Read Biblia SEPT Esdras 8 Bible Online

Esdras 8 - Biblia SEPT bible

Esdras 8

¹Lista dos cabezas de familia, coas súas xenealoxías, que subiron canda min desde Babilonia, durante o reinado do rei Artaxerxes;

²fillos de Pinhás: Guerxom; dos fillos de Itamar: Daniel; dos fillos de David: Hatux,

³dos fillos de Xecanías; dos fillos de Parox: Zacarías cos que foron rexistrados cento cincuenta homes;

⁴dos fillos de Pahat—Moab: Elioenai, fillo de Zerahías e, con el, douscentos homes;

⁵dos fillos de Xecanías, fillos de Iahaziel e, con el, trescentos homes;

⁶e dos fillos de Adín: Ebed fillo de Ionatán e, con el, cincuenta homes;

⁷e dos fillos de Elam: Isaías fillo de Atalías, con el, setenta homes;

⁸e dos fillos de Xefatías: Zebadías fillo de Micael e, con el, oitenta homes;

⁹dos fillos de Ioab: Abdías, fillo de Iehiel e, con el, douscentos dezaoito homes;

¹⁰e dos fillos de Xelomit, fillo de Iosifías e, con el, cento sesenta homes;

¹¹e dos fillos de Bebai: Zacarías fillo de Bebai e, con el vinte e oito homes;

¹²e dos fillos de Azgad: Iohanán fillo de Catán e, con el, cento dez homes;

¹³e dos fillos de Adonicam: os derradeiros, con estes nomes: Elifélet, Iehiel e Xemaías e, con eles, sesenta homes;

¹⁴e dos fillos de Bigbai: Utai e Zabud e, con el, setenta homes.

¹⁵Reuninos onda o río que vai morrer no Ahavá e acampamos alí tres días. Entón deime conta de que había leigos e sacerdotes, pero non había ningún levita.

¹⁶Mandei, pois, ós xefes Eliezer, Ariel, Xemaías, Elnatán e Iarib, Elnatán, Natán, Zacarías, Mexulam, e tamén ós instructores Ioiarib e Elnatán,

¹⁷coa orde de iren onda Idó, xefe da localidade de Casifiá; e puxen na súa boca as palabras que tiñan que dicir a Idó e ós seus irmáns os servidores na localidade de Casifiá, co fin de que nos trouxesen servidores para a casa do noso Deus.

¹⁸Como a boa man do noso Deus estaba sobre nós, mandáronnos un home asisado, un dos fillos de Mahli, fillo de Leví, fillo de Israel, é dicir, a Xerebías, cos seus fillos e irmáns, en total dezaoito,

¹⁹e tamén a Haxabías e con el Isaías, un dos fillos de Merarí, cos seus irmáns e seus fillos, en total vinte homes;

²⁰e entre os servidores que David e os xefes deran para o servizo dos levitas, douscentos vinte servidores, todos designados polos seus nomes.

²¹Proclamei alí, onda o río Ahavá, un xaxún, a fin de nos aflixirmos diante do noso Deus e buscar o seu favor e termos unha feliz viaxe, nós e os nosos nenos e bagaxes.

²²Pois non ousabamos pedirlle ó rei infantes e xinetes que nos protexesen dos nosos inimigos durante a marcha, despois de que lle dixemos: —"O noso Deus protexe ós que o serven, mentres que o seu furor e cólera volven contra os que o abandonan".

²³Xexuamos, pois, pedindo este favor ó noso Deus, e el escoitounos benignamente.

²⁴Despois disto escollín doce xefes de entre os sacerdotes con Xerebías, Haxabías e dez dos seus irmáns con eles.

²⁵Pesei diante deles a prata, o ouro e os obxectos que o rei, os seus conselleiros e os israelitas residentes alí entregaran como ofrenda ó templo do noso Deus.

²⁶Xa pesados, puxen nas súas mans seiscentos cincuenta talentos de prata, obxectos de prata equivalentes a cen talentos, outros cen talentos de ouro,

²⁷vinte copas de ouro por mil dáricos, dous obxectos de bronce brillante, fermosísimos, preciosos coma o ouro.

²⁸Despois díxenlles: —"Vós estades consagrados ó Señor, eses obxectos están consagrados e a prata e ouro son unha ofrenda voluntaria ó Señor, o Deus dos nosos pais;

²⁹gardádeo todo moi ben ata que o pesedes diante dos xefes de familia de Israel, en Xerusalén nas habitacións da casa do Señor".

³⁰Entón os sacerdotes e os levitas tomaron ó seu cargo a prata, o ouro e os obxectos pesados para levalos a Xerusalén á casa do noso Deus.

³¹Saímos de onda o río Ahavá o doce do primeiro mes para irmos a Xerusalén. A man do noso Deus estaba sobre nós e, no camiño, arrincounos das mans do inimigo e dos salteadores en emboscada.

³²Chegamos a Xerusalén e repousamos alí tres días.

³³No cuarto día pesamos a prata, o ouro e os obxectos na casa do noso Deus, entre as mans do sacerdote Meremot fillo de Urías, de Elazar fillo de Pinhás, que estaba con el, e xunto con eles os levitas Iozabad fillo de Iexúa e Noadías fillo de Binui.

³⁴Número e peso, todo estaba alí, e o total do peso foi consignado por escrito. Nese mesmo tempo,

³⁵os que chegaron da catividade, os deportados, ofreceron en holocausto ó Deus de Israel doce touros por todo Israel, noventa e seis carneiros, setenta e sete años, doce machos cabrúns polo pecado: todo en holocausto ó Señor.

³⁶Despois transmitiron as ordes do rei ós sátrapas e ós gobernadores de Transeufratina, que sostiveron o pobo e a casa de Deus.