Read Biblia SEPT 2 Crónicas 19 Bible Online

2 Crónicas 19 - Biblia SEPT bible

2 Crónicas 19

¹Ioxafat de Xudá volveu san e salvo ó palacio de Xerusalén.

²Pero o vidente de Iehú, fillo de Hananí, saíulle ó encontro e díxolle: —"Conque axudas ós malvados e alíaste cos inimigos do Señor? O Señor indignouse contigo por iso.

³Pero contas tamén con boas accións: queimaches as estelas deste país e serviches a Deus con constancia".

⁴Ioxafat estableceu a súa residencia en Xerusalén, pero volveu visitar o pobo, desde Beerxeba ata a terra de Efraím, e converténdoo ó Señor, Deus de seus pais.

⁵Estableceu xuíces en cada unha das fortalezas do territorio de Xudá e advertiulles:

⁶—"Coidado co que facedes, porque non xulgaredes con autoridade de homes, senón coa de Deus, que estará convosco cando pronunciedes sentencia.

⁷Polo tanto, temede ó Señor e procedede con coidado. Porque o Señor, o noso Deus, non admite inxustizas, favoritismos nin subornos".

⁸Tamén en Xerusalén designou algúns levitas, sacerdotes de cabezas de familia, para que se encargasen do dereito divino e dos preitos dos habitantes de Xerusalén.

⁹Deulles esta orde: —"Actuade con temor de Deus, con honradez e integridade.

¹⁰Cando vosos irmáns que habitan nas cidades vos presenten un caso de asasinato, ou ben vos consulten sobre leis, preceptos, mandatos ou decretos, instruídeos para que non se fagan culpables ante o Señor e non se derrame a súa cólera sobre vós e vosos irmáns. Se actuades así estaredes libres de culpa.

¹¹O sumo sacerdote Amarías presidirá as causas relixiosas, e Zebadías, fillo de Ismael, xefe da casa de Xudá, as civís. Os levitas estarán ó voso servizo. Animo, a traballar, e que o Señor estea cos homes de ben".