Read Biblia SEPT 2 Crónicas 25 Bible Online

2 Crónicas 25 - Biblia SEPT bible

2 Crónicas 25

¹Amasías tiña vinte e cinco anos cando subiu ó trono e reinou en Xerusalén vinte e nove anos. Súa nai chamábase Iehoadán e era natural de Xerusalén.

²Fixo o que o Señor aproba, aínda que non de todo corazón.

³Cando se afianzou no poder, matou ós ministros que asasinaran a seu pai.

⁴Pero non matou a seus fillos, conforme o libro da Lei de Moisés promulgada polo Señor: —"Non serán executados os pais polas culpas dos fillos, nin os fillos polas culpas dos pais; cada un morrerá polo seu propio pecado".

⁵Amasías reuniu ós de Xudá e puxo a todos os xudeus e benxaminitas, por familias, ás ordes de xefes e oficiais. Fixo o censo dos maiores de vinte anos; resultaron trescentos mil en idade militar e equipados de espada e escudo.

⁶Recrutou en Israel cen mil mercenarios por cen pesos de prata.

⁷Pero un profeta presentouse ante el e díxolle: —"Maxestade, non leves contigo o destacamento de Israel, que o Señor non está cos efraimitas.

⁸Se te apoias neles, Deus derrotarate fronte ós teus inimigos. Porque Deus pode dar a vitoria e a derrota".

⁹Amasías preguntou ó profeta: —"E que pasa cos cen pesos de prata que dei ó destacamento de Israel?" O profeta contestoulle: —"O Señor pódechos devolver multiplicados".

¹⁰Amasías licenciou a tropa procedente de Efraím para que volvese á súa terra. Eles indignáronse con Xudá e volvéronse para os seus lugares, enfurecidos.

¹¹Amasías armouse de valor, tomou o mando da tropa, marchou ó Val do Sal e matou a dez mil seiritas.

¹²A outros dez mil colleunos vivos, levounos ó cume da rocha e chimpounos desde ela. Morreron todos desfeitos.

¹³Mentres, o destacamento que licenciara Amasías para que non loitase ó seu lado, dispersouse polas cidades de Xudá —desde Samaría ata Bethorón—, matando a tres mil persoas e capturando un gran botín.

¹⁴Cando Amasías volveu de derrotar ós idumeos, trouxo consigo os deuses dos seiritas, adoptounos coma deuses propios, adorounos e queimoulles incenso.

¹⁵O Señor indignouse con Amasías e mandoulle un profeta que lle dixo: —"Por que serves a uns deuses que non puideron salvar o seu pobo da túa man?"

¹⁶Amasías cortouno en seco, dicíndolle: —"Quen te fixo conselleiro do rei? Cala dunha vez, se non queres que te maten". O profeta terminou con estas palabras: —"Polo que fixeches e por non escoitares o meu consello, estou certo de que Deus aconsella a túa destrución".

¹⁷Despois de se aconsellar, Amasías de Xudá mandou unha embaixada a Ioax, fillo de Ioacaz, de Iehú, rei de Israel, con esta mensaxe: —Sae, que nos vexamos as caras!

¹⁸Pero Ioax de Israel mandou esta resposta a Amasías de Xudá: —"O cardo do Líbano mandou dicir ó cedro do Líbano: Dáme a túa filla por esposa de meu fillo. Pero pasaron as feras e esmagaron o cardo.

¹⁹Ti dis: Derrotei a Edom, e enchícheste de fachenda. Goza da túa gloria ficando na casa. Por que te queres meter nunha guerra catastrófica provocando a túa caída e a de Xudá?"

²⁰Pero Amasías non fixo caso, porque Deus quería entregalo nas mans de Ioax por servir os deuses de Edom.

²¹Entón Ioax de Israel subiu ó encontro de Amasías de Xudá en Bet—Xémex de Xudá.

²²Israel derrotou ós xudeus, que fuxiron á desbandada.

²³En Bet—Xémex apreixou Ioax de Israel a Amasías de Xudá, fillo de Ioax de Ioacaz, e levouno a Xerusalén. Na muralla de Xerusalén abriu unha brecha de douscentos metros, desde a Porta de Efraím ata a porta do Ángulo.

²⁴Apoderouse do ouro, prata, os utensilios que se achaban no templo ó coidado de Obededom, os tesouros de palacio e os reféns, e volveu a Samaría.

²⁵Amasías de Xudá, fillo de Ioax, sobreviviu quince anos a Ioax de Israel, fillo de Ioacaz.

²⁶Para máis datos sobre Amasías, desde o principio ata a fin do seu reinado, véxase o libro dos Reis de Xudá e Israel.

²⁷Cando Amasías se apartou do Señor, tramaron contra el unha conspiración en Xerusalén; fuxiu a Láquix, pero perseguírono ata Láquix e matárono alí.

²⁸Cargárono sobre uns cabalos e enterrárono cos seus antepasados na capital de Xudá.