Read Biblia SEPT 2 Reis 22 Bible Online

2 Reis 22 - Biblia SEPT bible

2 Reis 22

¹Ioxías tiña oito anos cando empezou a reinar. Reinou trinta e un anos en Xerusalén. A súa nai chamábase Iedidah, filla de Adaías, de Boscat.

²Fixo o que é debido ós ollos do Señor, andou polo camiño de seu pai David, sen desviarse nin á dereita nin á esquerda.

³No ano dezaoito do seu reinado mandou Ioxías o secretario Xafán, fillo de Asalías, fillo de Mexulam, ó templo do Señor, con este encargo:

⁴—"Vai onda o sumo sacerdote Hilquías, que colla o diñeiro ingresado no templo do Señor, recollido da xente polos gardas da entrada,

⁵e que llelo entregue ós capataces encargados das obras do templo do Señor, para que estes paguen ós que traballan na reparación das avarías do edificio,

⁶carpinteiros, canteiros e albaneis, e para mercar a madeira e a pedra de cantería que requiran as obras.

⁷Que non se lles pidan contas do diñeiro que lles encomendan, pois son xente de fiar".

⁸O sumo sacerdote Hilquías díxolle ó secretario Xafán: —"Atopei o libro da Lei no templo do Señor". Hilquías entregoulle o libro a Xafán, e este leuno.

⁹O secretario Xafán foi onda o rei, para darlle conta do feito: —"Os teus servidores recolleron o diñeiro que había no templo e entregáronllelo ós capataces, encargados das obras do templo do Señor".

¹⁰E despois o secretario Xafán deulle a nova ó rei: —"O sacerdote Hilquías deume este libro". E Xafán leuno alí, diante do rei.

¹¹Cando oíu o rei as palabras do libro da Lei, rachou as súas vestiduras

¹²e mandou ó sacerdote Hilquías, a Ahicam, fillo de Xafán, a Acbor, fillo de Miqueas, ó secretario Xafán e a Asaías, oficial do rei:

¹³—"Ide consultar o Señor, por min, polo pobo e por todo Xudá, sobre o contido deste libro que atoparon. Moi grande ten que ser a carraxe do Señor, acesa contra nós, porque os nosos pais non fixeron caso das palabras deste libro e non cumpriron o que está escrito nel".

¹⁴Foron o sacerdote Hilquías, Ahicam, Acbor, Xafán e Asaías onda a profetisa Huldah, muller de Xalum, garda do vestuario, fillo de Ticvah, fillo de Harhás. Vivía no segundo barrio de Xerusalén. Falaron con ela,

¹⁵e ela respondeulles: —"Isto di o Señor, Deus de Israel:

¹⁶Dicídelle a quen vos mandou onda min que isto di o Señor: vou traer sobre este lugar e sobre os seus moradores unha desgraza: todas esas maldicións que están no libro que leu o rei de Xudá.

¹⁷Visto que eles me abandonaron a min e queimaron incenso a outros deuses, provocándome coas obras das súas mans, a miña carraxe está ardendo contra este lugar, e non se apagará.

¹⁸E ó rei de Xudá, que vos mandou consultar o Señor, dicídelle: isto di o Señor, Deus de Israel: xa que, cando oíches ler o libro,

¹⁹se che conmoveu o corazón e te humillaches diante do Señor, e xa que cando oíches o que eu dixen contra este lugar e contra os seus moradores, que se verían todos convertidos en espanto e en maldición, ti rachaches as vestiduras e choraches diante de min, por iso tamén eu te escoito a ti. Palabra do Señor.

²⁰Polo mesmo, cando eu te recolla con teus pais, levarante en paz ó teu sartego. Os teus ollos non terán que ver a desgraza que traerei contra este lugar". Os enviados deron volta e informaron ó rei.