Read Biblia SEPT 2 Crónicas 17 Bible Online

2 Crónicas 17 - Biblia SEPT bible

2 Crónicas 17

¹Sucedeulle no trono seu fillo Ioxafat, que logrou imporse ó reino de Israel.

²Instalou guarnicións en todas as fortalezas de Xudá, e nomeou gobernadores no territorio de Xudá e nas cidades de Efraím, que conquistara seu pai Asá.

³O Señor estivo con Ioxafat porque imitou a antiga conduta de seu pai David e non servía os baales,

⁴senón o Deus de seu pai, cumprindo os seus preceptos; non imitou a conduta de Israel.

⁵O Señor consolidou o reino nas súas mans. Todo Xudá lle pagaba tributo, e Ioxafat chegou a ter gran riqueza e prestixio.

⁶O seu orgullo era camiñar polas sendas do Señor, e volveu suprimir as ermidas dos outeiros e as estelas de Xudá.

⁷No ano terceiro do seu reinado, mandou algúns xefes —Benhail, Abdías, Zacarías, Natanael e Miqueas—, a instruír ós habitantes das cidades de Xudá,

⁸e con eles os levitas Semaías, Netanías, Zebadías, Asael, Xemiramot, Ionatán, Adonías, Tobías e os sacerdotes Elixamá e Ioram.

⁹Percorreron, coma instrutores de Xudá, todas as cidades de Xudá, levando o libro da Lei do Señor, e instruíron ó pobo.

¹⁰Todos os reinos veciños de Xudá, presos dun pánico sagrado, se abstiveron de loitar contra Ioxafat.

¹¹Os filisteos pagábanlle tributo copioso en diñeiro. Tamén os árabes lle traían gando menor: sete mil setecentos carneiros e sete mil setecentos machos cabrúns.

¹²Ioxafat fíxose cada vez máis poderoso. Construíu fortalezas e cidades de avituallamento en Xudá.

¹³Tiña moitos empregados nas cidades de Xudá. En Xerusalén dispuña de soldados valentes e aguerridos,

¹⁴Alistados por familias: Alto mando de Xudá: Adnah, capitán xeneral, con trescentos mil soldados;

¹⁵ás súas ordes, o xeneral Iohanán, con douscentos oitenta mil,

¹⁶e Amasías, fillo de Zicrí, que servía ó Señor como voluntario, ó mando de douscentos mil.

¹⁷De Benxamín, o valeroso Eliadá, con douscentos mil homes armados de arco e adarga;

¹⁸ás súas ordes estaba Iozabad, con cento oitenta mil homes dispoñibles.

¹⁹Todos estes achábanse ó servizo do rei, sen contar os que este destinara ás fortalezas de Xudá.