Read Biblia SEPT 2 Crónicas 9 Bible Online

2 Crónicas 9 - Biblia SEPT bible

2 Crónicas 9

¹A raíña de Sabá oíu a fama de Salomón e foi desafialo con enigmas. Chegou a Xerusalén cunha grande caravana de camelos cargados de perfumes e ouro en grande cantidade e pedras preciosas. Entrou no palacio de Salomón e propúxolle todo o que pensaba.

²Salomón resolveu todas as súas consultas; non houbo unha cuestión tan escura que Salomón non lla puidese resolver.

³Cando a raíña de Sabá viu a sabedoría de Salomón, a casa que construíra,

⁴os manxares da súa mesa, toda a corte sentada á mesa, os camareiros cos seus uniformes, servindo, os copeiros cos seus uniformes, os holocaustos que ofrecía no templo do Señor, quedou abraiada

⁵e dixo ó rei: —"É verdade o que me contaron no meu país de ti e da túa sabedoría.

⁶Eu non quería crelo, pero agora que vin e o vexo cos meus propios ollos, resulta que non me dixeran nin a metade. En abundancia de sabedoría superas todo o que eu oíra.

⁷Feliz a túa xente, felices os cortesáns que están sempre na túa presenza aprendendo da túa sabedoría.

⁸Bendito sexa o Señor, teu Deus, que, polo amor con que quere conservar para sempre a Israel, te elixiu para te colocar no trono coma rei deles pola graza do Señor, teu Deus, para que gobernes con xustiza!".

⁹A raíña regalou ó rei catro mil quilos de ouro, gran cantidade de perfumes e pedras preciosas; nunca houbo perfumes coma os que a raíña de Sabá regalou ó rei Salomón.

¹⁰Os vasalos de Hiram e os de Salomón, que transportaban o ouro de Ofir, trouxeron tamén madeira de sándalo e pedras preciosas.

¹¹Coa madeira de sándalo o rei fixo tarimas para o templo do Señor e o palacio real, e cítaras e arpas para os cantores. Nunca se vira madeira semellante na terra de Xudá.

¹²Pola súa parte, o rei Salomón regalou á raíña de Sabá todo o que a ela se lle antollou, superando o que ela mesma levara ó rei. Despois ela e o seu séquito emprenderon a viaxe de volta ó seu país.

¹³O ouro que recibía Salomón ó ano eran vinte e tres mil trescentos quilos,

¹⁴sen contar o proveniente de impostos ós comerciantes e ó tránsito de mercancías; e todos os reis de Arabia e os gobernadores do país levaban ouro e prata a Salomón.

¹⁵O rei Salomón fixo douscentos escudos de ouro batido, gastando seis quilos e medio en cada un,

¹⁶e trescentas adargas de ouro batido, gastando medio quilo de ouro en cada unha; púxoas no salón chamado Bosque do Líbano.

¹⁷Fixo un gran trono de marfil, recuberto de ouro puro;

¹⁸tiña seis gradas, un año de ouro no respaldo, brazos a ambos lados do asento,

¹⁹e doce leóns de pé a ambos lados das gradas. Nunca se fixera cousa igual en reino ningún.

²⁰Toda a vaixela de Salomón era de ouro e todas as alfaias do salón do Bosque do Líbano eran de ouro puro; nada de prata, que en tempos de Salomón non se lle daba importancia,

²¹porque o rei tiña unha flota que ía a Tárxix cos servos de Hiram, e cada tres anos volvían as naves de Tárxix, cargadas de ouro, prata, marfil, monos e pavos reais.

²²Na riqueza e sabedoría o rei Salomón superou a todos os reis da terra.

²³Todos os reis do mundo viñan visitalo, para aprender da sabedoría da que Deus o enchera.

²⁴E cada un traía cadanseu agasallo: vaixelas de prata e ouro, mantos, perfumes e aromas, cabalos e mulos. E así todos os anos.

²⁵Salomón tiña nas súas cortes catro mil cabalos de tiro, carros e doce mil cabalos de montar. Instalounos nas cidades con cuarteis de carros e en Xerusalén, cerca do palacio.

²⁶Tiña poder sobre todos os reis, desde o Éufrates ata a rexión filistea e a fronteira de Exipto.

²⁷Salomón conseguiu que en Xerusalén a prata fose tan corrente coma as pedras, e os cedros, coma os sicómoros de Xefelah.

²⁸Os cabalos de Salomón proviñan de Exipto e doutros países.

²⁹Para máis datos sobre Salomón, da punta ó cabo do seu reinado, véxase a Historia do profeta Natán, a profecía de Ahías de Xiloh e as visións do vidente Idó a propósito de Ieroboam, fillo de Nabat.

³⁰Salomón reinou en Xerusalén sobre todo Israel corenta anos.

³¹Cando morreu enterrárono na Cidade de David, seu pai. Seu fillo Roboam sucedeuno no trono.