Read Biblia SEPT 1 Crónicas 12 Bible Online

1 Crónicas 12 - Biblia SEPT bible

1 Crónicas 12

¹Estes son os que viñeron a unirse a David en Siquelag, cando estaba lonxe de Xaúl fillo de Quix. Eran algúns dos soldados que lle prestaron axuda durante a guerra.

²Eran arqueiros e tiraban pedras o mesmo coa man dereita que coa esquerda e tiraban frechas co arco. Eran todos de Benxamín, do clan dos irmáns de Xaúl.

³Os xefes eran Ahiézer e Ioax, fillos de Xemaah, de Guibah; Ieziel e Pélet, fillos de Azmávet; Beracah e Iehú, de Anatot;

⁴Ixmaías, de Gabaón, soldado entre os trinta e xefe dos trinta;

⁵Xeremías, Iahziel, Iohanán, Iozabad, de Guederah;

⁶Eluzai; Ierimot, Balías, Xemarías, e Xefatías, de Harif;

⁷Elcanah, Isaías, Azarel, Ioézer e Iaxobam, descendentes de Coré;

⁸Ioelah e Zebadías, fillos de Ieroham, de Guedor.

⁹Tamén de entre os gaditas foron unirse a David, no refuxio do deserto, soldados entendidos na guerra, armados de escudo e lanza, semellantes a leóns e lixeiros coma cabras do monte.

¹⁰Ézer era o xefe; Abdías, o segundo; Eliab, o terceiro;

¹¹Mixmanah, o cuarto; Xeremías, o quinto;

¹²Ataí, o sexto; Eliel, o sétimo;

¹³Iohanán o oitavo; Elzabad, o noveno;

¹⁴Xeremías, o décimo; Macbanai, o undécimo.

¹⁵Eran fillos de Gad, xefes do exército. Un só, o menor de todos, valía por cen; o máis vello, por mil.

¹⁶Estes foron os que pasaron o Xordán no primeiro mes, cando desbordaba por todas as súas beiras, e puxeron en fuga a todos os habitantes dos vales, a oriente e occidente.

¹⁷Houbo tamén entre os fillos de Benxamín e de Xudá quen se uniu a David no refuxio.

¹⁸David saíulles ó encontro e díxolles: —"Se vindes a min con boas intencións, para axudarme, o meu corazón farase a vós, pero se é para enganarme en proveito dos meus inimigos, estando as miñas mans limpas de iniquidade, véxao o Deus de nosos pais, e que el xulgue".

¹⁹Entón revestiuse do espírito Amasai, que era o xefe dos trinta, e exclamou: —"Paz a ti e ó pobo, fillo de Ixaí. Paz a ti e a cantos te axudan, pois o teu Deus está da túa parte". David recibiunos e fíxoos xefes das tropas.

²⁰Tamén dos fillos de Menaxés, viñeron algúns xuntarse con David cando foi cos filisteos á batalla contra Xaúl, aínda que non combateu, porque os príncipes dos filisteos, celebrando o consello, despedírono dicindo: —"Pasaríase a Xaúl, con perigo das nosas cabezas".

²¹Cando marchou de Siquelag, estes foron os que se lle uniron de Menaxés: Adnah, Iozabad, Iediel, Micael, Iozabad, Elihú e Siltai, xefes de millares de Menaxés.

²²Axudaron a David contra as bandas de ladróns, pois eran todos homes valerosos e viñeron ser xefes do exército.

²³Día a día chegaban xentes a unirse a David, ata que deu en ter un gran exército, coma un exército de Deus.

²⁴Velaquí o número de homes de guerra que armados viñeron a David, a Hebrón, para transferirlle o reino de Xaúl, segundo o mandato de Iavé:

²⁵Dos fillos de Xudá armados de escudo e lanza, seis mil oitocentos homes de guerra.

²⁶Dos fillos de Simeón, homes valorosos para a guerra, sete mil cen.

²⁷Dos fillos de Leví, catro mil seiscentos;

²⁸e Iehoiadá, príncipe de Aharón, e con el tres mil setecentos;

²⁹e Sadoc, mozo e valoroso, con vinte e dous dos príncipes da casa de seu pai.

³⁰Dos fillos de Benxamín, e irmáns de Xaúl, tres mil, pois ata entón a maior parte deles permaneceran fieis á casa de Xaúl.

³¹Dos fillos de Efraím, vinte mil oitocentos homes con sona de valentes, segundo as casas de seus pais.

³²Da media tribo de Menaxés, dezaoito mil, designados nominalmente para iren proclamar rei a David.

³³Dos fillos de Isacar, expertos en coñecer o que se tiña que facer en Israel, douscentos de entre os seus xefes, con todos os seus irmáns baixo as súas ordes.

³⁴De Zebulón, cincuenta mil, en idade de tomar as armas, provistos de armas de todo xeito para o combate, dispostos a facer batalla con ánimo resolto.

³⁵De Naftalí, mil xefes, e con eles trinta e sete mil soldados, que levaban escudo e lanza.

³⁶De Dan, armados para a guerra, vinte e oito mil seiscentos.

³⁷De Axer, homes de guerra prontos para o combate, corenta mil.

³⁸E da outra beira do Xordán, dos rubenitas, dos gaditas e da media tribo de Menaxés, cento vinte mil con armas de todas as clases.

³⁹Todos estes homes, xente de guerra, dispostos para o combate, chegaron a Hebrón con leal corazón para faceren a David rei de todo Israel, e todo o resto de Israel estaba igualmente de acordo en querer a David por rei.

⁴⁰Estiveron alí tres días con David, comendo e bebendo, pois os seus irmáns subministráronlles as provisións,

⁴¹e aínda os de Isacar, Zebulón e Naftalí, traían fariña, figos secos, viño e aceite en burros, camelos e bois, tamén vacas e ovellas de abondo.