Read Biblia SEPT Tobías 11 Bible Online

Tobías 11 - Biblia SEPT bible

Tobías 11

¹Como xa se aproximaban a Acrim, diante de Nínive, Rafael dixo:

²—"Ti sabes ben en que situación deixamos a teu pai.

³Imos, pois, adiantarnos á túa muller para preparar a casa mentres chegan os demais".

⁴E marcharon os dous xuntos. Rafael dixéralle a Tobías: —"Garda o fel e lévao na man". O can seguiu detrás deles.

⁵Ana estaba sentada, ollando o camiño por onde tiña que vir seu fillo.

⁶Viuno vir ó lonxe e díxolle ó pai: —"Alí vén o teu fillo co seu compañeiro".

⁷Rafael dixo a Tobías antes de que chegase onda o pai: —"Eu sei que os ollos de teu pai se abrirán.

⁸Aplícalle o fel do peixe sobre eles: o remedio fará que as nubes que ten salten, e desaparezan os leucomas; entón teu pai recobrará a vista e verá a luz".

⁹Ana correu para abrazarse no fillo e díxolle: —"Vólvote ver, meu fillo. Agora xa podo morrer". E empezou a chorar.

¹⁰Tobit levantouse e, cambaleando, saíu pola porta do patio.

¹¹Tobías correu ó seu encontro, co fel do peixe na man, soproulle nos ollos e, apreixándoo, díxolle: —"Bo ánimo, papá".

¹²Despois coas dúas mans fíxolle saltar os leucomas dos ollos.

¹³Entón Tobit botouse ó seu pescozo chorando, e díxolle: —"Vólvote ver, fillo, luz dos meus ollos".

¹⁴Logo dixo: —"Bendito sexa Deus. Bendito o seu nome grande. Benditos sexan todos os seus anxos. Que o seu nome grande sexa sobre nós. Benditos sexan todos os seus anxos en todos os séculos. Pois o Señor, que me ferira, permíteme agora ver o meu fillo Tobías".

¹⁵Tobías entrou na casa moi feliz; bendicindo a Deus en alta voz. Explicoulle ó seu pai o gran éxito da súa viaxe, como traía toda a prata e tamén como casara con Sárah, a filla de Reuel, próxima a chegar, pois xa se encontra ás portas de Nínive.

¹⁶Tobit, contento e loando a Deus, saíu ó encontro da súa nora cara ás portas de Nínive. Cando as xentes de Nínive o viron marchar e dar voltas con plena saúde, sen que ninguén o guiase, marabilláronse. Tobit pregoou diante deles que Deus tivera mágoa del, abríndolle de novo os ollos.

¹⁷Chegado xunto a Sárah, a muller de seu fillo, Tobías, bendiciuna nestes termos: —"Sexas benvida, filla. Bendito sexa o teu Deus, que te trouxo onda nós, filla. Bendito sexa o teu pai. Bendito sexa o meu fillo, Tobías, e bendita ti, filla. Entra na túa casa; sexas moi benvida, para ti a bendición e a ledicia; entra, filla".

¹⁸Nese día houbo gran gozo entre os xudeus de Nínive.

¹⁹Ahicar e Nasbás, os sobriños de Tobit, viñeron tamén onda el, cheos de felicidade.