Read Biblia SEPT 1 Crónicas 14 Bible Online

1 Crónicas 14 - Biblia SEPT bible

1 Crónicas 14

¹Hiram, rei de Tiro, mandou embaixadores a David e proporcionoulle madeira de cedro, canteiros e carpinteiros para que lle edificasen un pazo.

²Coñeceu David que Iavé afirmaba o seu dominio sobre Israel e que exaltaba o seu reino por amor a Israel, o seu pobo.

³David tomou, entón, mulleres en Xerusalén, e tivo fillos e fillas.

⁴O nome dos que lle naceron en Xerusalén son: Xamúa, Xobab, Natán, Salomón,

⁵Ibhar, Elixúa, Elpálet,

⁶Nógah, Néfeg, Iafía,

⁷Elixamá, Beliadá e Elifálet.

⁸Cando os filisteos souberon que David fora unxido rei de todo Israel, subiron todos na súa busca, e David, que o soubo, saíulles ó camiño.

⁹Chegaron os filisteos e espalláronse polo val de Refaím.

¹⁰David consultou a Deus: —"Subirei contra os filisteos? Entregaralos nas miñas mans?". Iavé díxolle: —"Sube e poreinos nas túas mans".

¹¹Subiron eles a Baal—Perasim, onde David os derrotou. Logo dixo: —"Deus dispersou pola miña man os meus inimigos, coma derrame das augas que escorren". Por iso déronlle a aquel lugar o nome de Baal—Perasim.

¹²Os filisteos deixaron ciscados os seus deuses, que foron queimados por orde de David.

¹³Os filisteos invadiron de novo o val,

¹⁴David consultou de novo a Deus, quen lle dixo: —"Non subas contra eles: rodéaos e bótate sobre eles desde a banda das moreiras.

¹⁵Cando polo cume das moreiras escoites un estrondo, ataca axiña, que Deus irá diante de ti para derrotar o campo dos filisteos".

¹⁶Fixo David como Deus lle mandara, e derrotou os filisteos desde Gabaón ata Guézer.

¹⁷A sona de David estendíase por todas aquelas terras e puxo Iavé sobre todas as xentes o temor a David.