Read Biblia SEPT 1 Crónicas 13 Bible Online

1 Crónicas 13 - Biblia SEPT bible

1 Crónicas 13

¹David celebrou consello cos xefes de millares e de centos, e con todos os príncipes.

²Despois dixo a toda a comunidade de Israel: —"Se vos parece ben, e Iavé, o noso Deus, o aproba, imos mandar unha mensaxe a todos os nosos irmáns espallados por todo Israel, ós sacerdotes e ós levitas que habitan nas cidades e aldeas, para que veñan xuntarse connosco.

³Logo traeremos a arca do noso Deus, da que non nos preocupamos nos tempos de Xaúl".

⁴Entón toda a asemblea resolveu facelo así, pois a cousa pareceu conveniente a todo o pobo.

⁵Reuniu, pois, David a todo Israel, desde o torrente de Exipto ata a entrada de Hamat, para traeren a arca de Deus de Quiriat—Iearim.

⁶Subiu David, con todo Israel cara a Baalah ou Quiriat—Iearim, que está en Xudá, para trasladar a arca de Deus, Iavé, que se senta entre os querubíns, na que se invoca o seu nome.

⁷Puxeron a arca de Deus sobre un carro novo e levárona da casa de Abinadab. Conducían o carro Uzá e Ahió.

⁸David e todo Israel danzaban diante de Deus con todas as súas forzas e cantaban e tocaban arpas, salterios e pandeiros, címbalos e trompetas.

⁹Cando chegaron á eira de Quidón, Uzá tendeu a man para agarrar a arca pois envorcábana os bois.

¹⁰A ira de Iavé acendeuse contra Uzá, por estender a man sobre a arca, e Uzá morreu alí, diante de Iavé.

¹¹David irritouse porque Iavé acabou con Uzá, polo que aquel lugar se chama ata hoxe Peres—Uzá.

¹²David, entón, empezou a sentir temor de Deus, dicindo: —"Como vou traer á miña casa a arca de Deus?".

¹³E non levou consigo a arca de Deus á cidade de David, senón que a mandou levar á casa de Obededom, o de Gat.

¹⁴A arca de Deus estivo tres meses na casa de Obededom, polo que Iavé bendiciu a casa de Obededom e todo canto tiña.