Read Biblia SEPT 2 Crónicas 14 Bible Online

2 Crónicas 14 - Biblia SEPT bible

2 Crónicas 14

¹Asá fixo o que o Señor, o seu Deus, aproba e estima.

²Suprimiu os altares estranxeiros e as ermidas dos outeiros, esnaquizou as estelas e cortou os cipos.

³Animou a Xudá a servir o Señor, Deus de seus pais, e a observar a lei e os preceptos.

⁴Suprimiu as ermidas dos outeiros e os cipos en todas as cidades de Xudá. O reino gozou de paz na súa época.

⁵Aproveitando esta paz que lle concedeu o Señor, a calma que reinaba no país e a ausencia de guerras durante aqueles anos, construíu fortalezas en Xudá.

⁶Para iso propúxolles ós xudeus: —"Podemos dispoñer libremente do país porque servimos o Señor, noso Deus, e El concedeunos paz cos veciños. Imos construír estas cidades e rodealas de murallas con torres, portas e ferrollos". Así o fixeron con pleno éxito.

⁷Asá dispuxo dun exército de trescentos mil xudeus, armados de escudo e lanza, e vinte e oito mil benxaminitas, armados de adarga e arco. Todos eran bos soldados.

⁸Zérah de Cux saíu ó seu encontro cun exército dun millón de homes e trescentos carros. Cando chegou a Marexah,

⁹Asá fíxolle fronte e entaboaron batalla no val de Safatah, onda Marexah.

¹⁰Asá invocou ó Señor, seu Deus: —"Señor, cando queres axudar non distingues entre poderosos e febles. Axúdanos, Señor, noso Deus, que en Ti nos apoiamos e no teu nome nos diriximos contra esa multitude. Ti es o noso Deus. Non te deixes vencer por un home".

¹¹O Señor derrotou os cuxitas ante Asá e Xudá. Os cuxitas fuxiron;

¹²pero Asá perseguiunos coa súa tropa a Guerar. O Señor e as súas hostes esnaquizáronnos. Morreron tantos cuxitas, que non se puideron refacer. O botín foi enorme.

¹³Aproveitando que os poboados da bisbarra de Guerar eran presa dun pánico sagrado, asaltáronos e saqueáronos porque había neles gran botín.

¹⁴Mataron tamén a uns pastores e volveron a Xerusalén con gran cantidade de ovellas e camelos.