Read Biblia SEPT 2 Crónicas 10 Bible Online

2 Crónicas 10 - Biblia SEPT bible

2 Crónicas 10

¹Roboam foi a Xequem porque todo Israel acudira alí para proclamalo rei.

²Cando o soubo Ieroboam, fillo de Nabat —que estaba en Exipto, a onde fora fuxindo do rei Salomón—, volveu de Exipto,

³porque o mandaran chamar. Ieroboam e todo Israel falaron a Roboam:

⁴—"Teu pai impúxonos un xugo pesado. Alixeira agora a dura servidume á que nos suxeitou teu pai e o xugo pesado que nos botou encima, e servirémoste".

⁵E díxolles: —"Volvede dentro de tres días". Eles fóronse,

⁶e o rei Roboam consultou os anciáns que estiveran ó servizo do seu pai, Salomón, mentres vivía: —"Que me aconsellades que responda a esa xente?"

⁷Dixéronlle: —"Se te portas ben con este pobo, condescendes con eles e lles respondes con boas palabras, serán servos teus de por vida".

⁸Pero el rexeitou o consello dos anciáns e consultou os mozos que se educaran con el e estaban ó seu servizo.

⁹Preguntoulles: —"Esta xente pídeme que lles alixeire o xugo que lles botou encima meu pai. Que me aconsellades que lles responda?"

¹⁰Os mozos que se educaran con el respondéronlle: —"Así que esa xente che dixo: Teu pai impúxonos un xugo pesado, alixéiranolo. Pois ti dilles isto: O meu dedo maimiño é máis groso cá cintura do meu pai.

¹¹Se meu pai vos cargou cun xugo pesado, eu aumentareivos a carga: se meu pai vos castigou con azoutes, eu castigareivos coa tralla".

¹²O terceiro día, data sinalada polo rei, Ieroboam e todo o pobo foron ver a Roboam.

¹³O rei respondeulles asperamente, rexeitou o consello dos anciáns e

¹⁴faloulles seguindo o consello dos mozos: —"Se meu pai vos impuxo un xugo pesado, eu aumentaréivolo; se meu pai vos castigou con azoutes, eu fareino coa tralla".

¹⁵De maneira que o rei non fixo caso ó pobo, porque era unha ocasión buscada polo Señor para que se cumprise a palabra do Señor que Ahías, o de Xiloh, comunicou a Ieroboam, fillo de Nabat.

¹⁶Vendo os israelitas que o rei non lles facía caso, respondéronlle: —"Que é o que repartimos nós con David? Non fixemos partilla co fillo de Ixaí! As túas tendas, Israel! Agora, David, a coidar da túa casa!" Os de Israel marcharon á casa,

¹⁷Aínda que os israelitas que vivían nas poboacións de Xudá seguiron sometidos a Roboam.

¹⁸O rei Roboam enviou entón a Adoram, encargado das brigadas de traballadores, pero os israelitas emprendérona a pedradas con el ata matalo, mentres o rei montaba á présa na súa carroza para fuxir a Xerusalén.

¹⁹Así foi como se independizou Israel da casa de David, ata hoxe.