Read Biblia SEPT 1 Crónicas 23 Bible Online

1 Crónicas 23 - Biblia SEPT bible

1 Crónicas 23

¹Vello xa David e colmado de días, fixo a Salomón, seu fillo, rei de Israel.

²Reuniu a todos os príncipes de Israel, ós sacerdotes e ós levitas.

³Fíxose o censo dos levitas de máis de trinta anos, e o seu número, contado un a un, foi de trinta e oito mil.

⁴Deles vinte e catro mil dirixían as obras do templo de Iavé, e seis mil eran inspectores e xuíces;

⁵catro mil, porteiros; e catro mil dedicados a loar o Señor con aparellos feitos para iso por David.

⁶David distribuíunos en orde segundo os fillos de Leví, Guerxom, Quehat e Merarí.

⁷Fillos de Guerxom: Ladán e Ximí.

⁸Fillos de Ladán: Iehiel, o primeiro; Zetam e Ioel; en total, tres.

⁹Fillos de Ximí: Xelomit, Haziel e Harán, tres en total. Estes son os xefes das familias de Ladán.

¹⁰Fillos de Ximí: Iaxat, Zizá, Ieús e Beriá, en total catro.

¹¹Estes catro son os fillos de Ximí. Iaxat era o primeiro e Zizá o segundo. Ieús e Beriá non tiveron moitos fillos e formaron no censo unha soa casa paterna.

¹²Fillos de Quehat: Amram, Ishar, Hebrón e Uziel, en total catro.

¹³Fillos de Amram: Aharón e Moisés. Aharón foi elixido para servir no santo dos santos, el e seus fillos perpetuamente, para ofrecer os perfumes ante Iavé, para facer o seu ministerio e bendicir por sempre o seu nome.

¹⁴Os fillos de Moisés, home de Deus, foron contados na tribo de Leví.

¹⁵Os fillos de Moisés foron Guerxom e Eliézer.

¹⁶Xebuel foi o primoxénito de Guerxom.

¹⁷Fillos de Eliézer: o primoxénito de Eliézer foi Rehabías. Eliézer non tivo máis fillos, pero Rehabías tivo moitos.

¹⁸Fillos de Ishar: o primoxénito foi Xelomit.

¹⁹Fillos de Hebrón: Ierías, o primoxénito; Amarías, o segundo; Uziel, o terceiro, e Iecamam, o cuarto.

²⁰Fillos de Uziel: Miqueas, o primoxénito; Ixías, o segundo.

²¹Fillos de Merarí: Mahlí e Muxí. Fillos de Mahlí: Elazar e Quix.

²²Elazar morreu sen fillos, pero deixou fillas, e os fillos de Quix, seus irmáns, tomáronas por mulleres.

²³Fillos de Muxí: Mahlí, Éder e Ieremot, tres en total.

²⁴Estes son os fillos de Leví segundo as familias dos seus pais, cabeza das casas paternas, segundo o censo feito contando por cabezas. Estaban dedicados ó ministerio do templo de Iavé desde os vinte anos cumpridos,

²⁵pois David dixo: —"O Señor, Deus de Israel, deu acougo ó seu pobo Israel e habitará por sempre en Xerusalén,

²⁶e os levitas non terán xa que transportar o tabernáculo e todos os aparellos do seu servizo".

²⁷E así, conforme as derradeiras disposicións de David, fíxose o censo dos fillos de Leví desde os vinte anos en adiante.

²⁸Postos baixo as ordes dos fillos de Aharón, para o servizo do templo do Señor, tiñan ó seu coidado os adros e as cámaras, a limpeza de todas as cousas santas e as obras do servizo do templo de Deus;

²⁹o pan da proposición, a flor da fariña para as ofrendas, as tortas de pan asmo, as filloas fritidas na tixola e as cocidas, e todas as medidas de capacidade e lonxitude.

³⁰Tiñan que presentarse cada mañá e cada tarde para loar e celebrar a Iavé

³¹e ofrecer continuamente os holocaustos ó Señor os sábados, os novilunios e as festas, segundo o número e os ritos prescritos.

³²Facían a garda da Tenda do Encontro ás ordes dos fillos de Aharón, seus irmáns, no servizo do templo do Señor.