Read Biblia SEPT 1 Crónicas 18 Bible Online

1 Crónicas 18 - Biblia SEPT bible

1 Crónicas 18

¹Despois disto, venceu David ós filisteos e humillounos, arrebatándolles das mans Gat e as cidades da súa dependencia.

²Venceu tamén ós moabitas, que acabaron suxeitos a David, pagándolle un tributo.

³Venceu tamén David a Hadadézer, rei de Sobah, no país de Hamat, cando este ía xa asentar o seu dominio sobre o Éufrates.

⁴Tomoulle David mil carros, sete mil cabaleiros e vinte mil soldados de a pé; tronzoulle todos os cabalos de tiro, non conservando máis ca uns cen para si.

⁵Viñeron os sirios de Damasco en socorro de Hadadézer, rei de Sobah e Damasco, e David derrotou a vinte mil sirios,

⁶puxo tropas propias en Damasco, para que os sirios ficasen suxeitos a David, pagándolle tributos. Iavé protexía a David por onde queira que ía.

⁷Tomou David os escudos de ouro que pertencían ós soldados de Hadadézer e levounos a Xerusalén.

⁸Tamén se apoderou dunha gran cantidade de bronce en Tibhat e Cun, cidades de Hadadézer. Con el fixo máis tarde Salomón o Mar de Bronce, as columnas e os utensilios de bronce.

⁹Soubo Tou, rei de Habat, que David derrotara o exército de Hadadézer, rei de Sobah.

¹⁰Entón mandoulle o seu fillo Doram a saudar e felicitar o rei David por atacar e vencer a Hadadézer, pois Tou estaba en loita con Hadadézer.

¹¹Mandoulle tamén toda sorte de copas de ouro, prata e bronce, que o rei David consagrou a Iavé, xunto co ouro e a prata que tomara a todas as nacións: a Edom, a Moab, ós amonitas, ós filisteos e a Amalec.

¹²Abixaí, fillo de Seruiah, venceu a dezaoito mil edomitas no val do Sal,

¹³puxo tropas en Edom para que Edom ficase suxeito a David. Iavé protexía a David por onde queira que fose.

¹⁴David reinou sobre Israel todo, facendo dereito e xustiza a todo o pobo.

¹⁵Ioab, fillo de Seruiah, era xefe do exército; Ioxafat, fillo de Ahilud, era o cronista,

¹⁶Sadoc, fillo de Ahitub, e Abimélec, fillo de Abiatar, eran sumos sacerdotes; Seraías era secretario;

¹⁷Benaías, fillo de Iehoiadá, era xefe dos cereteos e peleteos; e os fillos de David eran os primeiros ó lado do rei.