as nacións que o Señor expulsara de diante deles; cometeron maldades, que provocaron o noxo do Señor.

¹²Deron culto ós ídolos, feito do que tiña dito o Señor: —"Non fagades tal cousa".

¹³O Señor advertira a Israel e a Xudá polos profetas e os videntes: —"Deixádevos dos malos camiños e gardade os mandamentos, os preceptos e as leis, que eu prescribín ós vosos pais e que vos inculquei a vós polos meus servos os profetas".

¹⁴Pero eles non obedeceron. Fixéronse testáns, o mesmo cós seus pais, que non confiaran no Señor, seu Deus.

¹⁵Rexeitaron os seus mandatos, a alianza que el concluíra con seus pais, e os avisos que lles dera. E fóronse detrás de vaidades, facéndose vans eles mesmos, e coas xentes dos seus arredores, aínda que o Señor lles mandara que non fixesen coma eles.

¹⁶Deixaron os mandamentos do Señor, seu Deus, e fixéronse ídolos de metal fundido, dous becerros e unha estela; axeonlláronse perante todo o exército dos astros e déronlle culto a Baal.

¹⁷Sacrificaron no lume os seus fillos e as súas fillas. Practicaron artes de mal agoiro e bruxerías, vendéronse, facendo o mal ós ollos do Señor, provocando a súa carraxe.

¹⁸O Señor anoxouse tanto contra Israel, que o desbotou da súa presenza. Non quedou máis cá tribo de Xudá;

¹⁹mesmo tampouco Xudá gardou os mandatos do Señor, seu Deus, e imitou a conduta de Israel.

²⁰O Señor rexeitou a liñaxe de Israel, aflixiunos e entregounos nas mans dos seus espoliadores, e botounos da súa presenza.

²¹Israel afastárase da familia de David e elixira por rei a Ieroboam, fillo de Nabat. E Ieroboam desviara a Israel do culto do Señor e fixéralle cometer graves pecados.

²²Os israelitas imitaron os pecados que cometera Ieroboam, sen arredarse en nada del,

²³Ata que Deus os botou da súa presenza, como llo tiña advertido polos seus servos os profetas. Israel foi deportado da súa terra para Asiria, onde está ata hoxe.

²⁴O rei de Asiria trouxo alí xentes de Babilonia e de Cutah, de Avá, Hamat e Sefarvaim, e asentounas nas cidades de Samaría, no lugar dos israelitas. Esas xentes tomaron posesión de Samaría e establecéronse alí, nas súas cidades.

²⁵Desde o comezo do seu asentamento non recoñeceron ó Señor, e o Señor enviou leóns, que mataron a moitos deles.

²⁶Daquela fixéronlle saber ó rei de Asiria: —"As xentes que transferiches, para asentalas nas cidades de Samaría, non coñecen o culto do deus do país. Este manda leóns que os matan, porque eles non coñecen o seu culto".

²⁷Entón deu o rei de Asiria esta orde: —"Levade un dos sacerdotes desterrados, que se estableza alí e que lles aprenda o culto do Deus do país".

²⁸Axiña veu un dos sacerdotes desterrados de Samaría, estableceuse en Betel e aprendíalles a maneira de dar culto ó Señor.

²⁹Pero cada un daqueles pobos fixo os seus deuses e puxéronos nos outeiros que os samaritanos construíran, cada pobo na mesma cidade en que asentaran.

³⁰Os de Babilonia fixeron unha imaxe de Succot—Benot, os de Cut unha de Nergal, os de Hamat a de Aximá,

³¹os de Avá a de Nibhaz e a de Tartac, os de Sefarvaim sacrificaban no lume os seus fillos en honor de Adramélec e de Anamélec, que eran os seus deuses.

³²Tamén daban culto ó Señor e escolleron sacerdotes de entre a xente común, para que ofrecesen sacrificios por eles nos outeiros.

³³Veneraban o Señor e, ó mesmo tempo, os seus deuses, conforme os ritos do país de onde viñeran desterrados.

³⁴Ata o día de hoxe seguen practicando os ritos máis antigos. Non temen o Señor e non viven conforme os seus mandatos, os seus estatutos e a súa lei e ós preceptos que o Señor prescribira ós fillos de Xacob, a quen puxera por nome Israel.

³⁵O Señor fixera con eles un pacto e prescribíralles: —"Non temeredes outros deuses, non os adoraredes, non os serviredes, non lles ofreceredes sacrificios.

³⁶Temeredes o Señor, que con moito poder do seu forte brazo vos tirou do país de Exipto. Soamente a El adoraredes e ofrecerédeslle os vosos sacrificios.

³⁷Cumpride talmente, toda a vida, os seus mandamentos e os seus estatutos, a súa lei e os seus preceptos, os que El vos deu por escrito. E non adoredes outros deuses.

³⁸Non esquezades a Alianza que eu fixen convosco adorando outros deuses.

³⁹Adorade soamente ó Señor, voso Deus, e El libraravos do poder de todos os vosos inimigos".

⁴⁰Mais eles non o obedeceron, senón que seguiron vivindo segundo os antigos costumes.

⁴¹Dese xeito, aquela xente adoraba ó Señor e, ó mesmo tempo, dáballes culto ós seus ídolos. Os seus fillos e os seus netos seguen facendo o mesmo cós seus pais, ata o día de hoxe.