Read Biblia SEPT 2 Reis 8 Bible Online

2 Reis 8 - Biblia SEPT bible

2 Reis 8

¹Eliseo díxolle á nai do neno que el reanimara: —"Vai, colle a túa familia, e ide vivir onde vos pareza; porque o Señor chamou a fame, e asoballará este país por sete anos".

²A muller puxo por feito o que home de Deus lle dicía. Foise coa súa familia á terra dos filisteos e estivo alí sete anos.

³O cabo dos sete anos, regresou de onda os filisteos, e foi reclamar cabo do rei a súa casa e os seus eidos.

⁴O rei estaba nese intre de conversa con Guehazí, criado do home de Deus, pedíndolle que lle contase os milagres que tiña feito Eliseo.

⁵Cando lle estaba referindo como fixera revivir un neno morto, presentouse alí a nai do neno, reclamando do rei a súa casa e os seus eidos. Guehazí dixo: —"Rei, meu señor, esta é a muller e este é o neno que Eliseo reanimou".

⁶O rei interrogou entón á muller, e ela contoulle todo. Despois puxo o rei un oficial ás súas ordes, con este mandato: —"Fai que lle volvan a esta muller todo o que é dela, xunto cos réditos da terra, desde o día en que a abandonou ata agora".

⁷Eliseo chegouse logo a Damasco. Benhadad, rei de Aram, atopábase doente, e anunciáronlle que chegara alí o home de Deus.

⁸Entón díxolle o rei a Hazael: —"Leva contigo un regalo, vai onda o home de Deus e consulta por el o Señor se sandarei ou non desta doenza".

⁹Hazael foi axiña onda o home de Deus, levando consigo un regalo de corenta camelos cargados cos mellores produtos de Damasco. Chegou alá e presentóuselle, dicindo: —"O teu fillo Benhadad, rei de Aram, mandou que che consultase se o rei sandará desta doenza".

¹⁰Eliseo respondeulle: —"Vai e dille que certamente sandará desa doenza. Pero o Señor reveloume que sen remedio vai morrer".

¹¹Despois o home de Deus quedou coa cara fixa, aquelado e turbado, e botouse a chorar.

¹²Hazael preguntoulle: —"Por que chora o meu señor?" El respondeulle: —"Porque sei o dano que ti farás ós israelitas: queimarás as súas facendas, matarás coa espada os máis novos, esmagarás os seus nenos e fenderás as mulleres embarazadas".

¹³A iso dixo Hazael: —"Pero quen é o teu servo, este can, para que poida facer cousas tan terribles?" Respondeulle Eliseo: —"O Señor fíxome ver que serás rei de Aram".

¹⁴Hazael marchou de onda Eliseo e volveu onda o seu amo. Este preguntoulle que lle dixera Eliseo. El respondeulle: —"Díxome que sandarás".

¹⁵O día seguinte colleu Hazael un cobertor, ensopouno de auga, estendeullo enriba da cara, e o rei morreu. Hazael sucedeulle no trono.

¹⁶No ano quinto do reinado de Ioram, fillo de Acab, en Israel, empezou a reinar en Xudá Ioram, fillo de Ioxafat.

¹⁷Tiña trinta e dous anos e reinou oito anos en Xerusalén.

¹⁸Seguiu o camiño dos reis de Israel, como fixera a familia de Acab, de quen tomou unha filla por muller. Fixo o mal ós ollos do Señor.

¹⁹Mais o Señor non quixo esmagar a Xudá (aínda con iso), por mor do seu servo David, a quen prometera manterlle sempre unha lámpada, a el e a seus fillos.

²⁰Nos días de Ioram revirouse Edom contra o dominio de Xudá e proclamouse un rei.

²¹Ioram pasou a Seir con todos os seus carros. Erguéndose de noite, desbaratou os edomitas que o tiñan cercado a el e ós xefes dos carros. Pero o exército fuxiu para as súas tendas.

²²Así foi como Edom quedou ceibe de Xudá ata o día de hoxe. Naquela ocasión revirouse tamén Libnah.

²³O resto da historia de Ioram, todo o que fixo, non está escrito no Libro das Crónicas dos reis de Xudá?

²⁴Ioram adormeceu con seus pais, e enterrárono con eles na cidade de David. Sucedeulle no trono o seu fillo Ocozías.

²⁵No ano doce do reinado de Ioram, fillo de Acab, en Israel, empezou a reinar en Xudá Ocozías, fillo de Ioram.

²⁶Ocozías tiña entón vinte e dous anos, e reinou un ano en Xerusalén. A súa nai chamábase Atalía, filla de Omrí, rei de Israel.

²⁷Ocozías seguiu o camiño da familia de Acab, facendo o mal ós ollos do Señor, como a familia de Acab coa que emparentara.

²⁸Ocozías foi con Ioram, fillo de Acab, loitar contra Hazael, rei de Aram, en Ramot de Galaad. Daquela os arameos feriron a Ioram.

²⁹Para curarse das feridas dos arameos en Ramot, no combate contra Hazael, rei de Aram, o rei Ioram volveuse a Iezrael. Estando alí doente, foi visitalo Ocozías, fillo de Ioram, rei de Xudá.