Read Biblia SEPT 2 Crónicas 15 Bible Online

2 Crónicas 15 - Biblia SEPT bible

2 Crónicas 15

¹O Espírito do Señor veu sobre Azarías, fillo de Oded.

²Saíu ó encontro de Asá e díxolle: —"Escoitádeme, Asá, Xudá e Benxamín: se estades co Señor, El estará convosco; se o buscades, deixarase encontrar; pero se o abandonades, abandonaravos.

³Durante moitos anos Israel viviu sen Deus verdadeiro, sen sacerdote que o instruíse, sen lei.

⁴Pero no perigo volveron ó Señor, Deus de Israel; buscárono e El deixouse encontrar.

⁵Naqueles tempos ninguén vivía en paz, todos os habitantes do país sufrían grandes turbacións.

⁶Pobos e cidades destruíanse mutuamente porque o Señor os turbaba con toda clase de perigos.

⁷Pero vós cobrade ánimo, non desfalezades, que as vosas obras terán a súa recompensa".

⁸Cando Asá escoitou esta profecía de Azarías, fillo de Oded, animouse a suprimir os ídolos de todo o territorio de Xudá e Benxamín, e das cidades que conquistara na serra de Efraím, e reparou o altar do Señor que se achaba diante do adro.

⁹Logo reuniu ós xudeus, ós benxaminitas e ós de Efraím, Menaxés e Simeón, que residían entre eles porque moitos israelitas se pasaran ó seu bando ó veren que o Señor, seu Deus, estaba con el.

¹⁰Reuníronse en Xerusalén en maio do ano quince do reinado de Asá.

¹¹Sacrificaron ó Señor setecentos touros e sete mil ovellas do botín que trouxeran,

¹²e fixeron un pacto, comprometéndose a servir o Señor, Deus de seus pais, con todo o corazón e con toda a alma,

¹³e a condenar a morte a todo o que non o gardase, grande ou pequeno, home ou muller.

¹⁴Así o xuraron ó Señor a grandes voces, entre clamores e ó son de trompetas e cornos.

¹⁵Todo Xudá festexou o xuramento e fixérono de corazón, buscando o Señor con sincera vontade; El deixouse encontrar por eles e concedeulles paz cos seus veciños.

¹⁶O rei Asá quitoulle o título da raíña nai a súa nai, Macah, porque fixera unha imaxe de Axtarté. Esnaquizou a imaxe, reduciuna a po e queimouna no torrente Cedrón.

¹⁷Non desapareceron de Israel as ermidas dos outeiros, pero o corazón de Asá pertenceu integramente ó Señor durante toda a súa vida.

¹⁸Levóu ó templo as ofrendas de seu pai e as súas propias: prata, ouro e utensilios.

¹⁹Nos trinta e cinco primeiros anos do seu reinado, non houbo guerras.