Read Biblia SEPT 1 Crónicas 22 Bible Online

1 Crónicas 22 - Biblia SEPT bible

1 Crónicas 22

¹E dixo David: —"Esta será a casa de Iavé Deus e aquí estará o altar dos holocaustos para Israel".

²Mandou David que se reunisen todos os estranxeiros que había na terra de Israel, e encargou ós canteiros que fosen preparando pedras labradas para a construción do templo de Deus.

³Preparou tamén ferro abondo para facer os cravos e xuntas das portas, bronce en grandes cantidades,

⁴e moita madeira de cedro, pois os sidonios e os tirios trouxeron abonda madeira de cedro para David.

⁵David dicía para si: —"O meu fillo Salomón é aínda novo e inexperto, e o templo que se ten que edificar para o Señor ten que ser, pola grandeza, pola magnificencia e pola beleza, coñecido en toda a terra; por iso quero facer os preparativos", e fíxoos abondos antes da súa morte.

⁶David chamou a Salomón, seu fillo, e deulle orde de edificar unha casa ó Señor, Deus de Israel.

⁷Díxolle: —"Meu fillo, eu tiña o propósito de edificar un templo no nome de Iavé, meu Deus;

⁸pero o Señor díxome: Ti derramaches moito sangue e fixeches grandes guerras. Non serás ti quen edifique un templo no meu nome, porque derramaches ante min moito sangue sobre a terra.

⁹Velaí que che nacerá un fillo, que será home de paz e a quen eu darei paz, librándoo de todos os seus inimigos do arredor. O seu nome será Salomón, nos seus días eu concederei paz e tranquilidade a Israel.

¹⁰El edificará un templo ó meu nome. Será para min un fillo e eu serei para el un pai, e afirmarei sempre o trono do seu reino en Israel.

¹¹Agora, pois, meu fillo, que o Señor sexa contigo, para que prosperes e edifiques o templo de Iavé, teu Deus, como el de ti declarou.

¹²Queira darche o Señor a sabedoría e a intelixencia para reinar sobre Israel na observancia da lei de Iavé o teu Deus.

¹³Se coidas de poñeres por obra os mandamentos e preceptos que o Señor lle mandou a Moisés para Israel, prosperarás. Esfórzate, logo, ten ánimos e non temas nin desmaies.

¹⁴Eu cos meus esforzos reunín para o templo do Señor cen mil talentos de ouro, un millón de talentos de prata e unha grande cantidade de bronce e ferro. Dispuxen tamén madeira e pedra que ti acrecentarás.

¹⁵Tes á man moitos obreiros, canteiros, carpinteiros e homes sabidos en toda clase de obras.

¹⁶O ouro, a prata, o bronce e o ferro son de máis. Érguete, pois: comeza coa obra, e que o Señor sexa contigo".

¹⁷Mandou tamén David a todos os príncipes de Israel que prestasen a súa axuda a Salomón, seu fillo.

¹⁸—"Non está convosco Iavé, o voso Deus, e non nos deu El paz en todas partes? El puxo nas miñas mans os moradores da terra, e a terra está sometida ante Iavé e diante do seu pobo.

¹⁹Poñede, pois, todo o voso corazón e o voso ánimo en buscar o Señor, o voso Deus; erguédevos e edificade o santuario de Iavé Deus, para traer a arca da alianza do Señor e os seus utensilios consagrados a Deus ó templo edificado no nome de Iavé".