Read Biblia SEPT 2 Crónicas 16 Bible Online

2 Crónicas 16 - Biblia SEPT bible

2 Crónicas 16

¹Pero o ano trinta e seis do reinado de Asá, Baxá de Israel fixo unha campaña contra Xudá e fortificou Ramah para cortar as comunicacións a Asá de Xudá.

²Este sacou entón prata e ouro dos tesouros do templo e do palacio e enviounos a Ben Hadad, rei de Siria, que residía en Damasco, con esta mensaxe:

³—"Fagamos un tratado de paz, como o fixeron teu pai e o meu. Aquí che mando prata e ouro; anda, rompe a túa alianza con Baxá de Israel, para que se retire do meu territorio".

⁴Ben Hadad fixo caso a Asá e mandou os seus xenerais contra as cidades de Israel, devastando Iión, Dan, Abel—Maim e todos os depósitos das cidades de Naftalí.

⁵En canto o soubo, Baxá, deixou de fortificar Ramah e fixo parar as obras.

⁶O rei Asá mobilizou daquela a todo Xudá; desmontaron as pedras e madeiros con que Baxá fortificaba Ramah e aproveitáronos para fortificar Gueba e Mispah.

⁷Naquela ocasión o vidente Hananí presentouse ante Asá, rei de Xudá, e díxolle: —"Por te apoiares no rei de Siria en vez de apoiarte no Señor, teu Deus, escapóuseche das mans o exército do rei de Siria.

⁸Tamén os cuxitas e libios constituían un gran exército con innumerables carros e cabalos; pero entón apoiácheste no Señor, teu Deus, e El púxoos nas túas mans.

⁹Porque o Señor repasa a terra enteira cos seus ollos para fortalecer ós que lle son leais de corazón. Fixeches unha loucura e de agora en adiante vivirás en guerra".

¹⁰Asá indignouse co vidente, e irritado con el polas súas palabras, meteuno no cárcere. Por entón asañouse tamén con outras persoas do pobo.

¹¹Para os feitos de Asá, dos primeiros ós derradeiros, véxanse os Anais dos Reis de Xudá e Israel.

¹²O ano trinta e nove do seu reinado enfermou do mal da gota. Aínda que a enfermidade se foi agravando, acudiu só ós médicos, sen acudir ó Señor nin sequera na enfermidade.

¹³Asá morreu no ano corenta e un do seu reinado, indo reunirse cos seus antepasados.

¹⁴Enterrárono na sepultura que se cavara na Cidade de David. Puxérono nun leito cheo dun ungüento confeccionado a base de aromas e perfumes, e acenderon na súa honra unha gran larada.