Read Biblia SEPT 2 Crónicas 11 Bible Online

2 Crónicas 11 - Biblia SEPT bible

2 Crónicas 11

¹Cando Roboam chegou a Xerusalén, mobilizou cento oitenta mil soldados de Xudá e Benxamín para loitar contra Israel e recuperar o reino.

²Pero o Señor dirixiu a palabra ó profeta Semaías:

³—"Di a Roboam, fillo de Salomón, rei de Xudá, e a todos os israelitas de Xudá e Benxamín:

⁴Así di o Señor: non vaiades loitar contra vosos irmáns; que cada un volva á súa casa, porque isto sucedeu por vontade miña". Obedeceron ás palabras do Señor e desistiron da campaña contra Ieroboam.

⁵Roboam habitou en Xerusalén e construíu fortalezas en Xudá.

⁶Restaurou Belén, Etam, Tecoa,

⁷Bet—Sur, Socó, Andulam,

⁸Gat, Marexarh, Zif,

⁹Adoraim, Láquix, Axecah.

¹⁰Sorah, Aiabón e Hebrón, fortalezas de Xudá e Benxamín,

¹¹equipou as fortalezas, puxo nelas comandantes e forneceunas de almacéns de víveres, aceite e viño.

¹²Todas as cidades tiñan escudos e lanzas; estaban perfectamente armadas. Reinou en Xudá e Benxamín.

¹³Os sacerdotes e levitas de todo Israel acudían desde as súas terras para unirse a el;

¹⁴os levitas abandonaron os seus eidos e posesións para establecerse en Xudá e Xerusalén, porque Ieroboam e os seus fillos lles prohibiran exercer o sacerdocio do Señor,

¹⁵nomeando pola súa conta sacerdotes para as ermidas dos outeiros, para os sátiros e para os beceros que fabricaran.

¹⁶Tras eles, israelitas de todas as tribos desexosas de servir o Señor, Deus de Israel, foron a Xerusalén para ofreceren sacrificios ó Señor, Deus de seus pais.

¹⁷Consolidaron o reino de Xudá e fixeron forte a Roboam, fillo de Salomón, durante tres anos, tempo no que imitaron a conduta de David e Salomón.

¹⁸Roboam casou con Mahlat, filla de Ierimot, fillo de David e de Abigaíl, filla de Eliab, de Ixaí.

¹⁹Deulle varios fillos: Ieux, Xemarías e Zaham.

²⁰Despois casou con Macah, filla de Abxalom que lle deu a Abías, Atai, Zizá e Xelomit.

²¹Roboam quería a Macah máis do que a todas as outras mulleres e concubinas; tivo dezaoito esposas e setenta concubinas e xerou vinte e cinco fillos e setenta fillas.

²²A Abías, fillo de Macah, púxoo ó mando de seus irmáns, escolléndoo como sucesor.

²³Repartiu prudentemente os seus fillos por todo o territorio de Xudá e Benxamín e por todas as fortalezas, dándolles gran cantidade de víveres e procurándolles moitas mulleres.