Read Biblia SEPT 2 Crónicas 12 Bible Online

2 Crónicas 12 - Biblia SEPT bible

2 Crónicas 12

¹Pero cando Roboam consolidou o seu reino e se fixo forte, el e todo Israel abandonaron a Lei do Señor.

²Por se rebelar contra o Señor, o ano quinto do seu reinado, Xexac rei de Exipto

³Atacou Xerusalén con mil douscentos carros, sesenta mil xinetes e unha multitude innumerable de libios, suquitas e cuxitas procedentes de Exipto.

⁴Conquistaron as fortalezas de Xudá e chegaron ata Xerusalén.

⁵Entón o profeta Semaías presentouse a Roboam e ás autoridades de Xudá, que se reuniran en Xerusalén por medo a Xexac, e díxolles: —"Así di o Señor: vós abandonástesme; pois eu abandónovos agora nas mans de Xexac".

⁶As autoridades de Israel e o rei confesaron humildemente: —"O Señor leva razón".

⁷Cando o Señor viu que se humillaran, dirixiu a súa palabra a Semaías: —"Foron humildes, non os aniquilarei. Salvareinos dentro de pouco e non derramarei a miña cólera sobre Xerusalén por medio de Xexac.

⁸Pero ficarán sometidos para que aprecien o que vai de servirme a min a servir os reis da terra".

⁹Xexac, rei de Exipto, atacou Xerusalén e apoderouse dos tesouros do templo e do palacio; levou todo, mesmo os escudos de ouro que fixera Salomón.

¹⁰Para substituílos, o rei Roboam, fixo escudos de bronce e encomendóullelos ós xefes da escolta que vixiaban o acceso ó palacio;

¹¹cada vez que o rei ía ó templo, os da escolta collíanos e logo volvían deixalos no corpo de garda.

¹²Por se humillaren, o Señor apartou a súa cólera del e non o destruíu por completo. Tamén en Xudá houbo certo benestar.

¹³O rei Roboam reafirmouse en Xerusalén e seguiu reinando. Tiña corenta e un anos cando subiu ó trono e reinou dezasete en Xerusalén, a cidade que o Señor elixira como propiedade persoal entre todas as tribos de Israel. A súa nai chamábase Namah e era amonita.

¹⁴Obrou mal porque non se dedicou de corazón a servir o Señor.

¹⁵Os feitos de Roboam, dos primeiros ós últimos, áchanse escritos na Historia do profeta Semaías e do vidente Idó. Houbo guerras continuas entre Roboam e Ieroboam.

¹⁶Cando morreu, enterrárono na cidade de David. Seu fillo Abías sucedeulle no trono.