Read Biblia SEPT 2 Crónicas 23 Bible Online

2 Crónicas 23 - Biblia SEPT bible

2 Crónicas 23

¹O ano sétimo Iehoiadá armouse de valor e reuniu os centurións: Azarías, fillo de Ieroham, Ismael, fillo de Iohomán, Azarías, fillo de Obed, Maseías, fillo de Adaías, e Elixafat, fillo de Zicrí. Xuramentouse con eles e percorreron Xudá

²congregando os levitas de todas as cidades e os cabezas de familia de Israel. Cando regresaron a Xerusalén,

³toda a asemblea fixo no templo un pacto co rei. Logo díxolles: —"Debe reinar un fillo do rei, como prometeu o Señor á descendencia de David.

⁴Ides facer o seguinte: O terzo de vós, sacerdotes e levitas, que entra de servizo o sábado, fará garda nas portas;

⁵outro terzo ocupará o palacio e o último terzo a Porta do Fundamento. O pobo situarase nos adros do templo.

⁶Pero que ninguén entre no templo, a excepción dos sacerdotes e os levitas de servizo. Eles pódeno facer porque están consagrados; pero o pobo deberá observar as prescricións do Señor.

⁷Os levitas rodearán o rei por todas partes, arma en man. Se alguén quere entrar no palacio, matádeo. E estade a carón do rei, vaia onda vaia".

⁸Os levitas e os xudeus fixeron o que lles mandou o sacerdote Iehoiadá. Cada un reuniu os seus homes, os que estaban de servizo o sábado e os que quedaban libres, porque o sacerdote Iehoiadá non exceptuou ningunha das seccións.

⁹O sacerdote Iehoiadá entregoulles ós oficiais as lanzas, escudos e adargas do rei David, que se gardaban no templo.

¹⁰Colocou a todo o pobo con armas curtas, desde o ángulo sur ata o ángulo norte do templo, entre o altar e o templo, para protexer o rei.

¹¹Entón trouxeron ó príncipe, colocáronlle a diadema e as insignias, proclamárono rei, e Iehoiadá e seus fillos unxírono, aclamando: —"Viva o rei!".

¹²Atalía oíu o clamor da tropa que corría e aclamaba ó rei e foi cara á xente, ó templo.

¹³Pero cando viu o rei en pé sobre o estrado, na entrada, e os oficiais e a banda a carón do rei, toda a poboación en festa, as trompetas tocando e os cantores acompañando os cánticos de loanza cos seus instrumentos, rachou as vestiduras e dixo: —"Traizón, traizón!".

¹⁴O sacerdote Iehoiadá ordenou ós oficiais que mandaban as forzas: —"Sacádea do adro. A quen a siga, matádeo". Pois non quería que a matasen no templo.

¹⁵Fórona empuxando coas mans, e cando chegaba a palacio pola Porta das Cabalerías, alí mesmo a mataron.

¹⁶Iehoiadá selou un pacto con todo o pobo e co rei para que fose o pobo do Señor.

¹⁷Toda a poboación dirixiuse logo ó templo de Baal: destruírono, derrubaron os seus altares e as súas imaxes, e a Matán, sacerdote de Baal, degolárono ante o altar.

¹⁸Iehoiadá puxo gardas no templo, ás ordes dos sacerdotes e levitas que David distribuíra na casa de Deus para ofreceren holocaustos ó Señor —segundo o manda a lei de Moisés— con alegría e con cánticos compostos por David.

¹⁹Puxo porteiros nas portas do templo para que non entrase absolutamente nada impuro.

²⁰Logo, cos centurións, os notables, as autoridades e todo a veciñanza, sacaron do templo ó rei, e levárono ó palacio pola Porta Superior e instalárono no trono real.

²¹Toda a poboación fixo festa e a cidade quedou tranquila. A Atalía matárana a espada.