Read Biblia SEPT 2 Crónicas 24 Bible Online

2 Crónicas 24 - Biblia SEPT bible

2 Crónicas 24

¹Ioax tiña sete anos cando subiu ó trono e reinou en Xerusalén corenta anos. Súa nai chamábase Sibías e era natural de Beerxeba.

²Mentres viviu o sacerdote Iehoiadá, fixo o que o Señor aproba.

³Iehoiadá procuroulle dúas mulleres e xerou fillos e fillas.

⁴Máis tarde, Ioax sentiu desexos de restaurar o templo.

⁵Reuniu os sacerdotes e os levitas, e díxolles: —"Ide polas cidades de Xudá recollendo diñeiro de todo Israel para reparardes todos os anos o templo do voso Deus. Dádevos présa". Pero os levitas tomárono con calma.

⁶Entón o rei chamou ó sumo sacerdote Iehoiadá e díxolle: —"Por que non te preocupaches de que os levitas cobren en Xudá e Xerusalén o tributo imposto por Moisés, servo do Señor, e pola comunidade de Israel para a tenda da alianza?

⁷Non te dás conta de que a malvada Atalía e os seus secuaces estragaron o templo e dedicaron ós baales todos os obxectos sagrados do mesmo?".

⁸Entón, por orde do rei, fixeron unha hucha e colocárona na porta do templo por fóra.

⁹Logo pregoaron por Xudá e Xerusalén que había que ofrecer ó Señor o tributo que Moisés, servo de Deus, impuxera a Israel no deserto.

¹⁰As autoridades e a poboación fixérono de boa gana e botaron diñeiro ata que se encheu a hucha.

¹¹Cada vez que os levitas levaban a hucha á inspección real e vían que había moito diñeiro, presentábanse un secretario do rei e un inspector do sumo sacerdote, libraban a hucha e volvían colocala no seu sitio. Así o fixeron periodicamente, reunindo unha gran suma de diñeiro.

¹²O rei e Iehoiadá entregábano ós capataces da obra do templo, e estes pagaban os canteiros e carpinteiros que restauraban o templo e os ferreiros e broncistas que o reparaban.

¹³Os obreiros fixeron a súa tarefa; baixo as súas mans foi rexurdindo a estrutura, ata que levantaron solidamente o templo segundo os planos.

¹⁴O terminaren, devolveron ó rei e a Iehoiadá o diñeiro sobrante, co que fixeron obxectos para o templo, utensilios para o culto e para os holocaustos, copas e obxectos de ouro e prata. Mentres viviu Iehoiadá ofreceron holocaustos regulares no templo.

¹⁵Este chegou a vello e morreu en idade avanzada, ós cento trinta anos.

¹⁶Enterrárono cos reis na Cidade de David, porque foi bo con Israel, con Deus e co seu templo.

¹⁷Cando morreu Iehoiadá, as autoridades de Xudá foron render homenaxe ó rei, e este seguiu os seus consellos;

¹⁸esquecendo o templo do Señor, Deus de seus pais, deron culto ás estelas e ós ídolos. Este pecado desencadeou a cólera de Deus contra Xudá e Xerusalén.

¹⁹Mandoulles profetas para convertelos, pero non fixeron caso das súas amoestacións.

²⁰Entón o Espírito de Deus apoderouse de Azarías, fillo do sacerdote Iehoiadá, que se presentou ante o pobo e lle dixo: —"Así fala Deus: Por que quebrantades os preceptos do Señor? Ides á ruína. Abandonastes o Señor e El abandónavos".

²¹Pero conspiraron contra el e lapidárono no adro do templo por orde do rei.

²²O rei Ioax, sen ter en conta os beneficios recibidos de Iehoiadá, matoulle o fillo, que morreu dicindo: —"Que o Señor xulgue e sentencie!"

²³O cabo dun ano, un exército de Siria dirixiuse contra Ioax, penetrou en Xudá ata Xerusalén, matou a todos os xefes do pobo e enviou todo o botín ó rei de Damasco.

²⁴O exército de Siria era reducido, pero o Señor entregoulle un exército enorme porque o pobo abandonara ó Señor, Deus de seus pais. Vingáronse así de Ioax.

²⁵O retirárense os sirios, deixándoo gravemente ferido, os seus cortesáns conspiraron contra el para vingar o fillo do sacerdote Iehoiadá. Asasinárono na cama e morreu. Enterrárono na Cidade de David, pero non lle deron sepultura no panteón real.

²⁶Os conspiradores foron: Zabah, fillo de Ximat, a amonita, e Iehozabad, fillo de Ximrit, a moabita.

²⁷Para o referente a seus fillos, ás numerosas profecías contra el e á restauración do templo, véxase o comentario dos Anais dos Reis. O seu fillo Amasías sucedeulle no trono.